Zacarias 8
8
Ja Dyosi, oj sk'ul bendisiar ja schonab'ili
1-2Ja Dyos it jel ja yipi, cho yala kab' ja lo'il iti:
—Jel niwan ja syajal jk'ujol yuj ja swinkil ja Jerusaleni;
cho jach' jastal jaw jel niwan ja koraja
sok ja skontra'e jumasa.
3Pero oj ni cho kumxukon b'a oj ajyukon sok ja ye'nle'a,
sok oj sb'i'iluk Chonab' jel toj;
pilan majke ti oj cho ajyukon b'a snajtsil tsomjel,
jaxa wits Sioni, oj sb'i'iluk —wits mi kwalkyera'uk—.
Ke'n Dyos yuj ja israelenio,
ja jas wax kala yujni jach' oj k'u'l merana.
4-5—Ja b'a skaye'il ja chonab' Jerusaleni
oj b'ob' tajnuke ja yal keremtik sok yal ak'ixuk jumasa,
sok oj b'ob' jijluke ixuke sok ja winike jumasa ma'tik ay xa sk'ujole'i,
ja oj b'ob' yipuke jas najb'ate'e'i.
Ke'n Dyos yuj ja israelenio,
ja jas wax kala yujni jach' oj k'u'l merana.
6—Yaj nix k'ot ja k'ak'u jawi,
ja ma'tik oj kan sak'ani
oj yal'e' ja iti, mi meranuk,
sok ja ke'n mini jas mi oj b'ob'uka.
Ke'n Dyos yuj ja israelenio,
ja jas wax kala yujni jach' oj k'u'l merana.
7—Ke'n oj kolta ja jchonab'il
b'a niwak chonab' jumasa b'a spunto wax jak sok b'a wax och ja k'ak'u,
8sok oj ni ka kumxuke b'a Jerusalena.
Ye'n mero jchonab'ile',
sok ke'n Dyosone,
jun Dyos jel toj sok jel lek.
Ke'n Dyos yuj ja israelenio,
ja jas wax kala yujni jach' oj k'u'l merana.
9-11—Ja we'nlexi, a wabyexta ni ja kab'al
it wax yalawe ja kaluman Dyos jumasa'a,
man yora och ja b'ajtan ton
ja yora k'e tojb'esxuk ja snajtsil ja jtsomjeli.
Ja'yuj, —tsatsal k'ujolan a b'ajex—
—Yora k'e tulxukyi stojb'esjel ja snajtsil ja jtsomjeli
mix tupxi ja a'tijum jumasa
sok mix a'xiyi swa'el ja chante jumasa;
yuj ja smul ja kontra'al jumasa
mi ma' xb'ob' b'eyuk ek' gusto,
sok spetsanile wax tiro'aniye amokex.
Pero mixa jach' oj kil jastal jaw
ja ma'tik oj kan sak'ani.
Ke'n sDyoson ja israelenio,
ja jas wax kala yujni jach' oj k'u'l merana.
12-13—Swinkil chonab' Juda—
—chonab'il israelenio—
Ja we'nlexi, wajyex ja b'a niwak chonab' jumasa
ja swinkil ja niwak chonab' jumasa jawi,
mini t'un yilawex leka,
ke'nxani oj jkoltayexa
jaxa ora jawi, jel xani lek oj ja wil'exa.
Gusto lek oj ja ts'un wa walajexi,
jaxa b'a yaljil ja ts'usub'i,
jel oj ajyuk ja sati;
ja satk'inali oj sjekon ja awasero
jaxa lu'umi jel tsamal oj ajyuk ja sb'a'ali.
Spetsanil ja jawi, we'nani oj ka'wi'exa,
ja ma'tik oj kananik sak'ani.
Ja'yujil, —tsatsal k'ujolan a b'ajex—
14-15—Swinkil jumasa b'a chonab' Juda sok b'a Jerusalen:
Ja ma' ek' paxta a wujilexi,
jel ya'we tajkukon;
ja'yuj, mi jtalnan sya'ulalile jch'aya sna'jele.
Jaxa we'nlexi, mi lom la xiwyex,
ja yan jel lek oj kil'ex.
Ke'n Dyos yuj ja israelenio,
ja jas wax kala yujni jach' oj k'u'l merana.
16—Ja jmandar jumasa ja iti:
Tola bida alawik ja smeranili,
Le'awik smodo'il jastal laman oj ajyanik,
mok ma' a wil'ex ch'in.
17Mok a chap a b'ajex sok jastik b'a kistal
b'a oj ja wil'ex kontra wa mojex jumasa,
mok a le'ex lom smul ja wa mojexi,
porke spetsanil ja jaw jumasa minix k'ana'a.
Ke'n Dyos yuj ja israelenio,
ja jas wax kala yujni jach' oj k'u'l merana—.
18-19Ja Dyos it jel ja yipi cho yala kab' jastal iti:
Swinkil jumasa chonab' Juda:
gusto ajyanik yuj ja laman ayex merani.
Ja jachuki, jel tsamal oj ajyanik
yaj ni oj ja komo wa wa'elex ja b'a schanil ixawi,
b'a sjo'il, b'a sjukil sok b'a slajunili.
—Lajan sok komo yuj k'in ayex—
20-21—Jel jitsan oj jakuk ja swinkil ja niwak chonab' jumasa,
sok oj ek' sk'utstala'uke tuktukil chonab'
ti oj yal'e yab' ja kristyano jumasa:
Le'awik ja slekil sk'ujol ja Dyosi:
Jach'ni ja ke'ntikoni oj ni cho jle'tikona.
Ke'n Dyos yuj ja israelenio,
ja jas wax kala yujni jach' oj k'u'l merana.
22-23—Yaj nix k'ot ja k'ak'u jawi,
jel jitsan ja swinkil ja niwak chonab' jumasa b'a jel niwak ja ya'tele'i
oj jakuke b'a Jerusalen b'a oj sk'an'e ki
b'a oj talna sya'ujlale.
Lajune winike oj sle'e jun judio,
oj syam'e yi ja sk'u'i
ti oj yalwe yab' sok tuk k'umala:
—Kax mojtayotikon ja b'a Jerusaleni—
—Wax na'atikon ti'ni ay amokex ja Dyos ja we'nlexa—
—Ke'n Dyos yuj ja israelenio,
ja jas wax kala yujni jach' oj k'u'l merana—.
S'ha seleccionat:
Zacarias 8: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021