2 Amwene 1
1
Poreya wa mwene Akaziya
1Mwene Akabe agakwile, atu a ilambo ya Mowabe kohoroma konda tongiwa na umwene wa Izarayeli.
2Siku nimohi mwene Akaziya agali sidadi ya Samariya ohomoraga vajanelani, kwartuni wa nyumba yaye ya muzulu. Mwa enne ohoporeyaga na makalelo ohokala a masika. Evale oharumaga atu ira: <<Mudowe mwanfuke Baali-Zebube,#1:2 Baali-Zebube : Maliba lremba alrembaga eno, alremba muwari mopeta. Tchoira wanle atu kamuroromela Baali kamuitana na nzina na Baali-Zebuli ku wonga Baali wa kopolo. Mbwenye nzina na Baali-Zebube ku wonga Baali otonga ngulrisi. mulugu wa sidadi ya Ekoromi, akala miyo nnovulumuwa!>> 3Mbwenye kadowaga, Mungelro wa Yehova ohoza muwandela namafiyiheda Eliya nkuda Tijibi, liye ira: <<Uvenye udowe wagumane na atu anno Akaziya mwene wa Izarayeli waarumile liye, waawandele wire: <Mwasiwa gwa nni nyo dowaga ira mwanfuke Baali-Zebube, mulugu wa Ekoromi? Kodi ilambo ya Izarayeli kalimo Mulugu ira nyo munfuke? 4Na mwasa wenno Yehova unawonga ira: <<Kama yenno inafwanyeya we, kunakumavo, mbwenye na ibaribari unofiyeda kwela evo!>> > >> Noira enne, mulombwana Eliya ohomaruwaga, liye dowa awandela.
5Mwa enne, aliba rumiwale kohowelaga, aliwa dowa wa mwene. Kagawenle, liye ohafuka eraga: <<Kodi muwelele nni?>> 6Evale aliwa kohomuwakulaga keraga: <<Ukala mulombwana mmohi azile agumana na hiyo aniwandela ira: <Muwele, mudowe mwamuwandele mwene wenno uurumileni, mwere: <<Yehova unawonga ira: Mwasiwa gwa nni weyo dowaga ira wanfuke Baali-Zebube, mulugu wa Ekoromi? Kodi ilambo ya Izarayeli kalimo Mulugu ira we unfuke? Na mwasa wenno, kama yenno inafwanyeya we, kunakumavo, unofiyeda kwela evo.>> > >> 7Evale liye ohafuka eraga: <<Kodi mulombwana azile agumana na nyo auwandelagani mazu anno, anna makalelo bavi?>> 8Aliwa kohomuwakulaga keraga: <<Ali mulombwana eni awarile jowara josakanyiwa na mawoya a anavinyama eto liye ohokana sintu nosakanyiwa na tembe na mwanainyama.>> Mwa enne liye ohowongaga eraga: <<Wenno gu mulombwana Eliya, nkuda Tijibi!>>
Munlo okumela zulu ohatolotcha alombwana kamusaka Eliya
9Noira enne, mwene Akaziya ohomurumaga musogolrelri mmohi na nikuru naye na anyakondo 50 ira kadowe kanvende mulombwana Eliya. Evale musogolrelri wa nikuru na anyakondo ule ohonfwanyaga Eliya agagaratile vazulu va mwango. Aganfwanyile, ohomuwandelaga eraga: <<We mutu wa Mulugu, mwene unawonga ira: <Utitevo vamwangoni vili we vo.> >> 10Mbwenye Eliya ohowakulaga, liye muwandela musogolrelri wa nikuru na anyakondo 50 ule eraga: <<Akala na ibaribari miyo dili mutu wa Mulugu, nnafuna ira munlo akume zulu tchineneva autolotche weyo vamohi na anyakondo awo 50!>> Tempu imohive munlo ohokumaga zulu, mutolotcha musogolrelri ule vamohi na anyakondo aye 50 ale.
11Noira enne, mwene ohomurumaga musogolrelri mmohiwa wa nikuru na anyakondo 50. Na wenne agafiyile wa Eliya, ohowongaga eraga: <<We mutu wa Mulugu, mwene unawonga ira: <Utite mobaranya.> >> 12Evale Eliya ohowakulaga eraga: <<Akala na ibaribari miyo dili mutu wa Mulugu, nnafuna ira munlo akume zulu tchineneva autolotche weyo vamohi na anyakondo awo 50!>> Tempu imohive munlo wa Mulugu ohokumaga zulu, mutolotcha musogolrelri ule vamohi na anyakondo aye 50 ale.
13Noira eno, mwene ohomurumaga musogolrelri mmohiwa waneraru na nikuru naye na anyakondo 50. Evale musogolrelri wa anyakondo ule agafiyile wa Eliya, ohomukokorela Eliya anvepaga momuguzela mwendo eraga: <<Nyo mutu wa Mulugu, nnouvepani ira miyo namalaba wenyu vamohi na anamalabinyu 50 ala, muniwendele tangaranga ira nahapiwe. 14Tchoira miyo dihiiziwa ira munlo uhukuma zulu, za atolotcha asogolrelri ambinli a nikuru na 50 ale vamohi na anyakondo ewa. Mbwenye nnouvepani ira mudiwendele tangaranga ira dahapiwe.>>
15Mwa enne Mungelro wa Yehova ohomuwandelaga Eliya eraga: <<Kumuove, katita, umuhare liye!>> Evale Eliya ohovenyaga, aliwa tita vamohi dowa wa mwene. 16Agafiyile wa mwene ohomuwandelaga eraga: <<Yehova unawonga ira: <Mwasiwa gwa nni nyo arumaga atu ira kadowe kanfuke Baali-Zebube, mulugu wa Ekoromi? Kodi ilambo ya Izarayeli kalimo Mulugu ira nyo munfuke? Na mwasa wenno, kama yenno inafwanyeya we, kunakumavo. Mbwenye na ibaribari unofiyeda kwela evo.> >>
Kwa wa mwene Akaziya
17Noira enne, mwene Akaziya ohokwa mokwakwanela na mazu a Yehova, anno awongile Eliya. Voira liye kaanna mwana wa mwanapongwe, agakwile, mbalaye aitaniwa Jorawu ohoroma tonga vamalroni vaye. Jorawu aromile atonga aIzarayeli, Jeyorawu mwana Jozafa agamanle yaka mbinli aatongaga aJuda. 18Joira jimohi jiwa ja mwene Akaziya, jinafwanyeya jagalrembiwe mulivuruni mwa Joira ja Amwene a Izarayeli.
S'ha seleccionat:
2 Amwene 1: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral