2 VAKORINTO 1
1
Fiidikiro
1Paulo, nrumi wa Kristo Yesu kwi isarya lya Iruva, na Timoteo mwanamaye weeru, kwa siri ya Iruva ikee Korinto ando amwi na veele woose yewo vakee urukeny loose lwa Akaya. 2Isarya na ufoo elo lwauka kwa Iruva Nde weeru na kwa Nndumi Yesu Kristo lyimukaye.
Kyaanu kwa Iruva
3Iruva narumishwa we Nde wa Nndumi weeru Yesu Kristo, Nde wa isarya, Iruva wa ilyillya lyoose; 4yeto aluviirya muu ngatareny teru toose, naambo neese lwiidimi iviirya muu valya vakee ngataareny toose, kya iviiryo muu yelyo lukeeviiryo muu ni Iruva. 5Mashika lyo shaasa ilyiso ukiva lya Kristo lyikeengera ing'ana kweru, ni indo-da na iviiryo muu lyeru lyisheengerekaa kwi Kristo. 6Lyo kwankooya yese lukee ngatareny, nkimaruma kya iviiryo muu yelyo na ukiro lwany; ao kwakooya lwaviiryo muu, ni shia ya iviirya muu lyany, elyo lyikeerunda mashora a vayo kya usisiryo lwa makiva alya neese lukeelyiswa. 7Na ivika nsia lyeru kimaruma kyany mmbo lyivangyi, lwiishi sheelyi shaasa yese veakana makiva yoo, ni indo mmbo mukee veakana iviiryo muu elyo. 8Mashika le vanavama, llukunndye imukumbura mbony ta makiva alya alelukooya kulya Asia, mashika mmbo lulerovyo nnu, kiilaanyi finya yeeru isiika, kutani loota pa yekaa na muu. 9Ee, yese mmbo lwekee vautye uvingo lwee waawa, naambo lure lulakuvikya nsia luveni, kyaindi luvike Iruva nsia, yeto aruta vafu, 10yeto alelukira efo ufuny yelo lung'ani indo, na lyingyi ashelukiraa, na mmbwe lulemmbika nsia sheelyi ashelukiraa; 11neeni kwakooya mwaakana neese itereva kimaruma kya simbo ilya luningwaa nngarami ya vandu vengyi, naambo vandu veengyi vaniingye kyaanu kimaruma kyeru.
Kyaaro kya Paulo
12Mashika nnduma weru nto yeu, ukureekyi lwa mirima yeeru kyeendwa ni weele na waa lwa nrima luukye kwa Iruva, nshi kya waarya lwa mwiili-fo, nkwii isarya lya Iruva, mmbo lulekaa yaa ulaniny, na mmwasi kyany yeni. 13Mashika nkwiifo kindo kiiya lukeemureiya kuuta filya mukeesoma-fo, ao ifiirikya, neeny mmbo shivikye nsia sheelyi mmbo musheirikya efo fika masiiyony; 14na lyingyi shaasa mulelwiirikya kyenga, sheelyi yese mmbo lukee kimaruma kya ikurumisha lyany, shaasa yeni mukee kweru, kufike nkonu ulya wa Nndumi weeru Yesu.
15Neeny shivikye nsia indo mmbo shekundye mbele isha kwany, naambo muwewonisa simbo ya kavii; 16na iira kwany na yeenda fika Makedonia; na yuuka Makedonia newuya kwany ne erikwa nnyeni yeenda Uyuda. 17Naasa, kyeeri shekundye itana indo, a mmbo shilereveka-reveka? Ao efyo shikundye itana, mmbo nkundye itana kinndu sheelyi kive indo kwakwa, yaamba yee ni yee, na oode ni oode. 18Na shaasa Iruva akee wa dede, yese lukee va yaamba yee na oode-da-fo. 19Mashika Mwana wa Iruva, Kristo Yesu, yeto lulevambisa mbony takwe kwany, mmbwe yeny, Silwano na Timoteo, nnyaleva yee na oode-fo; kyaindi kwakwe we ni Yee. 20Mashika fyaasa efyo fya Iruva fyoose ni yee, na kimaruma kya vayo na kwakwe fyoose ni Amen; naambo Iruva nakooye ing'aniswa kyeendwa ni yese. 21Naasany yeto mwiluvangisa ando amwi neeni kyeendwa ni Kristo, na ilwamba mafura, ni Iruva. 22Nawe mmbwe aleluvika wende neeluringisya mirima yeeru na Mumuyo.
23Lyo mmbo shikeevanga Iruva nave nkureekyi wa nrima wakwa kimmba kimaruma kyemulyillya nshilefike Korinto-fo. 24Nshi lukeeshillya kyikusiryo kyany-fo, mmbo lukee veekyi vaa ifura lyany; mashika mmbo musellelyi kyeendwa nkikusiryo kyany.
S'ha seleccionat:
2 VAKORINTO 1: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.