2 Amwene 7
7
Elizewu ohowonga zela jodja jafuna kalawo
1Evale Elizewu ohowakula eraga: <<Kavuruwanani mazu a Yehova. Yehova unawonga ira: <Metchelo ora nnga yenna, va mulango va Samariya veva kilu tanu na mbinli da utu wa tirigu otchileya pama nnagulihiwege kobiri imohi bahi ya parata. Eto kilu kumi na nnayi da sevada#7:1 sevada tchi yomela imohi ya burebure, yenno inasakanyiwana utu. Utuwa eto kanariya fiyeda nnga utu wa tirigu. Nona guliwaga na peresu ya vang'ono. nnagulihiwege kobiri imohi ya parata.> >> 2Mbwenye musogolrelri wa anyakondo, wenno amuing'aneletcha mwene, ohomuwakulaga mutu wa Mulugu ule eraga: <<Masiki Yehova afugule majanela a zulu, jejo kajinaireya!>> Evale Elizewu ohomuwakulaga eraga: <<Weyo metchelo unoona na meso awo. Mbwenye wagaonne, kunadja.>>
Kwakwanela wa mazu awongile Elizewu
3Eto kohokalawo alombwana annayi a maranya kafwanyeya unde va mulango va Samariya vale. Aliwa kohowongaga mmohi na nfwaye keraga: <<Kodi mwasiwa gwa nni unafunela hiyo kala veva ante nifiyede kwa? 4Hiyo masiki nivolowe musidadi nnagomela kwela mwemo, mwasiwa musidadi muhukala ndala. Eto masiki nakala va mulango eva nnagomela kwa na ndala imohive. Mbwenye yapamiwa inafwanela nivenyeni tchineneva nidoweni vamisasani va akuda Siriya. Nagadowile wewule, aliwa kahanipe, nnokalawo. Eto masiki aliwa kanipa, ukwa uwa ku umohive.>> 5Mwa enne unde udibaga, kohomaruwaga, aliwa dowa vamisasani va akuda Siriya. Kafiyaga vamisasani vale, tchanfwannyilevo mutu. 6Tchoira Nabwiya gwasakanyile ira akuda Siriya ale kavwege nla wa aterelado vamohi na kavalo datamangaga, kalaga nnga migugudo da nikuru nohokala na masika na anyakondo. Mwa enne aliwa kagavwile, kohowongaga oka oka keraga: <<Eni mwene wa Izarayeli uvwananne na amwene a aEti na amwene a Ijipitu ira kaze kawane na hiyo!>> 7Na mwasa wenne, aliwa kohotawaga na itchiguwo tchiguwo, aliwa hiya misasa diwa, kavalo dewa, aburu ewa, jatene jene kahiyileve vamisasani vale nnga mwakungele atu, nne tchatukunle yengo, aliwa tawa ira kahakwe. 8Mwa enne aliba maranya ale kagafiyile vamisasani vale, kohovolowaga mmusasani mmohi, aliwa dja eto aliwa ng'wa. Nomala eno, aliwa tukula parata, oru na jowara, aliwa dowa koya vaiziwile atu. Nomala aliwa wela, dowa volowa musasa mmohiwa, tukula jengo jimohi jiwa, aliwa dowa koya.
9Noira enne, kohowongaga mmohi na nfwaye keraga: <<Alombwana, eva kanisakanyile pama. Peno ti siku na muselu wapama. Eto hiyo niire miyalana. Nera nikaleve omiyalene fiyeda metchelo afwase podi nizela yabure imohiwene. Yali yapama nivenye tchineneva nawonge vande va mwene.>> 10Mwa enne aliwa kohomaruwaga, aliwa za akuwela agwarda a va mulango va sidadi, aliwa awandela muselu wapama ule keraga: <<Hiyo nohodowa vamisasani va akuda Siriya. Nagadowile, kaninfwanyilevo mutu, nne kanivwile nizu na mutu uli watene. So mbwenye nifwannyevo kavalo dagali domangihiwa dene vamohi na aburu omangihiwene eto na misasa diwa dene dagalive nnga mwemo mwakalele atu.>> 11Mwa enne agwarda oing'anela va mulango vale kohotamangaga, aliwa dowa volowa nyumbani wa mwene, dowa muwandela. 12Evale mwene agavwile, ohovenyaga na mahiyu, liye awandela andimuwa kalaba vamohi na liye eraga: <<Miyo nnafuna duwandeleni yenno iniirele akuda Siriya. Tchoira aliwa kohomala iziwa ira hiyo nihikana ndala yohokala ya masika. Eni aliwa kere kuma vamisasani viwa vale, aliwa dowa vitala mukokolani moumbuwela ira: <Akuda Samariya kakuma musidadi mu, hiyo nnoahinda na manda ehu kagali a meswene. Era eno nnovolowa musidadi.> >> 13Mwa enne mwene ule agawongile enne, mundimuwa mmohi ohowakulaga eraga: <<Inafwanela naarumeni alombwana na kavalo tanu nihanlena hiyo ira kadowe kawendelelewo, amala kaze kaniwandele makalelo anafuna atu fwanya wewule. Tchoira hiyo masiki niove, nahadowewo, atu kahanle musidadi mu anagomelave kwa nnga mwindji wa aIzarayeli kakwile.>> 14Mwa enne kohotukulaga kavalo mbinli domangihiwa na aterelado, mwene liye aruma alombwana angasi angasi ira kadowe kaawendelele anyakondo a Siriya ale. 15Evale alombwanale kohoromaga hara mwavira akuda Siriya ale, ante fiya muhindje Jordawu. Aliwa kohofwanyaga jowara pwi pwi mundila vamohi na jowanana jejo jatatila atu na mwasa obaranya. Noira enne, alombwana karumiwe ale kohowelelaga wa mwene, aliwa dowa muwandelamo jatene.
16Mwa enne mwindji watene kohomaruwaga, aliwa dowa roma tukula jengo jafwanyeya vamisasani va akuda Siriya ale. Molingana na mazu awongile Yehova, kilu tanu na mbinli da utu wa tirigu otchileya pama kohoromaga guliha kobiri imohi ya parata eto kilu kumi na nnayi da sevada, aliwa gulihaga kobiri imohi ya parata. 17Mwene amuhenle va mulango vale musogolrelri wa anyakondo, wenno amuing'aneletcha. Evale atu tempu yafiya atu va mulango vale, kohombomaga, aliwa munyingalela, liye kwa, nnga mwemo mutu wa Mulugu ule mwawongele liye tempu yagumanne liye na mwene. 18Mwa enne kohokwakwanela mazu anne mutu wa Mulugu amuwandenle liye mwene ira: <<Metchelo ora yokala nnga yenna va mulango va Samariya veva kilu tanu na mbinli da utu wa tirigu otchileya pama nnagulihiwege kobiri imohi ya parata. Eto kilu kumi na nnayi da sevada nnagulihiwege kobiri imohi ya parata.>> 19Eto namalaba wa mwene ule amuruniha mutu wa Mulugu ule eraga: <<Masiki Yehova afugule majanela a zulu, jejo kajinaireya!>> eto mutu wa Mulugu ule amuwakula ira: <<Weyo metchelo unoona na meso awo. Mbwenye wagaonne, kunadja>>, 20jatene ejile johokwakwanela. Liye ohobomiwa, mala nyingaleliwa na mwindji wa atu va mulango vale, liye fiyeda kwa.
S'ha seleccionat:
2 Amwene 7: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral