1 VAKORINTO 14
14
Simbo tingyi ta Mumuyo
1Soreny ukundi na ilanga nnu simbo ta Mumuyo, lyo kisha mmwasi tereveny mwidimi itambashwa mbony. 2Mashika yeto mwirera na kishomu kyeny, nshi arera na vandu-fo, mmbo arera na Iruva nyelyi kulaifo nndu amanya, lyo mmbo arera findo fya kyama efo nriminy wakwe muni. 3Kyaindi yeto arera eeloshaa, mmbo arera na vandu findo fyeveekya, neevaviirya muu, neevakaarisa. 4Yeto arera na kishomu kyeny mmbo akukaarisa we muni. Kyaindi yeto akee itambashwa mmbo akeekaarisa siri. 5Neeny lyo shikundye yeni moose murere na fishomu fyeny, lyo mmwasi mmbo shikundye mutambashwe. Mashika yeto alosha mmbo ailannyi yeto arera na kishomu kyeny, kuuta lyo kwakooya atambashwa, naambo siri ikooye ikaariswa.
6Lyo ulaalu vanavama, kwakooya shasha kwany neerera na kishomu kyeny, mmbusha-kyi kwany, kuuta elyi sharera neeni na irammbwa, ao na shia ya urango, ao ilosha, ao na shia ya ufundo? 7Naakwa ni findo filatiri muu kyeeri fyuutaa unyanga, sha kivale ao kyingyi, lyo fyava filoota unyanga lwaalashikye, mmbo kimanyikyaa kwi nkiimbo kya ngata-ki kyikee ikapwa nkivale ao ekyo kyingi? 8Mashika iranda lyikakapwa lyikauta unyanga lulaishiwa mmbi akudeesyaa kya fira? 9Neeni ni kiwo. Ulumi lwany lukanra luloota kindo kimanyikye, irero lyikeererwa mmbo lyimanyikaa inda? Kilasheeva mmbo mukeererya efo uraatony kweni.
10Lyo dede kwiifo ngyunyanga shiingyi ulaniny, na nkwiifo lumwi lulamanyikye-fo. 11Naasa shanra shilamanya urango lwa unyanga elo mmbo shivaa sha nrung'ani kwa yeto akeerera, nawe yeto mwirera naveva nrung'ani kwakwa. 12Naakiwo neeni, mashika elyi mulangye nnu iwona simbo ta Mumuyo, langeny nnu deny itiwonisa naambo muvangise siri. 13Kimmba niindo yeto mwirera na kishomu kyeny natereve naidimi itambashwa. 14Mashika shatereva na kishomu kyeny, nrima mmbo watereva, lyo urango lwakwa llutiri ndunda-fo. 15A-mmbo kyavany inda? Mmbo shitereva na mumuyo, shivetereva na urango-da, mmbo nshiimbaa na ngata ya mumuyo lyo shiveimba na urango-da. 16Mashika kwatereva Iruva efo nriminy, yeto aiyo kava sha itondo mmbo ashidimaa inda yaamba Amen, kyeeri kumaa itereva, elyi nalaishi ekyo kwaamba? 17Mashika lyo n-dede yewe mmbo kwatereva nisha, lyo yeto ungyi nyavikyo mbora-fo. 18Mmbo shaana nnu Iruva mashika yeny mmbo shiishi fishomu shamwilannya yeni moose. 19Lyo kunu siriny mmbo shikunndye irera marero araanu nsi a urango, shiloshe nang'u vengyi, ngota elyi shereraa marero fiku ikumi.
20Vanavama, mulasheva sha vana vadu, lyo efo uraviny veny sha fikoku deny, lyo efo mirweny yaany veny vandu vaniini. 21Mmbo kyikee kyireiye efo uvavasony, mmbo shireraa na vandu yeva na kishomu kya vandu vengyi, na kana kya vandu veny, lyo nta mmbashitaa-fo. Niindo Nndumi aamba. 22Naasany, fishomu efi ni ngyende, nshi kwa yewo veerikkye-fo, lyo kwa yewo valairikkye. Lyo ilosha nshi kwa yewo valairikkye-fo lyo nkwa yewo vairikkye. 23Kyasiany, kwakooya siri shoose mmbo ikusanyirye ando amwi, na woose varere na fishomu fyeny, na yoo kweni vaange-u vandu valaishi kyeni na valakee vakristo, mulla ndesa mmbashambaa mmbo mutirwa ni ukwale? 24Lyo woose vakarera kyeelosha, numa naange-u nndu nalakee nkristo ao nalaishi kyeni, mmbo amanyisywa mmboose na asongosywaa mmboose. 25Filya akusarye efo nriminy mmbo fimanyikaa paa, nawe mmbo ashidimaa isanga neeni iindya Iruva, nafirye ndi deny, na iirikya sheelyi Iruva akee neeni kulaifo nyinyira.
26Kyasiany vanavama, mwalollya inda, Kyeeri mwakwanannya, yeto umwi atiri kiimbo neeto ungyi ufundo, ungyi kindo kyerambuya, ungyi ni kishomu na ungyi ni itambashwa fishomu. Findo fyoose fitanyike kyikee kya ivangisa siri. 27Kwakooya nndu ashereraa na kishomu kyeny, lyo varere vavii ao vararu-nsi, valailanyi-fo, na lyingyi kwa makamba, na umwi waany natambashwe. 28Kyaindi kwankooya kulaiyo nndu mwitambashwa naasa namalallye efo mmba ya Iruva narere na nrima wakwe muni na Iruva. 29Vakisuku nawo-da varere vavii ao vararu na umwi natambashwe. 30Kwakooya umwi wa valya vakee rembo arambuyo kindo ulya wa mbee namalallye mbele. 31Mashika yeni mmbo mushidimaa irera umwi umwi-nsi, naambo vengyi vakooye ikuloshau, na woose vaviiryo muu. 32Na mimuyo ya vakisuku mmbo iirikye vakisuku. 33Mashika Iruva nshi Iruva wa fulu-fulu-fo, mmbo akee wa ufoo; indo shaasa kyikee siriny toose ta vandu va Iruva.
34Vaka wo vamalallye efo mmba ya Iruva, mashika elyi valatiri mumu weerera. Vaindye shaasa uvavaso lwaambaye kyawo. 35Nawo vakankunda imanya kindo kyoose vavese womi vawo waarya efo kyeny kwawo. Mashika nsony nndu nka irera efo mmba ya Iruva. 36A ndesa kirero kya Iruva nkwany kyuukye? Ao mmbo kilemusheya yeni muveni?
37Nndu kakulollya mmbo akee nkisuku ao wa ngata ya mumuyo, navemenya efi shamuvia yaa, sheelyi ni Nndumi afivavasya. 38Lyo yeto akunda iva nrung'ani nave nrung'ani. 39Kimaruma kya efyo, vanavama, langeny nnu ilosha, lyo nta mulaimi kya irera na fishomu-fo. 40Lyo findo fyoose fitanyike kwiiyo umamiri na waarya.
S'ha seleccionat:
1 VAKORINTO 14: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.