Orubara 8
8
Etara n'ekinara kyazo
1Omukama akagambira Musa ati, 2“Ogambire Aroni oti, K'oragya kuhemba etara omushanju, ozakize mbali ekinara kyazo kilikuleba.” 3Aroni yakorakwo, yahemba etara ezo kwakiza mbali ekinara kyazo kyabaire kilebire, nk'okwo Omukama yahangiire Musa. 4Kandi ekinara kikaba kihesirwe kiti: Kyona kikaba kikozirwe omu zahabu kwema aha maguru kugoba aha matagi. Ekinara ekyo Musa akakikora omu ntwaza eyo Omukama yamuragiire.
Okweyeza n'okwezibwa kw'Abalevita
5Omukama akagambira Musa ati, 6“Oyahure Abalevita omu Baisiraeli, obeze. 7Orwo oraija kubeza ogire oti: Obamaisilire amaizi g'okubahasilira, buli omoi orumoiso rumurabe aha mubili gwona, bafure ebijwaro byabo, bere. 8Ahanyuma bakwate enumi y'ekigeto hamoi n'ekihongo ky'ensano nungi ekigigendaho, etabirainwe n'amajuta, naiwe oteho ekigeto ky'enumi aha rw'enyatano y'amafu. 9Abalevita obateke omu maisho g'Eihema ly'Omuterano, omare ohuruze enteko yona ya Isiraeli. 10Orwo oramara kuteka Abalevita omu maisho g'Eihema, Abaisiraeli babatekeho emikono. 11Aroni ahongere Omukama Abalevita abo, ekyo kihongo ky'Abaisiraeli ky'okuchunkeza, bate nibakolera Omukama. 12Ahanyuma Abalevita bate emikono aha mitwe y'enumi. Enumi ezo, emoi ogitambire Omukama aha rw'ekihongo ky'enyatano y'amafu, endijo ogimutambire aha rw'ekihongo ky'okwokibwa aha rw'okwatilira Abalevita. 13Abalevita obateho kuta nibahwera Aroni n'abatabani, obahongere Omukama ekihongo ky'okuchunkeza.”
14“Nikwo orayahura otyo Abalevita omu Baisiraeli, mara barabaga bange. 15Orwo oramara kubahura otyo, okabeza n'okubahonga ekihongo ky'okuchunkeza, batahe omw'Ihema bakore emilimo. 16Aha rw'okuba bahwirwe omu Baisiraeli, babera kimoi bange. Mberonkeire, balya omwanya gwa bakaigura nda, emizigaijo yona y'Abaisiraeli. 17Emizigaijo yona omuli Isiraeli eba yange, gwaba muzigaijo gwa muntu anga gw'ekitunganwa. Emizigaijo egyo nkagironka, kwema kiro ekyo naita emizigaijo y'Abamisiri. 18Abalevita mbahwire omu Baisiraeli, 19nabaha Aroni n'abatabani, kukolera Abaisiraeli omu Ihema ly'Omuterano n'okubatilira, Abaisiraeli abo batalija bakagoba ahatakatifu bakagwerwa ekibundo.”
20Musa na Aroni n'enteko yona ya Isiraeli bakora batyo Abalevita, nk'okwo Omukama yahangiire Musa kubakora. 21Abalevita bayejuma amafu, bafura n'ebijwaro byabo. Aroni yabahongera Omukama ekihongo ky'okuchunkeza, yabagilira n'enyatano y'okubeza. 22Ahanyuma bagya omw'Ihema kukora emilimo, bata kuhwera Aroni n'abatabani. Bakakora Abalevita okwo Omukama yahangiire Musa.
23Omukama akagambira Musa ati, 24“Ebi bikwete aha Balevita: Kubandiza aha b'emyaka 25 kutemba, abo babe nibo bata nibakora emilimo omw'Ihema ly'Omuterano. 25Kwema aha b'emyaka 50 abo eikora balilekere, batagendelera. 26Bakujuna Abalevita barumuna babo omu myoga yabo omw'Ihema ly'Omuterano, kyonkai ti bonene kuba nibo bakora myoga egyo. Abalevita obe nikwo obaha emyoga etyo.”
S'ha seleccionat:
Orubara 8: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.