Eby'abalevita 16
16
Ekiro ky'enyatano
1Orwo batabani ba Aroni bahongeire Omukama omuliro gulikuzira akabaita, 2Omukama agambira Musa ati, “Ogambire Aroni murumuna wawe ataziza kutaha mu mwanya gutakatifu omu rutimbe, omu maisho g'entebe y'obuganyizi eli aha sanduku, ataija akafa; aha rw'okuba ndabonekera omu kichwi eiguru y'entebe y'obuganyizi egyo. 3Ekiliho, Aroni atahe ati omu mwanya gutakatifu: Aije n'ebuguma y'enumi y'ekihongo ky'enyatano y'obufu n'empaya y'entama y'ekihongo ky'okwokibwa. 4Ajware enyambarwa ntakatifu ya kitani, n'esuruale ya bukondo, ayekome omuyondo gwa kitani, n'ekilemba kya kitani, ebi nibyo bijwaro ebitakatifu. Kwija kubijwara abanze ayoge. 5Omu nteko y'Abaisiraeli aihyemu empaya z'embuzi ibili z'ekihongo ky'enyatano y'obufu, n'empaya y'entama y'ekihongo ky'okwokibwa.”
6“Aroni ahonge enumi y'ekihongo ky'enyatano y'obufu aha rwa wenene, ayeyatilire wenene n'enjuye. 7Aho akwate embuzi zombili, aziteke omu maisho g'Omukama aha mulyango gw'Eihema ly'Omuterano. 8Aho Aroni atomelere embuzi zombili; eitomelera limoi ly'Omukama, eitomelera elindi lya Azazeli. 9Aroni alete embuzi eyatomelerwa ekaba y'Omukama, agihonge ekihongo ky'enyatano y'obufu; 10Kyonkai embuzi eyatomelerwa ekaba ya Azazeli eletwe nerora omu maisho g'Omukama kugigiliraho enyatano, ebone kutaishulirwa omw'irungu egye owa Azazeli.”
11“Aroni atambe enumi ekihongo ky'enyatano y'obufu aha rwa wenene, ayeyatilire wenene n'enjuye. Aite enumi ekihongo ky'enyatano y'obufu aha rwa wenene. 12Akwate ekyotezo ky'amakara g'omuliro aga alutare eli omu maisho g'Omukama n'ebikamato bibili by'obunuuma bilikunukage obuseirwe kurungi; akitahye omu rutimbe. 13Obunuma abuteke omu muliro omu maisho g'Omukama, nirwo omwika gulikwera gw'obunuma gurashweka entebe y'obuganyizi eli aha Sanduku y'Endagano, atalija akafa. 14Aihyeho obwamba bw'enumi, abushaimuze orukumurwe emirundi mushanju omu maisho g'entebe y'obuganyizi.”
15“Aho aite embuzi y'ekihongo ky'enyatano y'obufu ey'abantu, atahye obwamba bwayo omu rutimbe, abugire nk'okwo yagira obw'enumi; abushaimulire entebe y'obuganyizi eiguru n'omu maisho g'Esanduku y'Endagano. 16Nikwo arayatilira atyo omwanya gutakatifu aha rw'obuhagare bw'Abaisiraeli, n'aha rw'enshonga y'entambara zabo, amafu gabo gona; kutyo abe nikwo agilira atyo Eihema ly'Omuterano elili omu rusisira rwabo omu kuhagara kwabo. 17Hatakubamu muntu omw'Ihema ly'Omuterano orwo aratahamu kwatilira omwanya gutakatifu kuturuka orwo arashohora yamazire kugira enyatano aha rwa wenene wenene n'aha rw'enjuye n'aha rw'enteko yona ya Isiraeli. 18Aho ashohore aije alutare eli omu maisho g'Omukama agyatilire. Aihyeho obwamba bw'enumi n'obw'embuzi, abuteke aha mahembe ga alutare kugizingora. 19Agishaimulire obwamba nabushaimuza orukumurwe emirundi mushanju, agihasilire, agihyeho obuhagare bw'Abaisiraeli.”
Embuzi y'okwetweka entambara
20“Orwo Aroni araba yamazire kwatilira omwanya gutakatifu n'Eihema ly'Omuterano na alutare, alete embuzi elikurora. 21Ateke emikonoye yombili aha mutwe gw'embuzi elikurora, agigambireho ebibi byona by'Abaisiraeli n'entambara zabo zona, amafu gabo gona; abiteke aha mutwe gw'embuzi, agitaishulire omw'irungu agikwasize omuntu atekatekirwe. 22Embuzi erayetweka ebibi byabo byona egiire omw'irungu, abe niyo agitaishulira.”
23“Aho Aroni atahe omw'Ihema ly'Omuterano, ajure ebijwaro bya kitani ebyo yaba ajwete orwo yataha omu mwanya gutakatifu, abisigemu. 24Ayogere omu mwanya gutakatifu, ajware ebijwarobye, ashohore, ahonge ekihongokye eky'okwokibwa n'ekihongo ky'okwokibwa eky'embaga; ayeyatilire n'okwatilira embaga. 25Ebishaju by'ekihongo ky'enyatano y'obufu abyokeze eiguru ya alutare. 26N'ayataishulira Azazeli embuzi afure emyendoye amare ayoge, aho nirwo yakutaha omu rusisira. 27Kandi enumi y'enyatano y'obufu n'embuzi y'enyatano y'obufu eby'obwamba bwabyo bwatekwa omunda kugira enyatano omu mwanya gutakatifu, zishohozibwe enjai y'orusisira. Empu zazo n'enyama zazo n'amashai gazo byokesibwe omuliro. 28N'ogwo arabyokya afure emyendoye ashube ayoge, aho nirwo yakutaha omu rusisira.”
Enyatano ya buli mwaka
29“Kibe kiragiro ky'eirai lyona ahali inywe okwo aha kiro kya ikumi omu mwezi gwa mushanju, mweshase, mara mutakora mulimo, alikaba mutaka anga mwizi arabafurukiragamu. 30Aha rw'okuba kir'eki muragilirwaga enyatano kubahasilira; mwere omu maisho g'Omukama, muruge omu mafu ganyu. 31Ni Sabato nkuru y'ekyosi, nainywe mweshase, kiragiro ky'eirai lyona. 32Omukuhani enkorwa majuta mara atendekirwe kusikira ishe akore enyatano ajwete ebijwaro bitakatifu bya kitani. 33Ayatilire ahatakatifu, ayatilire n'Eihema ly'Omuterano na alutare, kandi ayatilire n'abakuhani n'abantu bona b'enteko. 34Eki kiraba kiragiro ahali inywe eirai lyona. Abaisiraeli batilirwe limoi omu mwaka aha rw'amafu gabo gona.” Musa akora nk'okwo Omukama yamuhangira.
S'ha seleccionat:
Eby'abalevita 16: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.