Orubara 10
10
Amakondere g'efeza
1Omukama akagambira Musa ati, 2“Oheshe amakondere gabili g'efeza. Orata kugatera kuhuruza enteko, n'okubamanyisa kukambura orusisira bakagenda. 3Orwo gombili garaterwa, Abaisiraeli bahurure bakugobe aha kishasi ky'Eihema ly'Omuterano. 4Kyonkai orwo lyaterwa eikondere limoi ely'okutatira, aho abebembezi, abakuru b'enganda za Isiraeli babe nibo bahurura bakakugoba. 5Orwo oratera eikondere ly'okutatira, ensisira ezili obugwaizoba zibandure. 6Orwo oratera eikondere ly'okutatira omurundi gwa kabili, ensisira ezili kasi zibandure. Eikondere ly'okutatira literwe kubamanyisa kababandura. 7Orwo eihanga lili ly'okuhurura, eikondere literwe kyonkai litaterwa ikondere lya okutatira. 8Abakuhani batabani ba Aroni batere amakondere ago kibe kiragoro ky'ebiro byona ahali inywe, amakiro gona kutera amakondere. 9Kamulirwana endashana omu nsi yanyu, kutera omubisha alikubema kubi, mutere enzamba kutatira abantu. Aho inye Omukama Ruhanga wanyu ndibajuna, mbakize aha babisha banyu. 10Kwakwo n'omu mashemelerwa: Aha biro bikuru byanyu ebiragiirwe n'aha kwema kw'okwezi, mutere amakondere orwo mulikutamba ebihongo by'okwokibwa n'ebihongo by'emilembe. Ebyo bilinsindika kubajuna. Inye ndi Mukama Ruhanga wanyu.”
Abaisiraeli nibakambura orusisira
11Aha kiro kya makumi gabili omu mwezi gwa kabili, guli mwaka gwa kabili Abaisiraeli barugire Misiri, ekichwi kiimuka aha kiikaro ekyo Omukama yabaire asingiiremu. 12Aho Abaisiraeli babanza kuruga mpora mpora omw'Irungu lya Sinai. Ekichwi kyemelera omw'Irungu lya Parani. 13Elyo limukya lyabo lya mbere orwo Omukama yahangiire atyo Musa. 14Ebendera y'orusisira rw'oruganda rwa Yuda niyo yaimukize mbere nk'okwo emitwe yabo yabaire eli. Eihe lyabo likaba nilikulirwa Nashoni eya Aminadabu. 15Eihe ly'oruganda rwa Isakari likaba nilikulirwa Netaneli eya Zuari. 16Eihe ly'oruganda rwa Zabuloni likaba nilikulirwa Eliabu eya Heloni.
17Orwo bamazire kusimbura ekiikaro, Abagerishoni n'Abamerari abakyetwekaga baimukya orugendo. 18Aho ahonderwaho ebendera y'oruganda rwa Rubeni. Bakasimbura kuhonderana n'emitwe yabo. Eihe lyabo likaba nilikulirwa Elizuri eya Shedeuri. 19Kandi eihe ly'oruganda rwa Simeoni likaba nilikulirwa Shelumieli eya Zurishadai. 20Eihe ely'oruganda rwa Gadi likaba nilikulirwa Eliasafu eya Deweli.
21Aho nirwo Abakohati bahondeireho, bashutwire ebintu ebitakatifu. Batakagobire, ekiikaro kikaba kyasimbirwe. 22Ebendera y'eihe ly'oruganda rwa Efuraimu eimukya kuhonderana n'emitwe yabo. Ayabaire nakulira eihe elyo ni Elishama eya Amihudi. 23Eihe ly'oruganda rwa Manase likaba nilikulirwa Gamalieli eya Pedazuri. 24Eihe ly'oruganda rwa Benjamini likaba nilikulirwa Abidani eya Gideoni.
25Ahanyuma ahonderwaho eihe ly'oruganda rwa Dani. Eihe eli nilyo lyagendaga enyuma y'amahe agandi gona niligalinda. Likaba nilikulirwa Ahiezeri eya Amishadai. 26Eihe ly'oruganda rwa Asheri likaba nilikulirwa Pagieli eya Okarani. 27Eihe ely'oruganda rwa Nafutali likaba nilikulirwa Ahira eya Enani. 28Orwo Abaisiraeli baimukyaga kugenda, emigendere yabo ekaba nebaho kuhonderana n'amahe gabo.
Musa nashaba ishezara kugenda nabo
29Musa agambira ishezara, Hobabu eya Reweli Omumidiani ati, “Nitwimukya kugenda omu nsi eyo Omukama yagambiire ati, ‘Ndigibaha.’ Mbwenu oije tugende hamoi; turakukolerage. Omukama akaraganisa Isiraeli ebirungi.” 30Kyonkai Hobabu ashubamu Musa ati, “Chei, inye tindikwija kugyayo okwo. Ndagaruka owaitu omu banyaruganda bange.” 31Musa amugira ati, “Ninkutagiliza otatusigaho. Nomanya okwo tulikwija kugenda nitusisira omw'irungu; mbwenu iwe twakugenzire notulebelera. 32Katuragenda hamoi naiwe, kyona kyona ekyo Omukama aratukolera, kyonene kyonene ekyo nikyo na ichwe turakolera iwe.”
33Kityo Abaisiraeli baruga Sinai, bagenda orugendo rw'ebiro bishatu, bebembeirwe Esanduku y'Omukama y'Endagano, nibahiga ensi y'okuturamu. 34Buli orwo bafururaga orusisira bwamushana bayebemberwaga ekichwi. 35Buli orwo Esanduku yaturukaga kugenda, Musa yagambaga ati, “Waitu Mukama osingire, imuka, ababisha behigire bugyo; abakunoba bairuke.” 36Orwo Esanduku yagyaga ahansi, agamba ati, “Waitu Mukama osingire, garukira embaga yawe enkuyanja ya Isiraeli.”
S'ha seleccionat:
Orubara 10: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.