Izaiya 10
10
1Udilu wa atu anno anasakanya malamulo ogombiha ibaribari. Udilu wa anamalremba anno analremba malro moadjelra afwiwa. 2Aliwa katongaga milandu anaviringaniha malamulo kaadjelraga atu osegedeya. Anaabela atu osimela. Anaawaka amakwele a ahiyana jengo jiwa. Anaabela eto anapawi. 3Nnga siku notonga ubure nafiya, nnga bwanyula okumela olapela waza, nyo munafuna muze muire avi? Nyo munafuna mudowe mwatawele wa ani ira mukamihediwe? Jorayela jenyu munafuna mukoye waani? 4Kilivo inafuna nyo irana ahali worama vati muwari monyaswa vamohi na atu ohindiwa, owu hehi munokwa vamohi na atu anafuna piwa. Tchoira uwali wa Yehova kunauhiyani, eto ndanda naye nilive notapula nene ira auoniheni goyi.
Tongiwa wa akuda Asiriya
5Yehova unawonga ira: <<Udilu wa akuda Asiriya, aliwa anafwanyeya kagali iwaxuwaxu ya uwali waga! Aliwa anafwanyeya kagali golromondo yotakaleliwa waga. 6Nnoaruma akuda Asiriya ira kadowe kawane na nlogo nohobalra ja Mulugu. Nnoaruma ira kadowe wa atu anno nnafuna miyo aoniha uwali waga ira kaawake jorayela jiwa jatene, kamala kaanyingalelege vati nnga madogo a murampani. 7Mbwenye mwene wa akuda Asiriya kaiziwile ejo, eto mmirimani mwaye kanaumbuwela ira umurumile gu miyo. Mbwenye liye mmirimani mwaye unive: <Nnadowa daatolotche, daagondjihe malogo madjindji.> 8Tchoira liye unawonga ira: <Asogolrelri aga a kondo ba amwene ve. 9Miyo dihimala gondjiha sidadi ya Kalino na Karekimiji, dihimala gondjiha sidadi ya Hamate na Aripade, dihimala gondjiha Samariya na Damaxiku. 10Miyo na ndanda naga dihimala gondjiha maumwene a atu olobela jolandaniha ja amilugu ewa jagali josemiwa, anno kanna vikwamutu josema jilukulu kwaranya vikwamutu josema jili muJeruzalemu na Samariya. 11Kodi miyo nnoimwanana gondjiha Jeruzalemu na vikwamutu josema jili emo? Nnoairela makalelo amohive nnga dairile miyo na Samariya na jolandaniha josemiwa jafwannye miyo wewule.> >>
12Nabwiya agamanle aoniha goyi atene anakala Siyawu na Jeruzalemu, liye eto unoza amutonge mwene wa akuda Asiriya na mwasa wa jowonga jovitukulela jikumile mmirimani mwaye eto na mwasa oviulukuliha wairile liye na meso aye. 13Mwasiwa mwene wa Asiriya unawonga ira: <<Mwa kopolo da ndanda naga dihilaba na zelru daga, tchoira miyo dihikana onelramo, miyo nnowanda bwanyula madilre a atu, eto nnowanda awaka jorayela jiwa, nnowanda agwiha anno anakala mipando da umwene kalaga nnga dili ng'ombe ya mulombwana yatakaleliwa. 14Ndanda naga nihinda jorayela ja malogo a atu, nnga mutu ahindaga itundji ya mbalrame. Miyo dihiwanda doda ilambo yatene ya vati, nnga mutu adodaga mazayi ohiyiwa. Atu atene kalingana na mbalrame yahaxixile tumba nne gudubulra mulomo, nne nla.>>
