Eby'abalevita 4
4
Ebihongo by'okwatilira amafu
1Omukama agambira Musa ati, 2“Ogambire Abaisiraeli oti, K'omuntu wena wena alikora obufu atagendeleire kyona kyona omu by'Omukama yahezire, 3k'aliba ali mukuhani enkorwa majuta, akaba nikwo aletera atyo abantu entambara, aho aha rw'obufu bwo yakora atagendeleire ahongere Omukama enumi ento etaina kamogo kili kihongo ky'enyatano y'obufu obwo. 4Alete enumi aha mulyango gw'Eihema ly'Omuterano omu maisho g'Omukama, ateke omukonogwe aha mutwe gw'enumi egyo, amare agitire omu maisho g'Omukama. 5Omukuhani enkorwa majuta aihyeho obwamba bwayo abulete omw'Ihema ly'Omuterano. 6Omukuhani aibike orukumurwe omu bwamba obwo amare abushaimure emirundi mushanju omu maisho g'Omukama omu maisho g'orutimbe rw'Ahatakatifu. 7Obwamba obundi omukuhani arabutekaga aha mahembe ga alutare y'obunuma butamirane omu maisho g'Omukama omw'Ihema ly'Omuterano. Obwamba bw'enumi obusigaire abusheshega aha kibunu kya alutare y'ekihongo ky'okwokibwa aha mulyango gw'Eihema ly'Omuterano. 8Enumi y'enyatano y'obufu agiheho ebishaju byayo byona, orushaju rw'amara n'ebishaju byona ebili aha mara, 9n'ensigo zombili hamoi n'ebishaju ebiziliho omu nyugunyu, n'ekiteko ky'eine ekyo araihiranagaho n'ensigo 10(nk'okwo ebi bihwa aha numi y'ekitambo ky'emilembe). Omukuhani abyokeze ahali alutare y'ekihongo ky'okwokibwa. 11Kyonkai oruhu rw'enumi n'enyama yayo yona, n'omutwe gwayo, ebilenge byayo, amara gayo n'efo yayo, 12enumi yona agiturukye enjai y'orusisira agitware aha mwanya ogurungi, mbali eijwi lisheshwa, agyokye aha muliro gw'enkwi; eyokezibwe mbali eijwi lisheshwa.
13“K'enteko yona y'Abaisiraeli erakoraga obufu etamanyire kandi obufu bwonene butamanyikire mu maisho ga muterano gwonene mara okwo baina ebyo bakozire omu by'Omukama yatangire kukorwa, baliba baina entambara. 14Orwo obufu obwo balishangwa bakozire bulimanyika, omuterano guhonge enumi ento aha rw'enyatano y'obufu obwo bamare bagilete omu maisho g'Eihema ly'Omuterano. 15Abagurusi b'enteko bateke emikono yabo aha mutwe gw'enumi omu maisho g'Omukama, eitirwe aho. 16Aho omukuhani enkorwa majuta aleteho obwamba bw'enumi omw'Ihema ly'Omuterano. 17Abwibikemu orukumurwe abushaimure emirundi mushanju omu maisho g'Omukama omu maisho g'orutimbe. 18Obwamba obundi abuteke aha mahembe ga alutare eli omw'Ihema ly'Omuterano omu maisho g'Omukama; obusigaire abusheshe aha kibunu kya alutare y'ekihongo ky'okwokibwa aha mulyango gw'Eihema ly'Omuterano. 19Agihyeho ebishaju byayo byona abyokeze ahali alutare. 20Oku nikwo aragira enumi: Nk'okwo yagizire enumi y'enyatano y'obufu kutyo abe nikwo agir'atyo n'egi. Omukuhani abagilire enyatano nabo baragarulirwa. 21Ashohoze enumi enjai y'orusisira, agyokye nk'okwo yayokize eya mbere; kihongo ky'enyatano y'obufu aha rw'enteko.”
22“K'omutwazi arakoraga obufu atamanyire, akakora kyona kyona omu by'Omukama Ruhanga yatangire, aliba aina entambara. 23K'alimanyisibwa obufu obwo alishangwa akozire, ekihongokye alete empaya y'embuzi etaina kamogo. 24Agiteke omukonogwe aha mutwe mara agitire mbali baitira ekihongo ky'okwokibwa omu maisho g'Omukama; kihongo ky'enyatano y'obufu. 25Aho omukuhani araihisagaho orukumurwe obwamba bw'ekihongo ekyo ky'enyatano abuteke aha mahembe ga alutare y'ekihongo ky'okwokibwa, kandi obwamba bwayo obusigaire abusheshe aha maguru ga alutare y'ekihongo ky'okwokibwa. 26Ebishaju byayo byona byokeze ahali alutare, nk'ebishaju by'ekitambo ky'emilembe. Nikwo omukuhani aramugiliraga atyo enyatano aha rw'obufubwe, mara aragarulirwaga.”
27“K'omuntu wena wena kacheku arafakaraga atamanyire akakora kyona kyona omu by'Omukama yatangire aliba aina entambara. 28Orwo alimanyisibwa obufu obwo aliba afakaire, ekihongokye alete emburabuzi etaina kamogo, aha rw'obufubwe obwo aliba akozire. 29Ateke omukonogwe aha mutwe gw'ekihongo ky'enyatano, ekihongo ky'enyatano akitire omu mwanya gw'ekihongo ky'okwokibwa. 30Omukuhani aihisehoga orukumurwe obwamba bwayo abute aha mahembe ga alutare y'ekihongo ky'okwokibwa, kandi obwamba bwayo obusigaire abusheshe aha amaguru ga alutare. 31Ebishaju byayo byona bihyeho nk'okwo ebishaju biihwa aha bihongo by'emilembe, mara omukuhani abyokeze ahali alutare kirugwemu akatachu akanshemelera inye Omukama. Omukuhani aramukoleraga enyatano, aragarulirwaga.”
32“K'ekihongokye araletaga omwana gw'entama aha rw'ekihongo ky'enyatano y'obufu, aletega omuagazi enzira kamogo. 33Akiteho omukonogwe aha mutwe mbali baitira ekihongo ky'okwokibwa. 34Aho omukuhani aihisehoga orukumurwe obwamba abuteke aha mahembe ga alutare y'ekihongo ky'okwokibwa, obwamba bwakyo obusigaire abusheshe aha maguru ga alutare. 35Ebishaju byayo byona abihyeho nk'okwo ebishaju by'omwana gw'entama biihwa aha kitambo ky'ebihongo by'emilembe. Omukuhani abyokeze ahali alutare, eiguru y'ebihongo by'Omukama ebyokesibwe omuliro. Omukuhani amugilirega enyatano aha rw'obufu obwo arabaga akozire, aragarulirwaga.”
S'ha seleccionat:
Eby'abalevita 4: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.