मर्कूस 3
3
मनैयक सुखल हाँठ चोखैलक
मत्ती १२:९-१४; लूका ६:६-११
1येशू फेदोस्र सभाघर गैल। उहाँ हाँठ सुखल एकठो मनैया फे रह। 2येशूक विरोधी फरिसीहुँक्र चिमा लग्लरलह, काकरकि हाँठ सुखल मनैयह चोखैलसे बिसैना दिनिक नियम भङ्ग कर्लक दोष उहाँह लगैना हुँकन्हक योजना रलहन। 3येशू हाँठ सुखल मनैयह कल, “आघ ठह्र्याओ।”
4तब येशू हुँकन पुछ्ल, “मोशक व्यवस्थम बिसैना दिनम का कर्ना अनुमति देहल बा? यी दिन असल कर्ना कि खराब कर्ना, प्राण बचैना कि नाश कर्ना?” तर हुँक्र चूप लग्लरल।
5हुँकन हेर्क येशू रिसैल, ओ हुँकन्हक कठोर मन रलक कारण बरा दुःखीत फे हुइल। उहाँ उ हाँठ सुखल मनैयह कल, “टुँहार हाँठ पसारो।” ऊ हाँठ पसारल, त चोखारलहस। 6फरिसीहुँक्र ओठेसे निकर्क गैल। तबहेँ हुँक्र राजा हेरोदक मनैनसे मिल्क येशूह मुवैना योजना बनाइलग्ल।
भारी भीड येशूक पाछ लग्लक
7तबदोस्र येशू आपन चेलन्हकसँग समुद्रओर गैल। तब गालीलसे मनैन्हक भारी भीड उहाँक पाछ लग्लन। 8येशूक करल अचम्म-अचम्म कामक बारेम सुन्क हुँक्र गालील ओ यहूदिया इलाका, यरूशलेम सहर, इदुमिआ ओ यर्दन लद्यक पूर्वी इलाका, टुरोस ओ सीदोन सहर, ओ आसपासक गाउँसे फे आरलह। 9भीडक मनै नैडबहीँ कैक लाऊम चिउह्रक लाग येशू आपन चेलन लाऊ आन लगैल। 10धेर जहन चोखैलकओर्से रोग्याबेरम्हेन उहाँह छुवक लाग ढकेलिकढकेला करँट्।#मर्क ४:१; लूक ५:१-३ 11जब भूत लागल मनै येशूह द्याखँट्, तब उहाँक पाउ पर्टी, “अप्न परमेश्वरक छावा हुइटी!” कैक चिल्लाइँट्। 12तर येशू, “आबठेसे ‘मै के हुइटुँ’ कना बात बोल्बो-बोल्बो जिन करहो,” कैक हुँकन कर्रसे हप्कैल।
बाह्र जन प्रेरित रोजगैलक
मत्ती १०:१-४; लूका ६:१२-१६
13तबदोस्र येशू पर्वत्वम गैल ओ आपन चाहल मनैन बलैल, तब हुँक्र उहाँकठे अइल। 14हुँक्रमध्येमसे आपन सम्बन्ध बह्राईक लाग ओ खुशीक खबर प्रचार कर पठाइक लाग येशू बाह्रजहन आपन प्रेरितक रूपम रोज्ल। 15ओ हुँकन भूत निकर्ना अधिकार फे देल। 16उहाँक र्वाजल बाह्र जन प्रेरित हिँक्रहे हुइट:
सिमोन, ज्याकर नाउँ येशू “पत्रुस” ढर्ल।
17जब्दियक छावा याकूब ओ याकूबक भैया यूहन्ना। येशू हुँकन्हक नाउँ “बोअनर्गेश” ढर्ल, वाकर मतलब, “गुञ्ज्रना मनै” हो।
18अन्द्रियास,
फिलिप,
बारथोलोमाइ,
मत्ती,
थोमा,
अल्फयसक छावा याकूब,
थेदियस,
देशभक्त कना दलक सिमोन,
19ओ यहूदा इस्करियोत, जे पाछ येशूह शत्रुन्हक हाँठम सुम्पल्।
येशू ओ बालजिबुल
मत्ती १२:२२-३२; लूका ११:१४-२२
20येशू चेलन्हकसँग आपन बैठ्ना घर घुम्ल त, फेदोस्र मनैन्हक भीड जम्मा हुइल्। यिहाँसम कि उहाँहुँकन्हक खैनापिना समेत फुर्सद नैहुइलन। 21जब येशूक घरक मनै यी बात सुन्ल, तब येशूह घर लैजिना कैक उहाँकठे गैल, काकरकि उहाँक दिमाग बिग्रल बाटन कैक हुँक्र कहँट्।
22यरूशलेम सहरसे कौनो-कौनो शास्त्रीहुँक्र अइल ओ कल, “भूतन्हक रज्वा बालजिबुल येशूह कब्जम लेरख्लन। वाकर उह शक्तिले मनैन्हकमसे भूतन निक्राइसेक्ठ।”#मत्ती ९:३४; १०:२५
23यी सुन्क येशू हुँकन बलैल ओ असिक बात ढर्ल, “शैतान अपन्हेह कसिक निक्राई? 24कौनो राज्यम फूट बा कलसे, उ राज्यक पतन हुइठा। 25कौनो घरम फूट बा कलसे, उ घर फे टिक नैस्याकट्। 26अस्तक शैतान फे भूतन्हक विरोधम लर्ठा कलसे, उ टिक नैस्याकट्, ओ उ पतन हुइठा।
27“बलगर मनैयह बाहान्क केल वाकर घर फ्वार ओ धनमाल लुट सेक्जैठा। 28मै जाट्टीसे टुँहन कहटुँ, परमेश्वरक बदनाम कर्लक पाप समेत मनैन्हक करल सक्कु पाप क्षमा कर सेक्जाई, 29तर पवित्र आत्मक बदनाम करल पाप#३:२९ पवित्र आत्मक बदनाम करल पाप: याकर मतलब खुशीक खबरक मुख्य बातह इन्कार कर्ना अर्थात् ख्रीष्टह इन्कार कर्ना हो (यूहन्ना ३:१८, १६:७-११; हिब्रू २:३; ४:१-२)। कबु फे क्षमा नैहुई। परमेश्वरक नजरम हुँक्र सड्डभर पापक दोषी पलरहहीँ।”#लूक १२:१० 30येशू यी बात कल, काकरकि हुँक्र “ओहीह भूत लागरलस” कहटलह।
येशूक डाईन्, भैयन्, ओ बहिनेन्
मत्ती १२:४६-५०; लूका ८:१९-२१
31उहब्याला येशूक डाई ओ भैयन् आपुग्ल। हुँक्र अङ्नहेम आश लागक येशूह बलापठैल। 32येशूक आञ्जरपाञ्जर भीडक मनै बैठलरलह। कुई उहाँह कहल, “गुरुजी, अप्नक डाई ओ भैयन् अप्नह अङ्नम बलाइट।”
33येशू कल, “के हो म्वार डाई? के हुइट म्वार भैयन्?”
34आञ्जरपाञ्जर रहल मनैन हेर्टी येशू कल, “म्वार डाई ओ भैयन् हिँक्रहे हुइट, 35काजेकलसे परमेश्वरक आज्ञापालन करुइया मनै म्वार डाईन्, भैयन्, ओ बहिनेन् हुइट।”
S'ha seleccionat:
मर्कूस 3: thl
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.