1 PETRO 4
4
Muu mwiiya
1Naasany kimmba Kristo alelyiswa ukiva ekee na mwiili, na yeeni raeny fisha fya kirengo ekyo kyeni. Mashika yeto alelyiswa ukiva ekee na mwiili mmbo amfuna ulyamari. 2Kipookya ulaalu mulakyeengere ikaa efo langony ta kivandu-fo, kuuta ni ikaa efyo Iruva akunndye fyeeri efi fyany fyamusaaya fyekaa yaa ulaniny. 3Mashika fyeeri fyeru efyo fyammira fivekufiye itana fya lango ta kiulana, nto yeenda efo uraviny, na lango, na unangwa, na mirumwa ya italauwa ndeu, na ngyari, na miindye ya maruva a wongo ilasumani; 4efo findony efyo wo mmbo vatinnywa nkyany deny elyi mulakeesanga nawo efo uraviny elu lulatiri nta kyeeso, nawo vakava vamutendaany. 5Nawo mmbo vasheveswaa kimwi kimwi ni yeto akudeesye isherumbuya yewo vakee na muu na valya vafiiye. 6Mashika elyi kyikee indo naakwa ni valya vafiiye valeongoywa nrumi yeyo ya nsia naambo vautywa uvingo vekee na mwiili kiinani na ngata ya kivandu. Lyo vashekaa na muu wa kimumuyo indo shaasa Iruva akee muu.
7Lyo masiyony a findo fyoose ansha kufii, naasany, wareny urango muvelala shoovi mwiterevaa. 8Mmwasi ya findo fyoose veny na usasari nnu lwa ikundana, mashika ukundi mmbo lulamyaa ulyamari na lukang'ana inda. 9Waryaniny muveni efo kyeny kwany kulaifo ikunung'una, 10wo umwi kiinani na shaasa akee nsimbe kive kyerundyana muveva sha vangari vesha vekallya fyama fya Iruva fya wo ngata. 11Kwakooya nndu arerya vandu navarerye shaasa irero lya Iruva lyikai, kwakooya arunda narunde na wiidimi elo Iruva anningye naambo Iruva naute-u ing'aniswa kya findo fyoose kwi Yesu Kristo. Nnduma na wiidimi mfyakwe we llung'anu na llung'anu. Amen.
Shaasa Kristo alelya ukiva
12Nyira vakunde, loleny mulasheyaawutwa ni ngatara yeto tikee nnang'ani yaany timusheyaa sha muro naambo timweese, eto tilave sha kindo kyeny kyamusheya-fo. 13Lyo shaasa muleakana makiva a Kristo, fureny, naambo na kyeeri ekyo kya itumbe lyisheorwa paa mushefura na ikapa ukoru. 14Mukee va ngoma kwakooya mwakapwa mong'wa, kimaruma kya irina lya Kristo mashika Mumuyo yeto wa itumbe wa Iruva mmbwe yeto amukaaye. 15Nkivaa nndu wa kwany noorotwa kya iwaa-fo, ao kya unyinyi, ao kya maravi, ao sha nndu mwikulambika findony fya vandu vengyi-fo. 16Kyaindi kwankooya orotwa elyi akee Nkristo nalafiiyo ni nrwe-fo, lyo neengere irumisha Iruva na irina elyo. 17Mashika fyeeri fyammaa iinana yuutywa uvingo kyipooka na efo mmba ya Iruva; na elyi kishepookaa neese, a kyefurumya kya yewo valatirye Nrumi yeyo ya Iruva vyo mmbo kishevaa inda? 18Na kwakooya yeto wa usumanu kishemmbiyaa tamba ikkya, a yeto nalakee mwiindya Iruva kaveva llyamari ashelollywaa dede? 19Naasany yewo veorotwa shaasa Iruva akunndye vasurumi mirima yaawo efo kwakwe, vavekaa-fo vetanaa fya usha, kive ni Muumbi yeto weeru nsha vantannya.
S'ha seleccionat:
1 PETRO 4: MAS2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.