Zacarias 14
14
Ja b'a stik'anili, ye'nani oj sk'ul ganar ja Dyosi
1-2Swinkil chonab' Jerusalen, Ti'xa jakum ja k'ak'u jastal yalunej ja Dyos oj ch'ak tsom spetsanil ja swinkil ja niwak chonab' jumasa, b'a oj jak tiro'anuk a mokex. Oj snol k'ab'ukex oj ni sb'ajukexa; oj ch'ak yi'e spetsanil ja jas ay b'a wa najexi, b'a kaye ti oj spil sb'aje'a. Ja wa wixukilex jumasa oj st'en'e lu'um oj yixtala'uke, snalan lek ja janek' a wi'oj ja kristyano jumasa oj ch'ak yi'e b'a pilan niwan chonab' jumasa, jaxa we'n jel T'usan ja ma' oj kanuk a moki.
3-4Yaj nix k'ot ja k'ak'u jawi, ye'n mismo ja Dyos oj tiro'anuk sok ja swinkil ja niwak chonab' jumasa jawi. Ti oj stojb'es ja lugar b'a oj ajyuk ja tiro'anel b'a wits Olivos, ja lugar iti, tey b'a lado spunto wax jak ja k'ak'u yuj ja Jerusaleni. Ja wits jawi, oj spil sb'a chab'e, oj tojb'uk kan jun niwan loman yaman, oj k'ot man b'a spunto wax jak ja k'ak'u sok asta man b'a spunto wax mukxi ja k'ak'u. Jun snalan ja witsi, ti oj kan b'a lado k'e'el k'inal, jaxa otro snalani, ti oj kan b'a ko'el k'inal. 5Ja Dyosi, jach' oj sk'ul jastal iti, ja'yuj ja ti oj b'ob' a pak ex ajnel b'a snalan ja we'nlexi, porke ja loman yaman iti, oj k'ot man b'a chonab' Asal. Jach' oj ja pak'ex ajnel jastal ja yora nijki ja lu'um ja yora ye'n mandaranum ay ja Ozias b'a Juda. Tsa'an ti'xa oj jakuk ja Dyos sok spetsanil ja yanjel jumasa.
6-7Ja k'ak'u jawi, mi kwalkyera'uka, porke mi tukuk ja sat k'ak'u sok ja k'ik'inal b'a a'kwali, asta ja yoj a'kwal oj lijpuk ja yijlab' ja k'ak'u. —Kechan ye'n ja Dyos wa sna'a jastal oj ajyuk ja k'ak'u jawi— 8Ja'yuj b'a chonab' Jerusaleni oj el jun niwan ja' mini nunka oj tupuka. Ja ja' jawi oj ni yi yok ja b'a stiempo ja'i, cho jach'ni ja b'a stiempo kwaresma; snalan ja ja' jawi, ti oj waj b'a Mar it mix nijki, jaxa otro snalani, ti oj waj b'a niwan paman ja' Mediterraneo.
9Yaj nix k'ot ja k'ak'u jawi, kechan altiro jun Dyos oj sk'ul mandar b'a spetsanil ja lu'umi. —Ja Dyos jawi, ja'ni ja Dyos kujtiki—. 10-11Man b'a k'e'el k'inal asta man ko'el k'inal, spetsanil ja niwan chonab'i oj sutxuk jun niwan lajan lugar. Kechan ja chonab' Jerusaleni, ti'ni oj ajyuk b'a syax k'ula, sok spetsanil ja jastal ayi, jach'ni oj ajyuka, ja jastal ja niwan pwerta sb'a Benjamini sok ja pwerta b'a schikini, cho jach' ja cha'anil ts'akab' ton b'a Hananel sok b'a wa snolo ja jastik sb'aj ja mandaranumi. Ja swinkil jumasa ja chonab' jawi, jel gusto oj ajyuke, porke mixa ma oj sch'ak pilan majke.
12-13Jaxa Dyosi, oj ni ya stup ja smul ja niwak chonab' jumasa ma' nol k'ab'ine ja chonab' Jerusaleni. Jel oj ka' och sxiwele, ye'nle ita mismo oj ka k'e'uke tiro'anel; —Jach' sak'an aye oj k'a'uk jas b'ak'tele'i, ja sate sok ja yak'e'i— 14Ja'yuj ja swinkil ja chonab' Juda oj jakuke b'a Jerusalen b'a oj tiro'anuke sok ja swinkil ja niwak chonab' jumasa jawi, sok oj sjap e yi jitsan oro sok sakal tak'in, sok jitsan k'u' wexal. 15Ja Dyosi, oj ni cho ya stup ja smul ja kawu jumasa, ja cameyo sok ja burro jumasa, sok spetsanil ja chante jumasa tey ja b'ay ja kontra jumasa.
16-19Mas tsa'an yuj ja iti, ja ma'tik och snol k'ab'uk ja swinkil ja Jerusaleni sok kanye' sak'an oj jakuke b'a chonab' Jerusalen kada jab'il b'a oj jak stoy'e' ja mandaranumtiki, ja'ni ja Dyos it jel ja yipi, sok ja'ni b'a oj k'u'laxuk ja sk'inil ja lejchupat jumasa. Jaxa chonab' Egipto, ma ay pilan chonab' mi oj jakuk ja b'a Jerusaleni, ja Dyosi, mi oj ya ya' ja' ja b'a niwak chonab' jumasa jawi, b'a jach' oj ya stup ja smuli.
20-21Yaj nix k'ot ja k'ak'u jawi, spetsanil ja jas ayi kechan ye'n sb'aj altiro ja Dyos it jel ja yipi, sok kechani ye'n oj makunuk yuj ja. —Asta ja schijchil ja kawu jumasa oj och senya b'a ti' oj na'xuk sb'ajni ye'n ja Dyosi— kechan ye'n sb'aj ye'n ja Dyos ja niwak tasa jumasa it makuni b'a altari, ja oxom jumasa it wax makuni b'a cosina b'a snajtsil tsomjel, sok spetsanil ja oxom jumasa kanel b'a Jerusalen sok b'a Juda. Ja kristyano jumasa ma' oj waj b'a snajtsil tsomjel b'a oj waj ya'we ja majtanali, ja oj yawe makunuk ja oxom jumasa jawi. B'a jach' mixa ma' oj yal sb'aj ye'n ja jastik ay b'a snaj ja Dyos it jel ja yipi.
S'ha seleccionat:
Zacarias 14: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021