15Mbwenye Yehova unawonga ira: <<Kodi mbazo inowanda vitukulela kwaranya wenno unalabana? Kodi saroti unowanda vitetela kwaranya wenno unalabana? Kodi nkogozo unomuvenyiha mutu wenno uhidedile? Owu hehi nkogozo unowanda nvenyiheda zulu mutu okalawo? 16Na mwasa wenno Nabwiya Yehova wa Makuru Matene unoza aarumihede urenda oaondiha anyakondo atene a kopolo a Asiriya. Era eno undimuwa wa mwene ule unoza utumeyiwe, umale nnga yengo yojihiwa na munlo mulukulu. 17Mulugu wenno uli wareya wa Izarayeli unoza akale nnga munlo. Mutu waye Otchena unoza akale nnga malumi a munlo. Siku nimohive neno munlo wenno unoza akahe, amala atumeye minga na makaruwe a mwene wa Asiriya. 18Yehova unoza anonge upama watene wanna liye muwari mwa kokola yaye nari teya yaye yobaliha pama. Unoza anonge jatene ejo. Ilambo yaye inonongeya nnga jinaira mutu awondaga na urenda. 19Mitengo nnafuna hala mukokolani nnokala da vang'onove bahi ante mwana unowanda lremba indjiva uwa.>>
Atu a vang'ono a Izarayeli anoza kawele
20Siku nenne atu ohala a aIzarayeli eto atu ovulumuwa a Jako kiza kamunyindelagave wenno aabubuda. So anamunyindelege Yehova, Mulugu Otchena wa Izarayeli mwa ibaribari. 21Atu ohala anoza kawele, atu ohala a nlogo na Jako anoza kawelele wa Mulugu wa kopolo. 22Weyo Izarayeli, masiki atu awo kaindjive nnga miseva da mutcherelani mwa bara, atu a vang'ono banafuna wela. Yehova umala kumiha nlamulo zela nongiwa wewa eto tongiwa wewa kunakala wa masika eto unokala wa ibaribari. 23Nabwiya Yehova wa Makuru Matene unoza anonge ilambo yatene nnga mwemo mwatongele liye.
24Na mwasa wenno Nabwiya Yehova wa Makuru Matene unawonga ira: <<Nyo akuda Siyawu kamwaaovege akuda Asiriya kawanaga kondo na nyo, kaukomagani na golromondo eto kavenyihaga nkogozo wewa nnga jairile aIjipitu. 25Ihanle vang'onove bahi ira takaleliwa unna miyo na nyo umale. Eto nnoza dikayena uwali zela akuda Asiriya fiyeda anonga.>> 26Yehova wa Makuru Matene unoza aawaxule akuda Asiriya nnga mwemo mwaawaxunle liye aMidiyani vanibweni va Orebe. Na golromondo yaye unoza aaonihe goyi na makalelo nnga aaonihile liye goyi aIjipitu Bara Yofila.#10:26 Zela makalelo aIzarayeli kaagondjihile atu aMidiyani na aIjipitu muwari mwa kopolo da Mulugu, nione Anamasogolrelra 7:19-25; Ezodu 14:15-31. 27Siku neno unoza auruleni mitolro dili vafudini venyu na nigologolo nili mmakohini mwenyu. Nigologolo no nnoza nikotowe na mwasa oruva.
Za wa amwidani
28Akuda Asiriya anoza kafiye Ayati. Kaxolre ante Migoromi. Kadowe kakoyihe mitolro diwa Mikimasi. 29Anaza kazele vari va mwango. Kafiya Jeba, kagone. Atu a Rama anorendjeya. Atu a Jibeya sidadi ya Sawuli anotawa. 30Nlani mokuwa nyo atu a Galimi. Reyani nibaru nyo atu a Layizi. Nyo atu a Anatoti muhukana udilu. 31Atu a Midimena anatawa. Eto anamurala a Jebimi anavitala. 32Peno eva eni akuda Asiriya ayo anofiya Nobe, anoza katekenye miwono diwa ira kaarendjetche atu anakala Mwango wa Siyawu, wenno uli mwango wa Jeruzalemu.
33Kaing'anani, Nabwiya Yehova wa Makuru Matene unoza aagwade anyakondo anaza ayo na kopolo dowopiha nnga mutu agwadaga tambi da mutengo. Andimuwa andimuwa anoza kagwihiwe eto aliba vitukulela anoza katitihiwe. 34Nabwiya unoza aagwade nnga vini mutu agwadaga mitengo da mukokolani na mbazo. Eto aliwa anoza kagwe nnga vini mitengo dilukulu dagwaga Libano.
S'ha seleccionat:
Izaiya 10: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral