Orubara 23
23
Balaamu naranga elya mbere
1Balaamu agambira Balaki ati, “Onyombekere aha ealutare mushanju, mara ompe enumi mushanju n'empaya z'entaama mushanju.” 2Balaki akora okwo Balaamu yagamba. Buli ealutare bombili bagitambiraho enumi emoi n'empaya y'entaama emoi. 3Balaamu agambira Balaki ati, “Yemelera aha rubaju rw'ekitambo kyawe ekyokize, inye ngende, rundi Omukama yakwija kumbona. Ekyo aranyoleka kyona kyona ndakikugambira.” Aho atemba aha ibanga eiguru. 4Balaamu agya abonangana na Ruhanga amugambira ati, “Natekateka ealutare mushanju, buli emoi nagitambiraho enumi n'empaya y'entaama.” 5Omukama atuma Balaamu ati, “Oshube ahali Balaki omugambire oti n'oti.” 6Balaamu agaruka ahali Balaki, amushanga ayemeleire aha rubaju rw'ekitambokye ekyokize hamoi n'abatwazi bona ba Moabu. 7Balaamu wenene abanza kugamba ati,
“Balaki onyihire Aramu,
Omukama wa Moabu anyihire omu mabanga g'oburugaizoba,
ati, ‘Ija ondaamire Yakobo,
ija onkeenere Isiraeli!’
8Nakuraama ntai owo Ruhanga ataraamire?
Nakukeena ntai owo Omukama atakeenire?
9Aha rw'okuba Yakobo nimulebera aha mabanga eiguru,
Isiraeli nimuleba nyemire aha mitwe y'enshozi.
Leba, ihanga elitwire lyonkai,
mara nibemanya okwo bali baberwa
kushaga amahanga agandi.
10N'ohai ayakubona baijukuru ba Yakobo akanguti?
N'erobo yonkai ya Isiraeli ebarwe ohai?
Nfe kyonkai nfe orufu rw'omurungi,
mpeleruke nk'omuntu akorage!”
11Balaki abaza Balaamu ati, “Wankoleraki? Nkulesire kundaamira ababisha bange, mbwenu leba toina kyo wakora shana okubaha omugisha!” 12Balaamu amuhorora ati, “Inye nsige kugamba ebyo Omukama alikundagira kugamba?”
Balaamu naranga elya kabili
13Balaki agambira Balaamu ati, “Ija tugende ahandi mbali orashobora kubabonera. Orabona abailiire haihi, tolikwija kubabona bona. Aho obe niho oyema kubandamira.” 14Amutwara omu kangaratete ka Zofimu, aha mutwe gw'Eibanga lya Pisiga. Ayombekayo ealutare mushanju, buli emoi yagitambiraho enumi n'empaya y'entaama. 15Balaamu agambira Balaki ati, “Yemelera aha rubaju rw'ekitambo kyawe ekyokize, ngye kulinya mbonangane n'Omukama.” 16Omukama abonangana na Balaamu, amugambira ebyo aragamba, ati, “Ogaruke ahali Balaki, oku obe nikwo omugambira.” 17Balaamu aija ahali Balaki, amushanga akyayemeleire aha kitambokye ekyokize, aina abatwazi ba Moabu. Balaki amubaza ati, “Omukama yakugambiraki?” 18Aho Balaamu ahorora ati,
“Balaki imuka, ohulire;
ontege amatwi, iwe mutabani wa Sipori
19Ruhanga ti muntu, kugir'oti yakubeiya,
kandi ti kashoke, kugir'oti yakwefuuhya.
Ebyo yagambiire talibikora?
Anga ekyamurugire kanwa talikigobesheleza?
20Leba, ndagiirwe kubaha omugisha,
Ruhanga agubahaire, tinakugubaka.
21Tiyabona kabi omuli Yakobo,
anga kubona Baisiraeli bamushengire.
Omukama Ruhanga wabo abasingiiremu,
nabo nibazina okwo Omukama niwe aba Mukama wabo.
22Ruhanga abaihire Misiri,
amani aina ag'embogo.
23Ow'okuroga Yakobo taliho;
taliho w'okutega Isiraeli ngisha.
Abantu baligamba ahali Isiraeli bati,
‘Ekyo Ruhanga yabakoleire!’
24Leba abantu abalikubanduka ahansi nk'entare enkazi;
nibabaratuka nk'entare enshaija,
tebyama hansi etakaliire bwite bwayo,
etakanyoire bwamba bwa bwite obwo.”
Balaamu naranga elya kashatu
25Balaki agambira Balaamu ati, “Orwo wayanga kubaraama, n'omugisha otagubaha n'akati!” 26Kyonkai Balaamu ahorora Balaki ati, “Tinkugambiire nti, ‘Byona ebyo Omukama aragamba nibyo ndaragirwa kukora?’ ” 27Balaki agambira Balaamu ati, “Mbwenu oije nkutware ahandi, rundi Ruhanga yakukunda oyemayo obandaamira.” 28Kityo amutwara aha katwetwe k'Eibanga lya Peori elyolekeraine n'Eirungu lya Yeshimoni. 29Balaamu agambira Balaki ati, “Onyombekere hanu aha ealutare mushanju, mara ompe enumi mushanju n'empaya z'entaama mushanju.” 30Balaki akora okwo Balaamu yagamba. Buli ealutare agitambiraho enumi n'empaya y'entaama.
S'ha seleccionat:
Orubara 23: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.