2 Amwene 17
17
Tonga wa Ozeya mwene wa Izarayeli
1Mwene Akazi agamanle yaka kumi na mbinli aatongaga aJuda, tchi tempu yaromile Ozeya mwana Elahe atonga aIzarayeli. Ozeya atongile yaka tanu na nnayi sidadi ya Samariya. 2Liye ohosakanya jabure vamentoni va Yehova. So mbwenye ubure waye kwasimbile fiya nnga makalelo kanna amwene a Izarayeli kaliwo liye ahanakale mwene.
3Mwa enne Salmanezeri mwene wa Asiriya ohozaga ira awane na mwene Ozeya. Evale mwene Ozeya ohorumela mulaba mwene Salmanezeri ule eto liye mpagalrigi misoko. 4Mbwenye yaka imohi Ozeya ohorumihaga milanyo para mulombwana Sowo mwene wa Ijipitu ira aze amukamihede eto ohiya velela wa mwene Salmanezeri misoko daveleletcha liye. Evale Salmanezeri mwene wa Asiriya agaonne ira mulombwana Ozeya uhumurungunuwela, ohomuhinda, liye dowa nfungeliha mukadeya. 5Noira enne, mwene wa Asiriya ohowendawendaga ilambo yatene, liye za Samariya. Agazile, ohoirindja sidadi ya Samariya ile fiyeda yaka taru. 6Mwa enne yaka yanetanu na nnayi yatonga mwene Ozeya, mwene wa Asiriya ule ohogondjihaga Samariya, liye atukula aIzarayeli kafwanyeya emule adowana Asiriya, liye ahiya sidadi ya Hala na sidadi ya Habori wandamelana muhindje unaitaniwa Gozani vamohi na sidadi da akuda Mediya.
Mwasa ogondjihiwa wa aIzarayeli
7Jatene eji jaireyile mwasiwa Ana Izarayeli kohomutegela Yehova Mulugu wewa wenno akumihile ilambo ya Ijipitu kagali mmandani mwa Farawu mwene wa Ijipitu, aliwa roma aovaga amilugu amohiwene. 8Eto kohoroma hara mangano a malogo a atu anno Yehova aatamangihile liye mwilamboni mwewa vasogolro va Ana Izarayeli eto kohara makalelo matene abure kanna amwene a Izarayeli. 9Ana Izarayeli kohoroma sakanya mozembiheya jengo johofwanela jejo jakondihile Yehova Mulugu wewa. Aliwa sidadi dewa datene kohomangamo mamburo otama ovelela mikuto wa amilugu amohiwa, roma tatamo ding'onong'ono nari sidadi dilukulu dowerewerihiwa na muru. 10Eto kohovenyiha vikwamutu josema vamohi na mambozo a mulugu wewa Azera vazulu va mikuma datene dogwela nari vati va mitengo datene da matakuru gubugubu. 11Eto kohotumeya jonukela mwatene mwemo mwamangile atu mamburo otama ovelela mikuto wa amilugu ale molingana na malogo anno Yehova atamangihile liye vasogolro vewa. Aliwa kohosakanya jabure katatamulaga takaleliwa wa Yehova. 12Eto kohoroma haraga vikwamutu josema jejo Yehova awongile liye ira: <<Jeji kamuirena.>> 13Eto masiki aliwa kairilenave enne, Yehova ohawandela aIzarayeli na nlogo na Juda muwari mwa anamafiyiheda atene anno kafwanyeya eto kagali anamaona#1 Samuweli 9:9; 2 Samuweli 24:11 Mulugu aaonihile liye jengo eraga: <<Mutwaruwe muwari mwa ndila denyu dotakala nnahara nyo, muharihege malamulo aga vamohi na mangano aga, muwendege nnga mwemo munawongela malamulo anno dawandenle miyo ababinyu eto amala durumihedani nyo muwari mwa anamalaba aga anamafiyiheda.>> 14Mbwenye Yehova agaawandenle enne aliwa tchafunne vwelela. Kohovanda mirima diwa nnga makalelo avandile mirima makolo ewa anno kahafunile muroromela Yehova Mulugu wewa. 15Eto kohokonda mangano na yopangana yenno Yehova asakanyile liye na makolo ewa eto koholramwisa joawendjeliha jejo jaakokomezile Yehova. Kohoroma tamalelaga vikwamutu josema johokana mabasa. Na mwasa wenno na aliwene kohofiyeda kala atu ohokana mabasa. Kohara jejo jairetcha atu a malogo anno kawandamenle atu, anno Yehova awongile liye ira: <<Atwale makalelo kanna atu kamusazihe.>> 16Eto kohiya malamulo matene a Yehova Mulugu wewa, aliwa roma sakanya jofwalrafwaniha mbinli ja ana ng'ombe a momba onyungulrutchiwa ira kakokorelege. Eto kohosakanya mambozo a mulugu wewa Azera, aliwa eto roma kokorela jomoneya jatene jinafwanyeya zulu#17:16 Malamulo kokameliha jotamalelajomoneya jatene jinafwanyeya zulu nnga nzuwa na mwedi na nyenyedi. Nione Detoronomiyo 4:19, 17:3. eto kohomuhara mulugu unaitaniwa Baali. 17Eto kohatumeya ahimiwa a alombwana vamohi na a ahiyana muwari moavelela mukuto. Eto kohoroma wombezaga makanga vamohi no roromelaga aliba sakanya masenga. Eto kohovivelela ira kairegena jabure vamentoni va Yehova, aliwa tatamulaga uwali waye. 18Na mwasa wenne, Yehova ohotakaleliwa valukulu zela aIzarayeli, liye anyanyala. So ahanle vamentoni vaye ali nlogo na Juda.
19Eto nne masiki nlogo na Juda tchaharihilemo malamulo a Yehova Mulugu wewa. Na aliwene kohara makalelo mamohive kaharile aIzarayeli. 20Na mwasa wenne, Yehova ohoakonda Ana Izarayeli atene, ohaoniha goyi yohokala ya masika, liye avaheda mmandani mwa amadjuba, fiyeda liye anyanyala.
21Tempu Yehova yaakumihamo liye aIzarayeli ira kahatongiweve na atu a muibalini mwa Davi, aliwa kohomuhambiha mulombwana Jerobowawu mwana Nebati, liye kala mwene wewa.#17:21 Jerobowawu mwana Nebati, liye kala mwene wewa: Nione 1 Amwene 12:19-20. Evale mulombwana Jerobowawu ohahiyiha aIzarayeli ira kahamuharege Yehova, liye ategiha na yotega ilukulu. 22Mwa enne Ana Izarayeli kohoroma hara jotega jatene ja mulombwana Jerobowawu, tchahiyile. 23Evale Yehova ofiyeda anyanyala nnga mwemo mwawongele liye muwari mwa anamalaba aye anno anafwanyeya kagali anamafiyiheda. Mwa enne aIzarayeli kohotukuliwa mwilamboni mwewa, aliwa dowiwana Asiriya, aliwa kalaga wewo fiyeda siku na peno.#17:23 aIzarayeli kohotukuliwa mwilamboni mwewa, aliwa dowiwana Asiriya, aliwa kalaga wewo fiyeda siku na peno. Fwanyeya ira mwene Salomawu agakwile, aIzarayeli atene kohogaweya kala maumwene menli, umwene wa Izarayeli na umwene wa Juda. Umwene wa Izarayeli wohogondjihiwa na akuda Asiriya, aliwa kumihiwamo mwilamboni mwewa, balaletchiwela ilambo ya Asiriya. Aliwa tchawelenle ilambo ya Izarayeli akoka. Nailerigive sogolro nnovwa zela gondjihiwa wa umwene wa Juda. (2 Amwene 25:1-10) Akuda Juda kohotukuleliwa Babiloniya eto vagamanle yaka 70, kohowelela ilambo ya Izarayeli akoka. (2 Koronika 36:20-23; Jeremiya 29:10; Daniyeli 9:2) Mbwenye afwiwa a umwene wa Izarayeli aliwa kagomenleve kala ilambo ya akuda Asiriya, tchawelenle mwilamboni mwewa akoka.
