Obwijukiro 2
2
Emyaka ebili omw'irungu
1“Aho tukwata omuhanda tugenda omw'irungu twolekeire Enyanja Rutuku, nk'okwo Omukama yabaire angambire. Tukamara ebiro bingi nitutera oku n'oku omw'ibanga lya Seiri. 2Aho Omukama angambira ati, 3‘Muteire oku n'oku omu mabanga omwanya gurai ogwo nigumara; mbwenu mwolekere bikara. 4Ragira abantu oti, Mwaija kuraba omu nsi ya barumuna banyu batabani ba Esau abalikutura omuli Seiri; mara nibaija kubatina. Aho muramanya, 5mutakurwana nabo, okuba tindikwija kubaha nsi yabo yona yona, nangu n'ak'ekilenge kulibataho chei aha rw'okuba nkaha Esau Eibanga lya Seiri k'alilya. 6Murabaguraho ebyakulya mulye; nangu mubagureho n'amaizi munywe. 7Mwijuke okwo Omukama Ruhanga wanyu ahaire emilimo yanyu yona omugisha. Abalinzire orwo mulikuraba omw'irungu eli elihango; emyaka makumi 40 egi Omukama Ruhanga wanyu atura nainywe, timukaburwaga kantu.’ 8Aho barumuna baitu batabani ba Esau abalikutura omuli Seiri tubaraba harai, n'omuhanda gwa Araba ogulikuraba Erati na Eziongeberi tugutantara.”
“Tukwata omuhanda tugendera kimoi omw'irungu lya Moabu. 9Omukama angambira ati, ‘Otakubuyanisa Bamoabu anga kurashana nabo okuba tinkuheho niakake nsi yabo k'ogitwara, aha rw'okuba ekigo kya Ari nkakiha batabani ba Loti.’ 10Eirai haturwagamu Abaemimu, abantu b'amani, bangi mara barai nk'Abaanakimu. 11Nabo betwa Barefaimu nk'Abaanakimu, kyonkai Abamoabu babeta Abaemimu. 12Abahori kwakwo eirai baturaga Seiri, kyonkai batabani ba Esau bakagibanyaga, babaita, baba nibo bagituramu nk'okwo ahanyuma Abaisiraeli bagizire ensi eyo balire ey'Omukama yabahaire. 13‘Kityo mwimuke mushabuke akaiga ka Seredi.’ Tukashabuka. 14Kwema orwo twarugire Kadeshibarinea kugoba orwo twashabukire akaiga ka Seredi ekagoba emyaka 38 kuhika orwo abaisherukare bona ab'omuzarwa ogwo bafire bakahwa omu rusisira nk'okwo Omukama yabaire abahayire. 15Akaguma abatamirwe, yabaita yabamara omu rusisira.”
16“Aho orwo abaisherukare bona babaire bafire, 17Omukama angambira ati, 18‘Iwe kir'eki orabe omu kigo kya Ari oruge Moabu. 19Kandi orwo muragoba omu nsi y'Abaamoni otakubabuyanisa anga kurwana nabo; okuba tinkuheho n'akake nsi yabo. Enshonga nkagiha baijukuru ba Loti aba.’ 20Egyo nayo nemanyika okwo eli nsi y'Abarefai. Eirai nibo bagituragamu. Abarefai abo Abaamoni babetaga Abazamizumimu. 21Bakaba bali bantu b'amani mara bangi, kandi baraibarai nk'Abaanaki. Kyonkai Omukama akabasilikya, Abaamoni bagibaihyamu, baba nibo bagituramu. 22Akabakora okwo yakozire Abahori, ensi yagiha Abaedomu baijukuru ba Esau, nibo bagituramu kuhika kir'eki. 23Kandi Abaavimu abaturaga omu byaro kulemwa kugoba Gaza, Abakafutori abarugire Kafutori, bakabaita baba nibo baturamu. 24‘Mwimuke mugende, mushabuke Oruhanga rwa Arinoni. Leba, Sihoni Omuamori, omukama wa Heshiboni, namunaga omu mikono yawe n'ensi ya wenene, mubanze kugilya kandi murashane nawe. 25Kwema kir'eki abantu bona omu nsi yona ndabatamu obutini, bakutine. Abarahulira eiranga lyawe barachundwa, bahahanwe emyoyo aha rw'enshonga yawe.’ ”
Abaisiraeli nibasinga omukama Sihoni
(Orub 21:21-30)
26“Aho kwema omw'irungu lya Kedemoti, nkatuma entumwa ahali Sihoni omukama wa Heshiboni ziina ebigambo by'emilembe ningamba nti, 27‘Ondeke ndabe omu nsi yawe; ndatwarwa omuhanda gwonkai, tindikwija kugurugamu. 28Oranguza ebyakulya by'okulya n'amaizi g'okunywa; ekisigaire ondeke ndabemu n'amaguru, 29nk'okwo Abaedomu baijukuru ba Esau abatura Seiri n'Abamoabu abatura omu kigo kya Ari bangilire, ndemwe nshabuke Yorudani ngye omu nsi ey'Omukama Ruhanga alikwija kutuha.’ 30Kyonkai Omukama Sihoni tiyatujubwire kuraba mu nsiye, okuba Omukama Ruhanga wanyu akamugumanganisa omwoyo n'omutimagwe yamugiza eikuru abone kumunaga omu mikono yanyu, leba kugoba na kir'eki ensiye eli omu mikono yaitu. 31Omukama akangambira ati, ‘Leba, nabanza kukuha Sihoni n'ensiye; banza kugilya nirwo oragituramu.’ 32Aho Sihoni ashohora n'abantube bona kuturashanisa omuli Yahazi. 33Omukama Ruhanga waitu amutuha, tumusinga, n'abatabani n'abashaijabe. 34Omu kanya kalinya tukakwata ebigobye byona, twasilikya limoilimoi buli kigo, abashaija, abakazi n'abana; titwasigireho n'omoi ayahungire. 35Ebitunganwa byonkai nibyo twanyagire hamoi n'ebintu eby'omu bigo ebyo twakwete. 36Kwema Aroeri eli aha rukunakune rw'Oruhanga rwa Arinoni n'okwema omu kigo ekili omu ruhanga kulemwa kugoba Gileadi, hakaba hathaliho kigo ekiraikirai muno ahali ichwe. Omukama Ruhanga waitu akabinaga byona omu mikono yaitu. 37Ensi ya baijukuru ba Amoni bonkai niyo mutagobire, nikwo kugamba kuti, ebisa by'omwiga gwa Yaboki n'ebigo by'amabanga na hona hona mbali Omukama Ruhanga waitu yatutangire.”
S'ha seleccionat:
Obwijukiro 2: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.