2 Amwene 18
18
Tonga wa Ezekiya mwene wa Juda
1Mwene Ozeya mwana Elahe agamanle yaka taru aatongaga aIzarayeli, tchi tempu yaromile Ezekiya mwana Akazi atonga aJuda. 2Aromaga tonga anna yaka 25. Liye atongile yaka 29 sidadi ya Jeruzalemu. Mmaye nzina naye aitaniwa Abiya, mwana Zakariya. 3Liye ohosakanya jofwanela vamentoni va Yehova molingana na makalelo matene anna mbwiyaye Davi. 4Liye ohomaliha mamburo otama ovelela mikuto wa amilugu, liye mala twa vikwamutu josema eto ohobwanyulaga mambozo a mulugu wewa Azera. Eto ohomalaga itwa nyowa ya mukuwa yenno yasakanyile mulombwana Mozeji. Tchoira malambo anne Ana Izarayeli koitumeyeletcha jonukela, aliwa itanaga na nzina na Newusta. 5Eto mwene Ezekiya amuroromela Yehova Mulugu wa Izarayeli. Muwari mwa amwene atene a Juda kazile sogolro waye liye agakwile, vamohi na amwene atene kaliwo liye ahanakale mwene, kalivo nne mmohi okwakwanela na liye. 6Tchoira Mwene Ezekiya ali mwene wenno alive olimbene na Yehova nne kaviringanihile jowonga ja Yehova eto ohariha malamulo matene a Yehova anno anvahile liye Mozeji. 7Mwa enne Yehova ali na liye. Pandi datene dadowa liye, jatene jomuwendela pama. Eto liye ohokonda tongiwa na mwene wa Asiriya eto kamulaba. 8Liye ohaporotcha aFilistewu fiyeda sidadi ya Gaza vamohi na vilambo datene dowandamelana roma tatamo ding'onong'ono fiyeda sidadi dowerewerihiwa na muru.
9Fwanyeya ira Ezekiya agamanle yaka nnayi atongaga, yaka yenno Ozeya mwana Elahe mwene wa Izarayeli agamanle yaka tanu na mbinli atongaga, tchi tempu yazile mulombwana Salmanezeri mwene wa Asiriya, liye dowa Samariya, liye dowa irindja sidadile. 10Mwa enne magomelo wa yaka taru kohoigondjihaga sidadile, ku wonga yaka yanetanu na imohi yatonga mwene Ezekiya eto yafwanyeya yagali yaka yanetanu na nnayi ya mwene Ozeya mwene wa Izarayeli. Mwa enne Samariya ohogondjihiwa. 11Mwa enne mwene wa Asiriya ohatukulaga aIzarayeli, liye adowana Asiriya, liye dowa ahiya sidadi ya Hala dowaga Habori, wandamelana muhindje Gozani vamohi na sidadi da akuda Mediya. 12Jatene ejo jaireyele mwasiwa aliwa tchanvwelenle Yehova Mulugu wewa. Tchoira aliwa kohoviringaniha yopangana yasakannye Mulugu na aliwa eto na jatene jejo Mozeji muzari wa Yehova arumile liye. Aliwa tchafunne vwa nne tchafunne vwelela.
Senakeribe avendaga jogondjiha ilambo ya Juda
13Ezekiya mwene wa Juda agamanle yaka kumi na nnayi atongaga, mulombwana Senakeribe mwene wa Asiriya ohovenyaga, liye dowa wana na sidadi datene dolimba dowerewerihiwa na muru dafwanyeya Juda, liye digondjiha. 14Mbwenye Jeruzalemu kagondjihile. Noira enne, mulombwana Ezekiya mwene wa Juda ohorumihaga milanyo wa mwene wa Asiriya sidadi ya Lakiji eraga: <<Miyo dihiviringaniha. Nnavepa ira ukumemo mwilamboni mwaga. Miyo nnopagalri jatene jinafune we.>> Mwa enne mwene wa Asiriya ule ohomuwongana ira apagalri kilu 10.500 da parata na kilu 1.050 da oru. 15Mwa enne mwene Ezekiya ohonvahaga mwene wa Asiriya ule parata watene afwanyeya muNyumbani mwa Yehova vamohi na Nyumba yokoyamo ja mwene. 16Eto ohokumihagamo oru wenno akunenlena liye misuwo vamohi na makaxilu a Nyumba ya Yehova, liye tukula nvaha mwene wa Asiriya ule.
