Mark 12
12
Unipkaaq Tuquffinaktumik Nauttiijimik
1Jesusim ilihautilirait unipkaaqtigut: “Angun nauttiiviliuqtuq vainiliurutinik ahianik. Avaluplugu, algakhuni nunami iptiijaivikhamik ahianik nappaqhiplunilu kingiktumik qiniqhimavikhamik. Aahiit akiliqtuipkaipluni nauttivingmik atuqtittaa aallanut nauttiijinut inmi ahinut nunamut nuuttuni. 2Ahiaqtarnaqhingmat tilihiuq kivgaminik aikhiquplugu avvakharminik naujunit. 3Kihimi nauttiijinit tigujaujuq, ningaqtaupluni utiqtitaujuq hunaittumik. 4Nunamik nanminiqutilik tilihingmiuq aallamik kivgamik, nauttijiit hukhamaarinngittaat qiqtuuqhugu niaquagut. 5Pingahuat kivgaq tilijaujuq tuqutaujuq. Ilangit tilijaujait ningaqtauplutik tuqutauplutigluunniit, 6atauhiinnaq avaliiqhuni—irnini piqpagijani. Tilitainnaraa, ihumaliqhuni, ‘Pimmariniaraat irnira.’
7“Akiliqtuijut nunamik nauttijut uqamaliqtut inmingnut, ‘Qailiqquq nanminiqutiniktukhaq nunamik. Tuqullugu pijumaqtaqqut nuna!’ 8Tiguplugu tuquttaat igittugu timaa nauttivingmit.
9“Huliniaqnahugivihiuk nauttivingmik nanminiqutilik?” Jesusim apirijait. “Uqautiniaqqaffi—qainiaqtuq tuqunniarait tapkua nauttiijit atuqtilirlugu nauttivik aallanut. 10Taiguqhimanngitpihiuk una Titiraqhimajunii?
‘Ujagaq narrugijaujuq igluqpaliuqtinit
hatja ikirangani tunngaviuliqtuq.
11Atan'ngum pingmagu,
alianaqpiaqtuq takuplugu.’”
12Minihitaqpait, ilihaijit maliganik inutuqaillu tigujumajagaluangat Jesus ilitturigamik unipkarijaujuq; inmiktauq tuquffinaqtutut nauttijittut innamik. Kihimi iqhigigamikkit inuit, hugihimaittumik qimaktut.
Taaksijautit Caesarmut
13Qakugungurmat hivulliuqtiit tilihijut Phariseenik Herodlu ikajuqtuijiinnik nipliqtinahuaqhugu Jesus ihuittumik itiqtaujangani. 14“Ilihaiji,” uqaqhutik, “ilihimajugut ilumuunginnaqtutit. Iglukkuujuittutit piqqamaaqhimaittumik. Ilihautjivaktutit pitquhiinnik Godim ilumuuqtumik. Hatja uqautitigut—ihuaqqaa akiliqtuijaamik taaksijautinik Caesarmun? 15Akiliqtuijukhauvitaa imannarluuniit?”
Jesusim mihigimagamigit mitaarniat uqallaktuq, “Huuq uktuqpinga? Takuhiunga Romankut manngujaanik, uqallautiniaqqaffi.” 16Tunijaugami manngujamik, apirijait, “Kia piksaa atialu hanajauhimava manngujarmut?”
“Caesaum,” kiujut.
17“Taimaitpuq,” Jesusim kiujait, “tunilugit Caesarmut piqutait Caesam, tunilugillu Godmun piqutait Godim.”
Kiutjutaa arligijaat.
Uqarijaunia Makinniq Tuqunganirmit
18Jesus upaktaujuq Sadducinit—hivulliuqtiit ukpiruhuktun tuqungajut makitqijuittut. Apiqhijut: 19“Ilihaiji, Moses tunihimajaatigut maligarmik angun huirumi, qimakhugu nuliani nutaraittumik, aniqataata nuliarijakharijaa uilgahuk nutaraniqatigilugu angajumi atianik attirlugu ihumagijaujukhatut irnimitut. 20Imaa ai, 7ngukpata angutit aniqatigiit. Angajukhiq nulianiktuq nutaranikhimaittumik huiqtuq. 21Tugliup aniata nuliarilirmijaa uilgahuk, ahiit huiqtuq nutaranikhimaittumik. Pingahuup aniata nuliarilirmijaa. 22Taimaa ittuq tamatkiqhugit aniqatigiit huli nutaraniktuqanngittuq. Arnaq kingulliupluni huiqtuq. 23Kia nuliariniaqqauk makitqikpat? Tamaita 7t nuliarigaluarmatjuk.”
