Eby'abalevita 1
1
Ebitambo eby'okwokibwa byona
1Omukama ayeta Musa amugambira ayemire omw'Ihema ly'Omuterano ati, 2“Ogambire Abaisiraeli oti, Orwo omuntu wena wena omuli inywe araleteraga Omukama ekihongo, mwihye ebihongo by'ebitunganwa omu buhyo bw'ente anga obw'entaama.”
3“K'ekihongokye kirarugaga omu buhyobwe kili kihongo ky'okwokibwa, ahonge enumi etaina kamogo. Agihongere aha mulyango gw'Eihema ly'Omuterano nirwo alibona kukundwa omu maisho g'Omukama. 4Ateke omukonogwe aha mutwe gw'ekihongo ky'okwokibwa, nirwo kiraikilizibwa kuba kitambo ky'okumwatilira amafu. 5Aho aite enumi egyo omu maisho g'Omukama; kandi batabani ba Aroni abakuhani balete obwamba, bamare bagishaimulire alutare kugizingora, alutare eli aha mulyango gw'Eihema ly'Omuterano. 6Aho omuhongi abage ekihongo ky'okwokibwa, akigutaguture ebichweka. 7Batabani ba Aroni omukuhani bahembe omuliro ahali alutare, bagutekehoge enkwi. 8Bazitembekehoge ebichweka ebyo n'omutwe n'ebishaju. 9Kyonkai amara n'ebilenge byayo omuhongi abyogye n'amaizi, agyokye yona ahali alutare kili kihongo ky'okwokibwa, kyokibwe omuliro. Akatachu k'ekitambo eki kanshemelera inye Omukama.”
10“K'ekihongo ky'okwokibwa kirarugaga omu buhyo bw'entaama anga bube bw'embuzi, ahonge empaya etaina kamogo. 11Agitire rubaju orwa bikara rwa alutare omu maisho g'Omukama. Obwamba bwayo batabani ba Aroni abakuhani babushaimulire alutare kugizingora. 12Agigutaguture ebichweka, n'omutwe gwayo n'ebishaju byayo, kandi omukuhani abitekege aha nkwi zilikwaka omuliro ahali alutare. 13Kyonkai amara n'ebilenge abyogye n'amaizi. Kandi omukuhani agihonge yona, agyokeze ahali alutare. Ekyo kihongo ky'okwokibwa; akatachu kakyo kanshemelera inye Omukama.”
14“K'ekihongokye eky'alikuhongera Omukama kiraba kili kihongo ky'okwokibwa eky'ebinyonyi, aho alete entungurumaiba anga obwiba buto. 15Aho omukuhani akilete ahali alutare, akihotoreho omutwe amare akyokezeho. Obwamba bwakyo bugelere aha rubaju rwa alutare. 16Eirokezo n'ebishanda byalyo alihyeho alinage aha rubaju rwa alutare oburugaizoba mbali bateka eijwi. 17Akyasize omu mapapa gakyo kyonkai atakitaishurana. Omukuhani akyokeze ahali alutare, aha nkwi zilikwaka omuliro; kakili kihongo ky'okwokibwa kyokesibwe omuliro. Akatachu kakyo kanshemelera inye Omukama.”
S'ha seleccionat:
Eby'abalevita 1: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.