2 Amwene 23
23
Joziya ohovenyiheda wandana na Yehova
2 Koronika 34:3-7,29-33
1Noira enne, mwene Joziya ohagumanihaga andimuwa atene a Juda vamohi na a Jeruzalemu, aliwa za vamentoni vaye. 2Evale kagagumanne, mwene Joziya vamohi na alombwana atene a Juda vamohi na atu kakala Jeruzalemu, vamohi na anamakuta na anamafiyiheda na mwindji watene, romela ahima ante dowa gomiheda andimuwa, atene kohodowaga Nyumba ya Yehova. Evale Joziya ohoilerigi mazu matene kafwanyeya muwari mwa Livuru na Yopangana,#23:2 Livuru na Yopangana ti nimohive nnaitaniwa Livuru na Malamulo. Nione 22:8,11. neno nafwanyiwe muNyumbani mwa Yehova, aliwa vuruwanaga. 3Evale mwene Joziya ohoimela wandamelana vanimbozoni,#2 Amwene 11:14 liye sakanya yopangana vamentoni va Yehova ira awendege na Yehova vamohi no hariha malamulo aye na jowelruza jaye na mangano aye na mmirimani mwaye mwatene, no kalawo waye watene eto ira akwakwanelihedege mazu matene a yopangana nnga mulrembiwele atu mulivuruni mule. Mwa enne atu atene na aliwene kohorumelelaga hara yopangana imohive yenne.
4Noira eno, mwene ohomuruma Hilikiya wenno ali mundimuwa wa anamakuta vamohi na anamakuta amohiwa omukamiheda, vamohi na agwarda a va mulango, liye ira: <<Nnafuna mudowe mwakumihemo muNyumbani mwa Yehova jolabana jatene jamusakanyele atu Baali na mulugu Azera vamohi na jomoneya jatene ja zulu.>> Mwa enne aliwa kohodowaga kumiha jatene ejile. Mwene Joziya ohotukulaga, liye dowa tumeya unde wa Jeruzalemu, minda dafwanyeya mwana muhindje wa Sedoromi. Agatumeyile, ohotukulaga ndora niwa, liye dowana Beteli.
5Eto Joziya ohatamangihavo anamakuta abure atene anno amwene a Juda kaahambihile atu kalabaga vibuwa dafwanyeya mamburo otama ovelela mikuto wa amilugu kafwanyeya sidadi da Juda, wandamelana Jeruzalemu. Eto ohatamangiha atene katumeyetcha jonukela wa Baali, vamohi na nzuwa, mwedi, vamohi na jengo jimohi jiwa ja zulu vamohi na jomoneya jatene jinafwanyeya zulu. 6Eto mwene Joziya ohokumihamo muNyumbani mwa Yehova ikwamutu yosema ya mulugu Azera, liye tukula jatene ejile, dowana unde wa Jeruzalemu fiyeda mwana muhindje wa Sedoromi, liye tumeya evo, johala jiwa mala tchila kala ndora. Liye tukula ndora nne dowa tatilela vamasiyeni vevo vakoyiwa atu aburebure. 7Eto ohobwanyula kwartu da alombwana anno kararuwetcha muwari mwa sanganiko da amilugu ewa, dedo dafwanyeya muNyumbani mwa Yehova, mwemo ahiyana mwaluwetcha atu misasa para mulugu Azera. 8Eto mwene Joziya ohatukulaga anamakuta atene kafwanyeya sidadi da Juda, adowana Jeruzalemu. Eto ohotakalihaga mamburo otama ovelela mikuto wa amilugu, mwemo anamakuta ale katumeyetcha atu jonukela romela Jeba ante Beriseba.#23:8 romela Jeba ante Beriseba: Ku wonga ilambo yatene ya Juda mwemo mwatonga Joziya. Hiya ilambo ya Samariya yenno yatongiwa na Asiriya. Eto ohobwanyulaga vibuwa dafwanyeya mmamilango, dedo dafwanyeya va mulango ovolowela wa Jozuwe, wenno ali musogolrelri wa sidadi, dedo dafwanyeya muwononi oromana wa mutu wenne avolowa. 9Kuma evo, anamakuta a mamburo otama ovelela mikuto wa amilugu, aliwa tchavelela mukuto vaibuwani va Yehova Jeruzalemu. So mbwenye kodja pawu dohosakanyiwana leverina vamohi na anamakuta afwiwa.#23:9 aliwa tchavelela mukuto vaibuwani va Yehova: Fwanyeya ira Joziya kaapile anamakuta katwaruwile zela ja vikwamutu josema jiwa. So mbwenye kodja pawu dohosakanyiwana leverina: Ku wonga Joziya oharumeliha ira kadjege pawu dadja anamakuta.