24Jesusim kiujait, “Ulamniqtuhi ilihimannginaffigit Titiraqhimajut, ilihimanngittugulu Godim hakugiknia. 25Tuqungajut makitkangamik, katuhiqhiqtaulimaittut tunijaulutigluunniit katuhiqtitaujukhatulluunniit. Inniaqtut iharuliktut qilangmi.
26“Hatja kihimi, tuqungajut makititauvagniariakhaita—Taiguqhimanngillahii titiraqhimajainni Mosesiup, unipkak ikualaaqtumik uqpingniik? Huikhaaqtillugit Abraham, Isaac Jacoblu, God Moses uqaqhimajuq, ‘Godngujunga Abrahamun, Godngujunga Isaacmun, Godngujunga Jacobmullu.’ 27Talvanga Godngujuq inuujunut, tuqunngangittunut. Ulamniqpiaqtutit.”
Ikpingnatqiaq Maligaq
28Atauhiq ilihaiji maliganik nangiqtuq naallaktuq. Ilihaiji ilitturigami Jesus kiuttiaqtuq, apiqhiuq, “Tamainnit maliganit, kitu ikpingnatqijauva?”
29Jesusim kiujaa, “Ikpingnatqiaq maligaq una: ‘Naalagit O Israel! Ataniq Godikput atauhiq atanituaq. 30Piqpagijakhat Ataniq God, uummatingni tamaat, ilungni tamaat, ihumangni tamaat, hakugingnirnilu tamaat.’ 31Tuglia ikpingnaqturlu: ‘Piqpagilugu nuatqatit iliktut.’ Aallamik maligamik ikpingnaqtuqanngittuq ukunanga.”
32Ilihaiji kiujuq, “Uqattiaqtutit, Ilihaiji. Ilumuuqtumik uqaqqutit uqaravit atauhiinnaq God aallaittunilu. 33Ilihimajunga ikpingnaqtuq piqpaginianik God uummatiptigut, kangiqhianiptigut hakugingniptigut piqpagilugulu nuatqatiga uvaptut. Hamna ikpingnatqiaq aittuinirmit ikualaaqtunik aittutauqujaujuniglu maligani.”
34Kangiqhiajuq angun Jesusim ilihimaliramiuk uqallautijaa, “Ungahinngittutit Godim Atan'nguvianit.” Kinguagut, apiqhuijukhaiqtuq.
Kia Irnirivauk Messiah?
35Qakungurmat, Jesus ilihaitillugu angaatjuvikpagjuami, apiqhijuq, “Huuq ilihaijit maliganik uqaqpakpat Davidim irnirijaa Messiah? 36David imni, Anirnikkut Nakuujukkut uqautjijuq,
‘Ataniq uqaqtuq atanimnut,
Ikhivaguit talikpimni
akiratit akitaukpata itigangni.’
37Davidim taingmagu Messiah ‘atanira,’ qanuq Messiah irnirivauk?” Amigaittut inuit tuharnaarijaat.
38Jesuslu ilihautjiuq: “Qajagilugit tapkua maliganik ilihaijit! Pihujungmata niuvaavini aannuraatjaaqtumik pimmarijaujumaplutik. 39Qanurlu ikhivajumainnaqhutik nangarijaunirmi angaatjuvingni ikpatinilu niriqatigiiktuni. 40Kanguhukhimaittumik iqquttivagait uilgahuit piqutimingnit, nagliktaqtutut ittutik qin'ngarangamik. Imainmat, taniqtuqtauqpiarniaqtut.”
Uilgahuup Aittuutait
41Jesus ingittuq aitturviup hanianut Angajuuvikpagjuami qunngiaqhugit inuit aittuijut. Amihut maniktujut amihunik aituijut. 42Uilgahuk itiqtuq ilihipluni malrungnik manngujanik.
43Jesusim qaitqujait malirutini uqallakhuni, “Ilumuuqtumik uqautigiffi, una uilgahuk tunihitqijaujuq aallanit aittuijunit. 44Tunihingmata ikittunik maniutimingnit maniqquqtigaluaqhutik, kihimi inmi, iliarjugaluaqhuni, tunihijuq nanminituaminik inuutjutikharaluaminik.”
S'ha seleccionat:
Mark 12: AQ
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Canadian Bible Society
Més informació sobre Atuutit Qin'ngautillu