Eby'abalevita 8
8
Okutendekwa kwa Aroni n'abatabani
(Oku 29:1-37)
1Omukama agambira Musa ati, 2“Otware Aroni n'abatabani, aha mulyango gw'Eihema ly'Omuterano, otware n'ebijwaro, amajuta g'ousiiga, n'enumi y'ekihongo ky'enyatano y'obufu, empaya z'entaama ibili, entukuru y'emikate etatumbisiibwe. 3Ahanyuma ohuruze enteko yona eterane aho.” 4Musa akora nk'okwo Omukama yamuhangira, enteko agihuruliza aha mulyango gw'Eihema ly'Omuterano.
5Agambira enteko egyo ati, “Ebyo ndikwija kukora nibyo Omukama yahanga.” 6Aleta Aroni n'abatabani, abaanabisa n'amaizi. 7Ajweka Aroni ekanzu, amukoma omuyondo, amujweka enyambarwa, amutaho n'efodi agimukomeranaho. 8Amutaho akendo k'aha kifuba, kandi omu kendo atamu Urimu na Thumimu#8:8 Urimu na Thumimu Babikozaga kuraguza, tibilikumanyikage.. 9Amujweka ekilemba omu mutwe, n'aha kilemba omu maisho atekaho orukinga rw'ezahabu, kalinda ntakatifu nk'okwo Omukama yamuhangiire.
10Aho Musa akwata amajuta g'okusiiga, agasiiga ekiikaro na byona ebyabaire bikilimu, abiha omugisha. 11Agandi agashaimulira alutare emirundi mushanju, na alutare agisiiga amajuta n'ebikwato byayo byona, orunabiro n'eichuba lyarwo, kubiha omugisha. 12Omutwe gwa Aroni agusheshaho amajuta, amukora amajuta amutendeka. 13Akwata batabani ba Aroni abajweka enyambarwa, abakoma emiyondo, abajweka ekofira za bituli, nk'okwo Omukama yabaire amuhangiire.
14Aho aleta enumi y'ekihongo ky'enyatano y'obufu; Aroni n'abatabani bagitaho emikono aha mutwe. 15Musa agiita, akwata obwamba abutesa orukumurwe aha mahembe ga alutare kugizingora, ahasilira alutare. Obwamba abushesha aha amaguru ga alutare, agiha omugisha, agihasilira. 16Akwata ebishaju byona ebyabaire bili aha mara, n'ekiteko ky'eine, n'ensigo zombili n'ebishaju byazo, Musa abyokeza ahali alutare. 17Kyonkai enumi n'oruhu rwayo n'enyama zayo n'efo yayo abyokesa omuliro enjai y'orusisira, nk'okwo Omukama yabaire amuhangiire.
18Aho aleta empaya y'entama y'ekihongo ky'okwokibwa, Aroni n'abatabani bagitaho emikono aha mutwe. 19Musa agiita, obwamba abushaimulira alutare kugizingora. 20Orwo empaya y'entama yachebachebwirwe, agyokya hamoi n'omutwe gwayo n'ebishaju. 21Kandi orwo yamazire kwogya amara n'ebilenge omu maizi, empaya y'entama yona agyokeza ahali alutare, kili kikaba kihongo ky'okwokibwa, akatachu akashemelera Omukama. Musa akakora ebyo Omukama yabaire amuhangiire.
22Ahanyuma Musa aleta empaya y'entama endijo, ey'eitendeka. Aroni n'abatabani bateka emikono yabo aha mutwe gwayo. 23Musa agiita, aihyaho obwamba bwayo abuteka aha mbarakutwi ya Aroni eya bulyo, n'aha kyara kishaija eky'omukono gwa bulyo, n'aha kyara kishaija ky'okuguru kwa bulyo. 24Baleta batabani ba Aroni, Musa abatekaho obwamba aha mbarakutwi za bulyo n'aha byara bishaija by'emikono yabo eya bulyo n'aha byara bishaija by'amaguru gabo aga bulyo. Obwamba ashuba abushaimulira alutare kugizingora. 25Aho akwata ebishaju, n'ebishaju by'eikira, n'ebishaju byona ebyabaire bili aha mara n'ekiteko ky'eine, n'ensigo zombili n'ebishaju byazo, n'ekirumbu kya bulyo. 26Omu ntukuru y'omukate gutatumbisibwe eyabaire eli omu maisho g'Omukama, aihyamu ekeki emoi etaina itumbyo, n'omukate gumoi ogwinamu amajuta, n'echapati emoi, abiteka aha bishaju n'aha kirumbu kya bulyo; 27Byona ebi abikwasa Aroni n'abatabani, babichunkeza omu maisho g'Omukama. 28Ahanyuma abibatora, abyokejanyia n'ekihongo ky'okwokibwa ahali alutare kili kihongo ky'eitendeka, akatachu akashemelera Omukama. 29Musa akwata enkoro agichunkeza omu maisho g'Omukama. Enkoro egyo y'empaya y'entama y'eitendeka gwabaga mushondo gwa Musa. Ebyo akabikora nk'okwo Omukama yabaire amuhangiire.
30Aho Musa akwataho amajuta g'okusiiga n'obwamba obwabaire buli ahali alutare, abushaimulira Aroni n'ebijwarobye, n'abatabani kwakwo n'ebijwaro byabo. Kityo Aroni n'abatabani n'ebijwaro byabo aba nikwo abakuza atyo.
31Musa agambira Aroni n'abatabani ati, “Muchumbire enyama aha mulyango gw'Eihema ly'Omuterano, mumare mugiliireho n'omukate oguli omu ntukuru y'ebihongo by'eitendeka, nk'okwo naragiire nti, ‘Eralibwa Aroni n'abatabani.’ 32Enyama erasigaraho n'omukate kwakwo mubyokese omuliro. 33Aha mulyango gw'Eihema ly'Omuterano mumareho ebiro mushanju, mutarugaho kuhika orwo ebiro by'okutendekwa kwanyu biragobelera, aha rw'okuba okubatendeka kuratwara ebiro mushanju. 34Nk'okwo byaba mbwenu, nikwo Omukama ahangire kabikorwa bityo kubagilira enyatano. 35Mwikare aha mulyango gw'Eihema ly'Omuterano ebiro mushanju kiro na mushana, nimukora eby'Omukama ahangire, mutaija mukafa; ahakuba nikwo mpangiirwe.” 36Aroni n'abatabani bakora ebintu byona eby'Omukama yahangiire omuli Musa.
S'ha seleccionat:
Eby'abalevita 8: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.