VAKOLOSAI 2
2
1Mashika mmbo shikundye mumanyi ikutakura lyakwa shaasa lying'ani kimaruma kyany, na kya valya va Laodikia na kya valya valashilollye na miso yaa, 2naambo vaviiryo muu miriminy yaawo, velungwaa ukundiny, naambo vawonise usimba loose lweemanya songosiny, vaute-u imanya nisha deny fyama efyo fya Iruva, mmbwe Kristo; 3mmbwe yeto kwakwe usimba loose lwa urango lukusurumyi 4Mmbo shaamba irero elyi, naambo tupu kulasheeva nndu amulembaa na marero emuleleveya. 5Mashika ra elyi shilaiyo shimuni, kyaindi efo nriminy mmbo shikee neeni, shilangaa na ivereya uramba lwany na ukaari lwa kyikusiryo kyany efo kwa Kristo.
Muu wa dede nnang'ani ya Kristo
6Naasany shaasa mulewarya Kristo Yesu, we Nndumi weeru, endeny indo indo mwikee nawe; 7mwiikulungye neekutira nawe, muveva vakaari efo iirikyony, shaasa muleloshwa; muveengera iva va kyaanu.
8Loleny mukwiise kulasheeva nndu amukamara mifungwa na urango lwa ing'ana neemulemba, shaasa miishivye ya kivandu ikai, na filoshyo fya uraatony efyo fya kiulana filya fya mbee, filakee fya ngata ya Kristo. 9Mashika yoo kwakwe nng'u usongovisi loose lwa Iruva lukai, efo mwiiliny. 10Na yeni mukasongoviswa yoo kwakwe we akee nrwe wa itumbe na wiidimi loose. 11Yoo kwakwe mmbo mukee sha vandu varini lyo urini lulakee lwa mwiili, sheelyi kwara mwiili wa kinndu, llo urini lwa Kristo. 12Mmbo mulerikwa ando amwi nawe llya mulebatiswa; na yoo ubatisony mukarutwa ando amwi nawe, kyeendwa ni iirikya wiidimi lwa Iruva yeto alennduta auka kwa vafu. 13Na yeni llya mweefiiye kimaruma kya makasha any na ira mularinwa, kamuviirya muu ando amwi nawe, ekyimaa imfwaaya makasha moose, 14kamaa na yaangata barrwa ilya yeemutya uvingo ikavika kiduva kweru, kayuuta-u deny neikapya nsalabeny; 15kavinga ngyumangyi na wiidimi, kataallwa ruu ekee na ukaari, katirwaa alya nsalabeny.
16Naasany kulave nndu amuutya uvingo kimaruma kya fyeelya ao fyeena-fo, ao kimaruma kya mikonu miniini ao ilollyo lya mwiiri-fo, ao nta kya sabato-fo; 17yefyo fyoose m-firishe fya findo efyo fishaa; lyo mwiili ni wa Kristo. 18Kulave nndu amusoka simbo yaany, kya ikunyiisya efyo akundye we muni, na iindya vasu, ekuvikaa efo mooryeny neekung'anisa we muni kya ruu, na urango lwa kivandu; 19nta nalasoraa Nrwe yeto ukee ntire na ilungyo ando amwi na miraarii nato ukalungika indo kyuuka na Iruva.
Ikaa na muu ao ifwa nnang'ani ya Kristo
20Naasany kwakooya mmbo mulefwa ando amwi na Kristo na ira filoshyo filya fya mbee fya kiulana, nkikyi elyi mukaa si ya mavavaso, sha vandu va kiulana, 21mulapaani, mulakombe, mulatire; 22(findo efyo fyoose mmbo filyamarikaa elyi fyarunda), mwiisoraa ngyufundo na filoshyo fya kivandu? 23Findo efyo mmbo fivakye sheelyi mmbo fikee fisha, efo urambeny lwa miindye yeyo mulekusongosya muveni, mukaiindya, na ishillya mwiili na unyaasi; lyo filashiidimaa iima lango ta mwiili.
S'ha seleccionat:
VAKOLOSAI 2: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.