Obwijukiro 15
15
Omwaka gwa mushanju
(Eby 25:1-7)
1“Aha nzindo ya buli myaka mushanju ogarulirega ab'olikutonga. 2Emigarulilire niy'egi: Buli muntu ahozire ondijo, eky'ahozire akitaishure; atakitonga mutahiwe anga murumunawe Omwisiraeli, aha rw'okuba Omukama naba arangire kutaishura amabanja. 3Omunyamahanga ogwo wakumutonga; kyonka murumuna wawe k'araba ina eibanja lyawe olileke otalimutonga. 4Omukama alibaha omugisha omu nsi eyo mulikuturamu. Thaliho Mwisiraeli alinakwara. 5K'olihulira eiraka ly'Omukama Ruhanga wawe, okegendeleza kukwata emihango egi yona eyo ndikukuragira kir'eki, omugisha ogwo oligubona. 6Omukama Ruhanga wawe alikuha omugisha nk'okwo yakuraganisize. Olihora amahanga gangi kyonkai iwe otalyehoza. Olitwara amahanga gangi kyonkai iwe tigalikutwara.”
7“Omu kyaro kyawe kimoiho omu nsi ey'Omukama Ruhanga wawe alikukuha, kahalibamu Omwisiraeli wanyu omunaku, otaligumanganisa mutima gwawe, anga kwima murumuna wawe omunaku. 8Oikilize omujune, omuhore ebigaine obwetagebwe, n'orwo kyakuba kintuki. 9Oyelinde otalitekeleza aha mutima okagamba oti, ‘Omwaka gwa mushanju ogw'okugarulira amabanja guli haihi,’ aho murumuna wawe omunaku okamuleba kubi okanga kumuhora. K'alitakira Omukama nakukeena, olikwatwa omushango. 10Omuhore obuzira kumutonga, mara otamuha nogurubana, Omukama aije ahe omugisha emilimo yawe yona. 11Abanaku tibalihwa mu nsi; aha rw'ekyo ninkuragira nti, obumbuturulire murumuna wawe ekiganja; omwetage n'omunaku omu nsi obajune.”
Amateka g'abairu
(Oku 21:1-11)
12“Kabalikuguza murumuna wawe Omuheburania anga Omuheburaniakazi, akukolere emyaka mukaga, kyonkai omu gwa mushanju omutaishure egende bwegelere. 13Mara otalimutaishura akagenda ngaro zishai; 14omugilire ekisha, omulebere omu buhyo bwawe bw'entaama, aha rwano rwawe, n'omw'ijungiro lyawe ly'edivai. Okw'Omukama Ruhanga wawe aliba akuhaire omugisha obe nikwo omuha. 15Olijuka okwo wabaire oli mwiru omu nsi ya Misiri, n'okwo Omukama Ruhanga wawe yakuchungwire. Aha rw'ekyo ninkuragira ntyo kir'eki. 16Kyonkai k'alikugambira ati, ‘Tindikwija kukurugaho,’ aha rw'okukugonza n'omuntungo gwawe aha rw'okuba nimwikaranwage, 17aho olikwata empindu omufumure okutwi ekuturukirane ekwate omu rwigi; abe atyo mwiru wawe ebiro byona. Omuzana wawe nawe omugilire otyo. 18Ekyo kitalikugumira. Orwo olimutaishura kugenda bwegelere, kuba aliba yakukoleire emyaka mukaga, aliba asaine emperwa y'omukozi emirundi ebili. Kityo eby'orakoraga byona Omukama Ruhanga wawe alibiha omugisha.”
Omuzigaijo n'ekizigaijo
19“Emizigaijo y'obunumi n'obupaya obulizarwa omu buhyo bwawe obw'ente n'obw'entaama, olibuhongera Omukama Ruhanga wawe. Omuzigaijo gw'ekitunganwa kyawe otaligukoza mulimo, kandi omuzigaijo gwawe gw'entama otaligushara bwoya. 20Ogulye n'omutungo gwawe omu maisho g'Omukama Ruhanga wawe buli mwaka aha mwanya ogw'Omukama alironda. 21Kyonkai kaguliba gwina akamogo, gulemaire anga guhumire, anga gwinai akamogo kona kona ak'amani, otaligutambira Mukama Ruhanga wawe. 22Oguliire omu ka yawe. Omuntu ahagaire n'atahagaire kumoi, yakugulya nk'okwo yakubaire eli njobe anga nyemera. 23Ekiliho otaliguliirana na bwamba bwagwo; obusheshe ahansi nk'amaizi.”
S'ha seleccionat:
Obwijukiro 15: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.