Obwijukiro 13
13
1“K'omurangi alitabuka omuli inywe, anga omurosi w'ebiroto, akakuha akabonero anga ekitangazo, 2mara akabonero anga ekitangazo kikaija kikabaho, k'aligamba ati, ‘Tuhige baruhanga abandi,’ ab'otamanyaga, ‘mara tubafukamire,’ 3otalihuliliza bigambo bya murangi ogwo anga omurosi w'ebiroto ogwo, aha rw'okuba Omukama Ruhanga wawe naba nakulenga nka nomugonza n'omutima gwawe gwona n'omwoyo gwawe gwona. 4Muhondere Omukama Ruhanga wanyu, mumutine, mukwate emihangoye, muhulire eirakalye, mumufukamire, mara mumugumeho. 5Kyonkai omurangi ogwo anga omurosi w'ebiroto ogwo aitwe kuba aliba abegesize kushenga Omukama Ruhanga wanyu ayabaihire Misiri, akabachungura omu bwiru, kubasigisa ebyo yabaragiire kamukora. Nikwo mulitana mutyo n'ekinyamunuge ekyo.”
6“Murumuna wawe, omwana wa nyoko, anga mutabani wawe, anga muhara wawe, anga mukazi wawe omugonzibwa wawe, anga munywanyi wawe fanfe, k'alikulengesa omu kyama nagamba ati, ‘Tugende tufukamire baruhanga abandi,’ abo iwe anga basho batamanyaga, 7baruhanga abandi ab'amahanga agabataine, anga agabali harai muno, 8otalimwikiliza anga kumuhulira. Otalimushasibwa kumuganyira, otamuleka anga kumusheleka, 9shana omwite. Omuli bona abalimwita obe wa mbere. 10Omuteze amabare afe aha rw'okuba aliba ahigire kukwihya aha Mukama Ruhanga wawe, ayakwihire Misiri omu bwiru. 11Abaisiraeli bona balihulira ekigambo ekyo batine, mara tibalikora kinyamunuge ekyab'eki.”
12“Omu kigo kyawe kimoiho omu by'Omukama Ruhanga wawe alikukuha kuturamu, 13k'olihulira okwo omuli inywe harugirwemu abantu babi bakahabisa abanyakigo nibagamba bati, ‘Tugende tufukamire baruhanga abandi,’ abo otamanyaga 14aho obaze omanyuruze, mara obaze n'obwegendeleza; kagaraba galikwo mazima okwo ekihemu nk'ekyo kikozirwe omuli inywe, 15mazima oite abanyakigo abo obaise embanda, ekigo okisilikize kimoi; bona abakilimu n'ente, obaise embanda. 16Eminyago yakyo yona ogishombokeze omuli nyarubuga, oshube oyokye ekigo hamoi n'eminyago yakyo nk'okwo bokya ekitambo ky'okwokibwa eky'okutambira Omukama Ruhanga wawe. Ekigo ekyo kiliba ntumiro y'amatongo eirai lyona. Tikilyombekwa rundi. 17Omu bintu ebihagaire mutalisigazaho na kimoi eky'okwikara nakyo. Nirwo Omukama atalibanigalira; abagilire ekisha n'embabazi, abakanyise nk'okwo yaraganisize bashw'enkurw'inywe. 18Kamulihulira eiraka ly'Omukama Ruhanga wanyu mukakwata emihangoye yona eyo ndikubaragira kir'eki mukamukolera ebirungi, ebyo byona bilibaho.”
S'ha seleccionat:
Obwijukiro 13: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.