USUKUYONY 14
14
Kyiimbo kya vandu vawouwe
1Naasa shalollya lyingyi, Ngurana ya Iruva esalalyi uwe ya ifumbu lya Sion, na vandu 144, 000 ando amwi nawe, veerye irina lyakwe na irina lya ndeye lyikee lyireiye yoo fisanguny fyawo. 2Na yeny shaita unyanga luuka iruveu luvakye yoona lya mura mwiingyi, na lyingyi sha iruruma iniini. Na unyanga yelo shilelwiita lukavaka unyanga lwa vekapa fivale fyawo; 3na iimba kiimbo kiiya mbee ya kitima kilya kya itumbe, na mbee ya valya vatiri muu vaana na vamiku valya; nta kulakae-fo nndu aidima ikulosha kiimbo kilya, kuuta valya 144, 000, vakee woore kunu urukeny. 4Yewo mmbo valakee vatefuse, mashika “Ni vana va kyeny.” Mmbo yewo vakerua na Ngurana ya Iruva wo ando ashendaa. Yewo mmbo vakee vaute efo vanduny, vave sha fimu fya mbee kwa Iruva na kwa Ngurana ya Iruva. 5Ni ewo kaniny kawo kulandelollyo-fo wongo. Mashika mmbatiri mbese-fo.
Vasu Vararu
6Numa shalollya nsu ungyi erumbukaa nnang'ani ya iruveu, arye Nrumi ya Nsia ya llung'anu, naambo na ongoye yewo vakee ulaniny mbony shisha, na wo vandu, na ufyari na kishomu na wo mmba, 7ereraa na unyanga uniini eshaambaa, Indyeny Iruva, na inndumisha, mashika kyeeri kya yaanduya woose kyamfika, miiryeny ndi yeto aletana iruveu na ulana, na yeeve na ngyusoka ta mura. 8Numa shalollya nsu wa kavii asorya eshambaa, “Ekato muri wa Babilony wambwa, wambwa, muri yeto nniini, mashika nto yeto ulerita vandu va masanga mfinyo urye unyafi lwa utuusi lwakwe.” 9Na nsu ungyi wa kararu kavalatya, ereraa na unyanga waasha kaamba, “Kwakooya nndu moose asheindyaa ifisi elyo na ifwanu lya vayo, na iwarya wende lwa vayo yoo kisanguny, ao yoo wokony, 10yeto nawe mmbo ashenaa mfinyo wa unyafi lwa Iruva ukee nsongosye nta ulakee nsasande na mura, ukee upateny lwa unyafi lwakwe nawe mmbo asheorotwaa ni muro na kibiriti yoo mbee ya vasu veele na mbee ya Ngurana ya Iruva.” 11Na nnsu wa mavavyo awo mmbo urwaa llung'anu na llung'anu, nta mbatiraa ifura nsanyiny nta kio-fo, yewo veindya ifisi elyo na ifwanu lya vayo, na yeto mwiwarya wende yelo lwa irina lyakwe. 12Yoo ng'u usisiryo lwa veele lukai, yewo veeringa mavavaso a Iruva, na kyikusiryo kya Yesu.
13Shaita-se unyanga luuka iruve-u lukaamba, “Reiya, ‘Ngoma vafu yewo vafwaa vekee na Nndumi uka ulaalu. Ee da, Mumuyo aamba, vawoni iimuya numa ya ngatara tawo, mashika mashora awo ashendaa eriyani nawo.’”
14Naasa shaorwa ifishi yaa pyai, na yoo uwe ya vayo shalollya umwi aiyo rembo, avakye Nndu, aree ureto lwa saabu efo nrony wakwe, na efo wokony atiri nndo moovi. 15Na nnsu ungyi kooka efo mmba ya Iruva, eterevaa ulya ekee uwe ya ifishi lyilya na unyanga waasha kammbia, “Rwaa-u nndo wafo, kundeilula; mashika saa ya ilula yamfika. Mashika fimu fya uruka fyammikwa.” 16Na yeto ekee uwe ya ifishi keera nndo wakwe urukeny, uruka lukailulwa.
17Naasa shalollya-se nnsu ungyi eshukaa kulya mmba ya Iruva ikee iruveu, nawe-da etiri nndo moovi. 18Na nnsu ungyi-da kooka yoo kitareny kya irasya, yeu mbwe yeto atiri ushilyi na muro, nawe katereva yeto ungyi arye nndo ulya moovi, kammbia, “Rwaa-u nndo yeto wafo moovi kuyaye ndunda ta nsabibu wa uruka, mashika ndunda yeto ta vayo tammbira nnu.” 19Na ulya keera nndo wakwe kailula nsabibu wa uruka, keera ndunda ta vayo efo irininy elyo iniini lya unyafi lwa Iruva. 20Ndunda eto tikavavaryo efo kipoo ya muri, samu ikooka-fo ikafika ngoveny ta kana ka frasi ishekaa kyamaa waasha lwa kilometa 300.
S'ha seleccionat:
USUKUYONY 14: MAS2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.