17Masiki agavahiwe, mwene wa Asiriya ule ohovendave jowana. Liye oharumaga asogolrelri aye araru, roma mundimuwaye wa anyakondo, na namalabaye mundimuwa, vamohi na mundimuwa mmohi owonga ja mwene ira kamaruwe vamohi na anyakondo ohokala a masika, kadowe Jeruzalemu ira kawane na mwene Ezekiya. Evale aliwa kohomaruwaga, aliwa za Jeruzalemu. Kagazile, kohoimelaga wandamelana movira mwa mahindje#18:17 movira mwa mahindje: Malambo a mundulrimu atu komanga nnga ha ponti, vazulu viwa aliwa sakanyavo na makalelo kaiziwile atu ira mahindje kaviremo kawandege fiya wa atu amohiwa kakala olapela wene. okumela tanki ya mahindje yafwanyeya vazulu wandamelana ndila yodowa munda wa namafulra nguwo. 18Mwa enne aliwa kagafiyile, kohomuitanihaga mwene Ezekiya ira kawonge na liye. Evale mwene Ezekiya ohomurumaga musogolrelri waye aitaniwa Eliyakimu, mwana Hilikiya, vamohi na namalremba wa mwene aitaniwa Sebina, vamohi na Jowa mwana Asafe wenno afwanyeya agali namawelruza ira kadowe kawonge na akuda Asiriya ale.
19Aliwa kagazile, mundimuwa owonga ja mwene ohawandelaga eraga: <<Mudowe mwamuwandele mwene Ezekiya. Mwene mundimuwa, mwene wa Asiriya unawonga ira: <Kodi weyo wagarati unanyindela nni? 20Weyo unawonga ira: <<Nihikana toto na kopolo ira niwane>>, mbwenye anno ba mazu a vamulomonive bahi. Kodi weyo unamunyindela ani para weyo kondaga tongiwa na miyo? 21Weyo unaanyindela akuda Ijipitu anno anakala nnga nkogozo wa murere oparuwa. Tempu ini we uvilimbihedena wawendaga, murere ule unokotowa, upovola ndanda nawo. Farawu unaairana eno atene anamunyindela. 22Eto masiki mudiwandele ira: <<Nnamunyindela Yehova Mulugu wehu>>, liye eto kahi wenne Ezekiya abwanyunle liye mamburo aye otama omutamalelamo na vibuwa daye, nomala awandelaga atu a Juda na a Jeruzalemu ira: <<Ndoweni namutamalelege ibuwa inafwanyeya Jeruzalemu bahi!>>? > >>#18:22 Mundimuwa owonga ja mwene awongaga ira: kahi wenne Ezekiya abwanyunle liye mamburo aye otama omutamalelamo na vibuwa daye, ku wonga kaiziwile ira Ezekiya ohoirana yengo yapama vamentoni va Mulugu. Liye aumbuwela ira ohoirana yengo yompudja Mulugu. 23Mundimuwa owonga ja mwene ule ohokalelave wonga eraga: <<Miyo nnafuna musakanye mapoka na mbwiyaga mwene wa Asiriya. Miyo nnafuna duvaheni kavalo 2.000 na nzina na mbwiyaga, malringana uwande akwakwaniha aliba wendiha para kavalo datene bahi. 24Weyo unaanyindela akuda Ijipitu ira anourumiheda aaterelado a kondoni vamohi na aliba wendiha. Voira aIjipitu kahi yengo, masiki kaze kaukamihedeni, kunawanda mugondjiha nne musogolrelri mmohi mung'onong'ono wa anyakondo a mbwiyaga. 25Kodi weyo unaumbuwela ira divenyile mwa zelru daga meka daharumiwe na Yehova ira dize digudjule sidadila? Yehova gudirumile ira: <Kadowa ilambo yenne ira waigudjule.> >>
26Mwa enne Eliyakimu, mwana Hilikiya, na Sebina, na Jowa anna karumiwe na mwene kohomuwakulaga mundimuwa owonga ja mwene ule keraga: <<Nnouvepani ira muwongege na hiyo anamalabinyu na iwongelo ya iAramayiku mwasiwa nnovwa pama. Mbwenye kamuwongege na iEberewu, tchoira atu anafwanyeya vazulu va muru vale anavuruwana.>> 27Mbwenye mundimuwa owonga ja mwene ohawakulaga eraga: <<Miyo mbwiyaga adirumaga, kadirumile ira dize diwonge na nyo vamohi na mbwiyinyu bahi. Liye eto adirumile ira dize diwonge eto na alombwana anafwanyeya vazulu va muru vale anno anafuna kadje mambi ewa no ng'wa miwozo diwa vamohi na nyo.>>