Aliba tukuleliwa Samariya
24Mwene wa Asiriya ohatukulaga atu kafwanyeya vilambo da Babiloniya, Kuta, Ava, Hamate vamohi na Sefarivayimi, atene anna liye adowana sidadi da Samariya#17:24 sidadi da Samariya: Ku wonga sidadi da ilambo yali umwene wa Izarayeli. Tchoira aIzarayeli kagamanle gondjihiwa na akuda Asiriya, nnga sidadi ilukulu ya aIzarayeli yali Samariya, ilambo yatene yohotukula nzina na Samariya. ira kahale vamalroni va Ana Izarayeli anno katukuliwe. Mwa enne kohomala gaweliwa vilambo diwa Samariya ule ira jikale jewa, aliwa roma kalaga muwari mwa sidadi da Samariya. 25Fwanyeya ira maromelo wa malambo anne kali atu wewule, aliwa tchamuovile Yehova. Na mwasa wenne, Yehova ohorumiha apodogoma, aliwa atolotcha atu amohiwa muwari mwa aliwa. 26Mwa enne anamalaba a mwene kohoviraga, aliwa dowa muwandela mwene wa Asiriya ule keraga: <<So mwene atwinyu anno mwaakumihile nyo vilambo dimohi diwa mudowa mwahiya ilambo ya Samariya kiziwile malamulo anafuna mulugu wa ilambo yenne. Na mwasa wenno liye uharuma apodogoma, eni anaapa atu na mwasa oira aliwa kiziwile malamulo anafuna mulugu wa ilambo yenne.>> 27Mwa enne mwene wa Asiriya ule ohowongaga, liye ira: <<Mudowe mwamutukule namakuta mmohi muwari mwa annya a mwilamboni mule anno mwakumihile nyo mwadowana ilambo imohiwa ira awelele mwilamboni mule para aawandele atu kazile malamulo matene anafuna mulugu wa mwilamboni mule.>> 28Mwa enne ohozaga namakuta mmohi, namurala wa Samariya ule wenno adowiwena ilambo imohiwene, liye wela dowa kalaga Beteli, liye roma afundjihaga ale kazile makalelo matene omuova Yehova.
29Masiki eno kada nlogo nohasakanyave amilugu ewa, aliwa dowa ahelaga munyumbani dafwanyeya mamburo otama ovelela mikuto wa amilugu, nyumba dedo dasakanyile anamurala a ilambo ya Samariya ile kahanakumihiwemo. Kada nlogo kasakanya ikwamutu yosema sidadi yewa yakala atu. 30Akuda Babiloniya kohomusakanya mulugu wewa aitaniwa Sukoti-Benote. Akuda Kuta kohomusakanya mulugu wewa aitaniwa Nergali. Akuda Hamate kohomusakanya mulugu wewa aitaniwa Azima. 31Akuda Ava kohasakanya amilugu ewa kaitaniwa Nibazi na Taritaki. Akuda Sefarivayimi kohofiyeda aliwa atumeyaga ahimiwa kaavelelaga wa amilugu ewa kaitaniwa Adarameleki na Anameleki. 32Fwanyeya ira atwale komuova Yehova, aliwa mutamalelaga eto tempu imohive aliwa asakulraga muwari mwa aliwa alombwana a burebure ira kakale anamakuta a amilugu ewa mamburo otama ovelela mikuto wa amilugu ira kadowe kawatchelege mikuto diwa. 33Mwa enne aliwa komuova Yehova eto tempu imohive kohara amilugu ewa na jolemelela jewa jatene jejo jairetchana atu vilambo dakumihiwe atu.
34Ante peno aliwa anoiranave jolemelela jewa jatene ja wanle. Aliwa kinamuova Yehova mwa ibaribari, nne kinavwelela mangano na jotonga vamohi na malamulo vamohi na jofundjiha Yehova avahile liye ahima a Jako wenno anvahile liye nzina na Izarayeli.#Jenesesi 32:28, 35:10 35Fwanyeya ira Yehova ohosakanya yopangana na aliwa aatongaga ira: <<Kamwaovege amilugu amohiwa nne kamwakokorelege, nne kamwaharege, nne kamuvelelege mikuto wa aliwa. 36Mbwenye mmuovege Yehova wenno uukumihileni ilambo ya Ijipitu na kopolo dohokala da masika vamohi na muwono owongowa. Mmukokorelege eto mmukutelege mikuto liyene bahi. 37Eto malambo matene muharihegemo mangano na jotonga vamohi na malamulo vamohi na jofundjiha jatene jejo jiulrembenleni liye. Eto nne kamwaovege amilugu amohiwa. 38Eto nne kamudiwalege yopangana yenno isakanyile liye na nyo, nne kamwaovege amilugu amohiwa. 39Mbwenye mmuovege Yehova Mulugu wenyu amala liye gunauvunelegeni mmandani mwa amwidani enyu atene.>> 40Mbwenye Yehova agawongile enne, aliwa tchafunne nvwelela. Kohokalelave irana jolemelela jiwa joroma. 41Mwa enne malogo anne kogumaniha muovaga Yehova no hara jolandaniha ja amilugu jagali josemiwa. Aliwa kohoroma sakanya jimohive jahara makolo ewa eto ahimiwa aliwa haragave jejo eto ahimiwa ahimiwene aliwa haragave jimohive jejo fiyeda siku na peno.
S'ha seleccionat:
2 Amwene 17: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral