USUKUYONY 11
11
Vakureekyi vavii
1Naasa shaniingyo nsengye wa irere, nalyo umwi kashivia, “Kwiipoo kundeesa mmba ya Iruva na kitara kyerasya, na yewo vakeiindya-fo.” 2Na kari ka mmba ya Iruva kulakee-se-fo, mashika vandu va masanga mmbo valeaniingwa, nawo mmbo vashevavaraa muri yeto mweele ando a miiri 42. 3Na yeny mmbo nsheningaa vakureekyi vakwa vavii mumu vaute ukureekyi ando a mikonu 1, 260, veree makunnya. 4Yewo mmbo miri ilya ya mafura na firembo fya mishumaa fisalalyi mbee ya Nndumi wa ulana. 5Na kwakooya nndu akunda ivapaana muro mmbo ushukaa efo kaniny kyawo na ikomba vakyiduva vawo kombi. Na kwakooya nndu akunda ivapaana ni indo kinkooye iwaawa. 6Yewo mmbo vatiri ivavaso lya iima ngyina mbua ilashe nta kyeeri kyoose kya ukisuku lwawo. Nawo mmbo varye ivavaso lya yaalasha mura uve samu, na ikapa uruka na wo ngapo shoose wo kyeeri vakundaa. 7Elyi vashemaa ukureekyi lwawo, ifisi llya lyishuukaa si kwa vafu mmbo lyishekapaa fira nawo nalyo mmbo lyishevavingaa na ivawaa. 8Na minying'a yaawo mmbo ishewaa efo shieny ya muri yeto nniini, uvaangwaa irina lya uresi Nsodomu, ao Misri, na nng'u yoo Nndumi waawo alekapyo nsalabeny. 9Na vandu va mmba yeto na ngyufyari na fishomu na isanga lya vandu mmbo valolaa minying'a yaawo ando a mikonu iraru na kyenga, na nta mmbaraa minying'a yaawo irikwa-fo. 10Na yewo vakee ulaniny mmbo vafuraa neekapa nndoro. Nawo vashekuningaa findo fya pya wo veni na veni, mashika elyi vakisuku yewo vavii valevatuuwa yewo vakee ulaniny. 11Mikonu yeyo iraru na kyenga ikansia, mumuyo wa muu wuuka kwa Iruva ukavaanga, vakansalala na marende awo veni, na weerei uniini ukatira vandu yewo vakeevalla. 12Vakeeta unyanga uniini luuka iruveu lwishambaa, “Saaminy na kunu.” Vakasaama iruveu veriwa ni ifishi, vakiduva vawo vevallaa. 13Na kyeeri ekyo kukasha kidinasi kiniini, na kyenga kya ikumi kya muri kikawundukya si, na vandu fiku mfungare vakawaawa nkidinasi ekyo. Na yewo valesaa-u vakairyaa nnu, vakarumisha Iruva wa iruveu. 14Woshiny lwa kavii lwammaa iira, naasa woshiny lwa kararu mmbo lukeesha uviny.
Iranda lya mfungare
15Nnsu wa mfungare kakapa iranda, kukaitiwa ngyunyanga niini iruveu tishambaa, “Umangyi lwa ulana ulaalu mmbo lwammaa iva umangyi lwa Nndumi weeru llo na lwa Kristo wakwe, nawe mmbo asheshillyaa llung'anu na llung'anu.” 16Na vamiku valya makumi avii na vaana vakee mbee ya Iruva vakaye fitima fya itumbe vakawa si kifulufulu, vakeendya Iruva, 17veshambaa,
“Mmbo lwakwaana yewe Nndumi Iruva muni finya shoose,
yewe kuiyo na kweifo,
mashika elyi kwawarya wiidimi lwafo lukee uniini,
kushillyeny.
18Vandu va masanga vakasua,
na unyafi lwafo lukasha,
na kyeeri kya yuutya valya valemfwa uvingo,
na iniinga mashinga afo isina lyawo mmbo vakisuku na veele vafo,
na yewo veindya irina lyafo, vadu na vaniini,
na yewo valelyamara uruka.”
19Numa mmba ya Iruva yeyo ikee iruveu ikaruwa, na isanduku lya kyaasa lyikalollyo-fo. Kimwii kikamika, na iruruma na ukova na kidinasi, na mbua ya masaawe shiniini nnu.
S'ha seleccionat:
USUKUYONY 11: MAS2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.