28Evale mundimuwa owonga ja mwene ule agamanle wonga mazu anne ohovenyaga, liye imela. Noira enne, ohokuwa na mazu ovweya na iwongelo ya iEberewu ira atu atene kavwege eraga: <<Kavuruwanani mazu a mwene mundimuwa, mwene wa Asiriya. 29Mwene unawonga ira: <Nyo kamunyengiwe na mulombwana Ezekiya. Tchoira liye kanawanda uvunelani mmandani mwaga. 30Eto nne Ezekiya kaunyengegeni ira mmunyindelege Yehova awongaga ira: <Na ibaribari Yehova unonivunela hiyo eto liye kanahiya ira sidadila ivahediwe mmandani mwa mwene wa Asiriya.> >> 31Mundimuwa owonga ja mwene ohowongagave eraga: <<Nyo kamunvwe mulombwana Ezekiya. Tchoira mwene wa Asiriya unawonga ira: Musakanye nipangano nowandana na miyo eto muvivelele mmandani mwaga. Era eno nnouhiyani. Kada mutu unerege dja uva okumela mmundani mwaye eto kada mutu unerege dja jovaha ja mutengo wa mufigera waye eto unerege ng'wa mahindje a vaisimeni vaye, 32ante miyo difiyede udowanani ilambo yapama nnga ilambo yenyu, ilambo yenno munafwanyeya tirigu na vinyu, ilambo ya pawu na uva, ilambo ya mitengo da azeti vamohi na nuwi. Era eno kamunakwa, munokalawo. Kamunvuruwanege mulombwana Ezekiya wenno unaukukumulani na mazu mamohive eraga: <<Yehova unonivunela.>> 33Kodi amilugu bavi kawandile avunela atu ira ilambo yewa yahagondjihiwe mmandani mwa mwene wa Asiriya? 34Kodi amilugu a Hamate na Aripade peno ali uvi? Nnga amilugu a Sefarivayimi na Hena vamohi na Iva peno ali uvi? #18:34 amilugu a Hamate na Arpade peno kali uvi? Nnga mwene Senakeribe ohomala agondjiha akuda Hamate na Arpade vamohi na vilambo dimohi diwa wanle, nnga atwale agondjihile liye wanle tchawandile kamihediwa na amilugu ewa, mwenole aumbuwenle ira aIzarayeli na aliwene kiza kakamihediwa na Mulugu wewa agali Yehova Mulugu. Eto Yehova Mulugu okalawo, ohotakaleliwa na yowonga yenno eto liye oholaba ira mwenole ahawande agondjiha aIzarayeli. (2 Amwene 19:6-7,20-35) Kodi kohokalawo amilugu kawandile iwombola ilambo ya Samariya mmandani mwaga? 35Kodi muwari mwa amilugu atene, mulugu guvi ababihilege wombola mmandani mwaga ilambo ya atu kamuhara? Akala aliwa kiwandile, nnga Yehova unawande avi iwombola ilambo ya Jeruzalemu mmandani mwaga?>>
36Mbwenye mwa mazu matene awongaga mundimuwa owonga ja mwene ule, kalivo nne mutu mmohi awakunlege yengo. Atene kohomiyalaga. Tchoira mwene gwakumihile nlamulo noira: <<Kakalevo unafuna wakula yengo.>> 37Mwa enne mulombwana Eliyakimu mwana Hilikiya wenno ali musogolrelri wa vande va mwene ule, vamohi na namalremba wa mwene aitaniwa Sebina, vamohi na Jowa mwana Asafe wenno afwanyeya agali namawelruza kohokawulaga jowara jiwa, aliwa dowaga wa mwene Ezekiya, aliwa muwandelamo jatene jawongile mundimuwa owonga ja mwene.
S'ha seleccionat:
2 Amwene 18: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral