Zacarias 10
10
Ja Dyosi, yala jel lek oj yil ja schonab'ili
1Ja Dyosi, ti cho yala'a:
—Ke'n Dyos yuj ja israelenio.
K'anawiki awasero b'a stiempo kwaresma
jaxa ke'n oj ni ka ja tsatsal awasero'a.
Ke'na wax tojb'es ja tsatsal ik' jumasa
sok ke'n wax ka ya' sb'a'al ja alaj jumasa.
2Jaxa k'u'lub'al dyos jumasa kechan wax lo'laniye;
ja k'intanum jumasa ja jas wax yalawe'i, mi meranuk.
Was lo'laye ja kristyano jumasa sok ja swayiche'i,
maklan a wil ja jas wax yalawe'i,
mini wax ya' kulan jk'ujoltika.
—Ja'yuj ja we'nlexi, ch'ayelni ayexa,
jach' ayex jastal jun nole chej b'a mey tanuman—
3—Ke'n Dyos yuj ja israelenio,
sok oj ni ka stup ja smule ja talna chej jumasa jawa
jel tajkelon yujile sok ja ye'nle'i.
Ke'n mismo oj talna ja kuntikili.
Ja judio jumasa ja juts'in lajane sok jastal jun nole chej,
jelxa mojan oj ch'ak ka paxuke
jastal kawu b'ax lijpixta wajum b'a tiro'anel.
4B'a yojol ja ye'nle'i ay ma' el mas niwak ja ya'tel oj ajyuk
b'a oj skoltaye ja kuntikil jumasa;
ja ye'nle'i, ja lajane sok yestaka'il ja karpa,
jach' jastal ja pulte wa sts'a'a najat ja sni'i,
—Jach' jastal ja ton it ye'n mero wax ya'a yip ja na'itsi—
5Jachuke jastal ja soldado jumasa b'a jel tsatse
wax tiro'aniye b'a yoj lokoki;
wax tiro'aniye sok ja soldado jumasa ma' kajane kawu
sok oj ni sk'u'luke ganar ja tiro'anela,
porke ti'ni oj aykon soke'a.
6—Ke'n Dyos ja israelenio,
sok wax makla ja jas wa sk'anaweki ja kuntikili.
Ke'n oj ka lek yipe ja swinkil ja chonab' Juda
sok oj koltane spetsanil ja israelenio jumasa;
oj ch'ak ka kumxuke b'a slugare ajyi,
lajan sok yuj mini nunka oj kil'e menosa
porke oj je'yi'e ja syajal k'ujoli.
7—Jel gusto oj ajyuke ja israelenio jumasa
jastal jel gusto wax ajyi ja soldado jumasa
kwando jel xa yu'aje'ta ja ya'lel ts'usub'i;
yaj nix cho yila ja yuntikile ja jastal iti,
jel ni oj cho gusto'axuke ja ye'nle
yuj ja jas oj k'u'luk yi'e ja ye'nle'i.
8—Yaj nix je'a yi'e ja senya,
oj pay'e' cho oj ni jtsom jb'aj soke'a;
jaxa yajni jkoltayeta,
jel oj ka pojxuke
jach'ni jastal ja tiempo ek'ta.
9Ke'n ch'ak ka wajuke saktantan ja b'a niwak chonab' jumasa,
jaxa ti'xa aye tiwi ti sna'awone'a,
sok oj ni kumxuke ja b'a mero slu'ume'a
smoj jb'aje sok ja yuntikile oj ch'ak kumxuke.
10—Oj ka kumxuke b'a Egipto sok b'a Asiria,
ti oj ka ajyuke b'a Galaad
sok b'a lado slujmal ja wits Libano;
ja yaj nix waj kumxuke'i, jel jitsane
ja spetsanile'i, mi oj sta' b'a oj ajyuke'a.
11Cham k'ujol lek oj ek' sk'uts'e ja ja' b'a mari,
pero ke'n oj ka laman ja jastal wa spuk'tsin sb'aji
sok oj ka takjuk ja niwan ja' Nilo;
—Ke'n oj ch'ak yi ja yip ja swinkil ja Egipto,
sok oj ka tek'an ja smalo'il sk'ujol ja swinkil ja Asiria—
12Ke'n oj ka sta' lek yip ja jchonab'ili,
sok ja b'i'ili, oj b'ejyuke sok mini t'un oj xiwuke'a.
Ke'n Dyos yuj ja israelenio,
ja jas wax kala yujni jach' oj k'uluka.
S'ha seleccionat:
Zacarias 10: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021