10Eto mwene Joziya ohotakalihaga nimburo notamalelamo amilugu naitaniwa Tofeti neno nafwanyeya ndabo na Mwana Hinomi ira ahakalevo mutu omutumeya mwanaye wa mulombwana nari wa muhiyana monvelela wa mulugu unaitaniwa Moloki. 11Eto ohokumihagamo kavalo dedo amwene a Juda kavelenle atu wa nzuwa, va mulango va Nyumba ya Yehova, wandamelana kwartu ya musogolrelri mmohi aitaniwa Nata-Meleke, yenno yafwanyeya muwari mwa muru. Eto Joziya ohotukulaga aaterelado a mulugu wa nzuwa kanna atu, liye atumeya na munlo. 12Eto mwene Joziya ohobwanyula vibuwa dasakanyile amwene a Juda dedo dafwanyeya vazulu va nimburo na muzulu namangile mwene Akazi. Eto ohobwanyula vibuwa dedo dasakanyile Manasesi matando amenlene a Nyumba ya Yehova. Mwa enne ohokumihagamo, liye mala tchila vibuwa datene edile, liye dowa tatilela utuwa mwana muhindje wa Sedoromi. 13Mwene Joziya ohotakalihaga mamburo otama ovelela mikuto wa amilugu, anno kafwanyeya makumelo wa nzuwa wa Jeruzalemu, pandi ya muwononi odjana wa mwango Otolotchiwa#23:13 mwango Otolotchiwa unawongiwa gu Mwango wa mitengo da Azeti wenno uli vakwikwive na Jeruzalemu. Ali wewo wamangile Salomawu mamburo okuta mikuto da amilugu otakaletchetcha a ahiyanaye. (1 Amwene 11:7-8) Ku wonga amwene atene kuma Salomawu pakana Amoni babaye Joziya tchaireyileve yengo zela mamburo otamalela amilugu amohiwa kawandamannena atu. Mbwenye amalihile jotamalela vikwamutu josema ilambo ya Jeruzalemu ali Joziya. mamburo anno amangile Salomawu mwene wa Izarayeli ira kamutamalelegemo Axitaroti, wenno afwanyeya agali mulugu otakaletchetcha wa akuda Sidoni, na Kemuji, mulugu otakaletchetcha wa akuda Mowabe, vamohi na Milikomi mulugu otakaletchetcha wa aAmoni. 14Eto ohobwanyulaga vikwamutu josema eto ohogwihaga mambozo a mulugu wewa Azera. Mwa enne mamburo mwatamaleletcha atu vikwamutu josema jile ohomala zalihamo makuva a atu.#23:14 ohomala zalihamo makuva a atu: Mwene Joziya ohoirana eno muwari motakaliha mamburo mwatamalela atu vikwamutu josema ira atu kahawelelemo akoka.
Bwanyuliwa wa ibuwa yafwanyeya Beteli
15Mwene Joziya ohobwanyula ibuwa yafwanyeya Beteli,#23:15-20 Mwene Joziya ohobwanyula ibuwa yafwanyeya Beteli: Sidadi ya Beteli tchali muwari mwa ilambo yatonga Joziya. Mbwenye muwari moida vikwamutu josema, Joziya oholupa madilre a ilambo yatonga liye, liye dowakumihagamo nyumba datene dafwanyeya mamburo otama ovelela mikuto wa amilugu dafwanyeya sidadi da Samariya. vamohi na nimburo notama novelela mikuto wa amilugu, nimburo neno nasakanyile Jerobowawu mwana Nebati, wenno aategihile aIzarayeli muwari mwa ibuwa yenne. Eto ohotumeyaga nimburo notamalelavo amilugu aliwa fiyeda kala ndora eto ohotumeyaga ikwamutu yosema ya nimbozo na mulugu wewa Azera. 16Evale mwene Joziya agamanle mabasa anne, agarungunuwile ohoonaga masiye kafwanyeya mwangoni ule. Mwa enne oharumaga atu, aliwa dowa tukula makuva matene kafwanyeya masiye ule, aliwa za tumeya vazulu va ibuwa vale. Mwa enne mwene Joziya ohotakaliha jatene mokwakwanela na mazu a Yehova, anno awongile mutu wa Mulugu tempu yawonga liye zela jatene jafuna Joziya za irana.#1 Amwene 13:2 17Noira enne, mwene Joziya ohofukaga eraga: <<Kodi nimbozo nnaona miyo ni, nnalaba mabasa nni?>>#23:17 nimbozo nnawongiwa kannaiziweya pama. Afwase ali nibwe nolapa noimela owu mabwe mangasi mangasi kavenyihile atu ira atu kafiya evale kawandege umbutchediwa vakoyiwe mutu wa Mulugu ule. Evale atu a musidadi mule kohomuwakulaga keraga: <<Nimbozo ni nnatonyiheda nimburo vikoyiwe mutu wa Mulugu wenno akumile Juda aza awongaga mazu matene zela jejo jiirilena nyo ibuwa ya Beteli ila.>> 18Evale mwene Joziya ohowongaga eraga: <<Muhiye eno kamumexeri makuva aye.>> Noira enne, kohiyaga makuva aye vamohi na makuva a namafiyiheda wenno akumile Samariya.#1 Amwene 13:3-32
19Eto hiya mabasa anna bahi, Joziya ohokumihagamo nyumba datene dafwanyeya mamburo otama ovelela mikuto wa amilugu dafwanyeya sidadi da Samariya, dedo dasakanyile amwene a Izarayeli katatamulaga uwali wa Yehova. Eto Joziya ohobwanyula mamburo matene na makalelo mamohive nnga jairile atu Beteli. 20Mwene Joziya ohahinda anamakuta atene kafwanyeya nimburo notama novelela mikuto wa amilugu na muvibuwani mwatene, liye apa, atumeyaga vazulu va vibuwa dewa dalabetcha atu eto ohotumeya makuva a atu vaibuwani vale. Noira enne, ohowela, liye dowa Jeruzalemu.
Pwando ya Mavirelo
21Mwene Joziya ohawandela atu atene eraga: <<Inafwanela musakanye Pwando ya Mavirelo muwari momutamalela Yehova Mulugu wenyu, nnga mwemo mulrembiwele atu muLivuruni mwa Yopangana.>> 22Fwanyeya ira Pwando ya Mavirelo yokala ha yenne yali yahanababihege kalawo romela tempu aIzarayeli katongiwetcha atu na anamasogolrelra nne yaka datene datonga amwene a Izarayeli vamohi na amwene a Juda.#23:22 romela tempu aIzarayeli katongiwetcha atu na anamasogolrelra nne yaka datene datonga amwene a Izarayeli vamohi na amwene a Juda: Ku wonga Joziya ali mwene oharihamo malamulo a Mulugu zela Pwando ya Mavirelo akwaranya asogolrelri kasogolrelra Izarayeli Jozuwe agakwile nari amwene atene a wanle. Masiki Davi kafiyilevo. 23Mbwenye Joziya agali mwene, amalaga yaka 18 da umwene waye, kohosakanya wa Yehova, Pwando ya Mavirelo muJeruzalemu.
24Mwene Joziya ohomala akumihamo eto aliba wombeza atene, atene otapanya na azimu, amilugu atene, vikwamutu josema jatene na jotakala jatene jafwanyeya mwilamboni mwa Juda vamohi na Jeruzalemu ira akwakwanelihede mazu matene kafwanyeya mmalamuloni, anno kalrembiwe mulivuruni neno namakuta Hilikiya afwanyile liye muwari mwa Nyumba ya Yehova.
25Fwanyeya ira muwari mwa amwene atene kaliwo, Joziya ahanakale mwene, kaliwo nne mwene mmohi awandile twaruwa wa Yehova na mmirimani mwaye mwatene, no kalawo waye watene, na kopolo daye datene, mokwakwanela na mazu matene anafwanyeya mmalamuloni mwa Mozeji nnga jairile mwene Joziya. Eto nne masiki liye agakwile, sogolro waye amwene atene kazilewo kalivo akwakwanenle na makalelo aye.
26So mbwenye masiki jaireyileve eno, uwali wa Yehova kwamanle zela nlogo na Juda na mwasa wa ubure watene wasakanyile Manasesi atatamulaga uwali wa Yehova. 27Mwa enne Yehova ohowonga eraga: <<Akuda Juda nnoza daanyanyale na makalelo nnga dairilena miyo aIzarayeli. Eto nnolramwisa sidadila ya Jeruzalemu yenno isakulrile miyo, vamohi na nyumba yenno yawongile miyo ira: <Nzina naga nnakalege wewule.> >>
28Joira jimohi jiwa ja mwene Joziya vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 29Tempu ya mwene Joziya, mwene wa Ijipitu aitaniwa Farawu-Neko ohovenya ira adowe amukamihede mwene wa Asiriya#23:29 adowe amukamihede mwene wa AsiriyaMaBibiliya amohiwa anawonga ira: adowe awane na mwene wa Asiriya. muhindje Eufarati. Mwa enne mwene Joziya ohozaga, liye gumana na mwene wa Ijipitu ule. Evale mwene wa Ijipitu agamuonne mwene Joziya, ohovayela mpa sidadi ya Mejido. 30Noira enne, anamalabaye kohomutukulaga okwene, mukumana Mejido ule, aliwa mudowana Jeruzalemu, aliwa dowa mukoya masiyeni waye. Noira enne, atu a mwilamboni mule kohomutukulaga mwanaye Jowakazi, aliwa muhambiha umwene vamalroni va babaye Joziya.
Tonga wa Jowakazi, mwana Joziya
31Mwene Jowakazi aromaga tonga anna yaka 23. Liye atongile medi miraru bahi muJeruzalemu. Mmaye aitaniwa Amutali, mwana Jeremiya nkuda Libina. 32Mwene Jowakazi ohosakanya jabure vamentoni va Yehova, molingana na makalelo matene abure anna makolo aye. 33Mbwenye mwene Farawu-Neko, mwene wa Ijipitu, ohomuhinda, liye dowa muheliha mukadeya sidadi ya Ribila mwilamboni mwa Hamate ira ahatongege akoka muJeruzalemu. Mwa enne ohoroma akosa misoko akuda Juda ira kavelele kilu 350 da parata, vamohi na kilu 35 da oru.
Tonga wa Jeyowaki, mwana mmohiwa wa Joziya
34Eto mwene Farawu-Neko ule ohomutukula mwana Joziya mmohiwa aitaniwa Eliyakimu, liye muhambiha kala mwene vamalroni va babaye Joziya. Noira enne, ohomutchindjaga nzina, liye nvaha nzina na Jeyowaki. Eto zela mulombwana Jowakazi, ohomutukulaga, liye mudowagana Ijipitu. Mwa enne Jowakazi agadowile Ijipitu, ohokwa wewule. 35Eto mwene Jeyowaki okumiha parata vamohi na oru liye mpagalri Farawu-Neko ule nnga mwemo mwafunele liye. Liye ira awande pagalri musoko wenne, asokihetcha atu atene, malringana kada mutu na makalelo arayenle liye. Mwa enne mwene Jeyowaki oasokiha atu atene a mwilamboni mule parata na oru fiyeda kwakwana musoko wafuna mwene wa Ijipitu ule, liye dowa nvahedaga. 36Mwene Jeyowaki aromaga tonga anna yaka 25. Liye atongile yaka kumi na imohi muJeruzalemu. Mmaye nzina naye aitaniwa Zebida, mwana Pedaya, nkuda Ruma. 37Mwene Jeyowaki ohosakanya jabure vamentoni va Yehova molingana na makalelo matene abure anna makolo aye.
S'ha seleccionat:
2 Amwene 23: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral