Mateo 13
13
Ja senya lo'il yuj ja inati
(Mr 4:1-9; Lc 8:4-8)
1Ja k'ak'u jawi, el ja Jesús b'a na'its ajyi, ti waj b'a sti' paman ja' b'a Galilea, ti och kulana och sje' ja yab'al ja Dyosi.#13:1 Yuj ja jastal och kulan ja Jesús sje'a ja yab'al ja Dyosi. K'ela jas wax yala b'a snota'il ja kapitulo 5: 1. 2Yuj ja jel jitsan k'ot ja kristyano jumasa, ja'yuj waj k'e' b'a jun barco b'a ti och kulan b'a och sje' ja yab'al ja Dyosi. Jaxa kristyano jumasa ti ch'ak kanuke tek'an b'a sti' ja'.
3Ja Jesusi, jel jitsan jastik sje'a sok senya lo'il, ja lo'il wax yala ay jas wax ya slaj sb'aj sok. Ti yala ja jsenya lo'il iti:
4—Jun a'tijum b'a alaj wa sts'unu sat trigo, jaxa yajni wa'nxa sts'unjeli, ay inat ko' b'a yoj b'ej. Tsa'an t'usan jak ja yal chan jumasa stulu ele.
5—Ay inat ti ko' b'a yoj ton jel t'usan ja lu'um ja tiwi. Juts'in el ja yal trigo, yuj ja mi jel pimuk ja lu'umi. 6Jaxa yal trigo jumasa jawi, mi alb'i yuj ja mey b'a oj sts'un sb'aj ja yechi, yajni jak ja sk'ixnal ja k'ak'u, ch'ak sts'ik el yuj sk'ixnali.
7—Jaxa tuk inati, ay b'a ko' b'a yoj k'i'ix. Yajni k'i' ja k'i'ix jumasa, mi b'ob' ya k'i'uk ja trigo, skomo sk'i'el.
8—Ay inat ti ko' b'a lekil lu'um, jel tsamal ajyi ja sati. Ay b'a ya'a jo' tajb'e (100) ja sati, ay b'a ox tajb'e (60), ay b'a jun tajb'e sok lajune (30).
9—Jaxa we'nlexi, ta yuj k'a waxa wabyex k'inali, maklayik lek ja jas oj kal a wabyexi—.
¿Jasyuj ja sok senya lo'il was je'a ja Jesusi?
(Mr 4:10-12; Lc 8:9-10)
10Jaxa sneb'uman ja Jesusi, ochye jan mojan sok, ti sjob'owe yi'a:
¿Jasyuj ja sok senya lo'il waxa je'a yi ja yab'al ja Dyos ja kristyano jumasa b'a?
11Ti alji yabye yuj ja Jesusi:
—Ja we'nlexi, oj je'a wi'ex ja jas nak'an ay ja b'a wa sk'ulan mandar ja Dyosi, jaxa tuk jumasa mini oj je'yi'e'a. 12Ja ma' wa sna'a t'usan ja jas mix na'xi b'a kulan k'ot ja Dyosi, oj a'juk yi b'a jel ja jas oj sna'i. Jaxa ma mini t'un wa sna'a ja jas mix na'xi b'a wax ajyi kulani, ja t'usan wa sna'a ojni a'ji ch'ay sk'ujol yuj ja Dyosi. 13Ja ke'n wax je'a yi ja kristyano jumasa ja yab'al ja Dyosi, sok senya lo'il; jachuk a'nima wa'ne ilwanel, mini jas wax yilawe'a, a'nima wax yabye k'inal, mini jas wax yabye sb'eja. 14Ja'yuj ti wax k'ot smeranil sok ye'nle ja jas alji yab' yuj ja Dyos ja aluman Dyos Isaiasi:
Ja it jumasa
a'nima wa smaklaye,
mi jas wax yabye sb'ej;
a'nima wax ilwaniye,
mi jas wax yilawe.
15Mi ja sneb'awe, mi jas wax ek' sk'ujole',
man was muts'u ja sate b'a mi oj k'elwanuke'i,
wa smaka ja schikine b'a mi oj yabye k'inali.
Lek wanuk stukb'es sb'aje'i,
oj yabye sb'ej ja kab'ali,
oj stukb'es ja smodo'e'i,
—Jaxa ke'n ojni jkoltaye'a—.
16—Jaxa we'nlex yuj ja jneb'umanexi, jel lek wax yilawex ja Dyosi, yuj ja waxa wilawex k'inali sok waxa wabyex sb'ej ja kab'ali. 17Jitsan aluman Dyos sok jitsan kristyano wa sk'ana oj yil'e ajyi ja jas a wilawex sok ja jas a maklanex ja we'nlexi, jasa, mi b'ob' yil'e.
Ja Jesusi, yala ja sb'ej ja senya lo'il b'a inati
(Mr 4:13-20; Lc 8:11-15)
18—Maklayik lek, oj kal a wabyex ja sb'ej ja senya lo'il sb'a winik a'tijum b'a alaji. 19Ay chab' oxe ma' wa smakla jastal wa'n sk'uljel mandar ja Dyosi, yuj ja mix yabye sb'eji ti wax jak ja tan pukuji, wax jak a'ji ch'ay sk'ujole. Ja iti, ja wa slaja ja inat ko' b'a yoj b'eji.
20—Ja inat ko' b'a yoj toni, ja wa slaja ja ma' wax yab' ja smandar ja Dyosi, jel juts'in wa sk'u'ane sok jel tsamal wax yabye, 21yuj ja mix yabye lek sb'ej ja ab'al jawi, ja sgusto'e'i mix alb'i. Yajni wax jak ja swokole'i, ma yuj mix kisji ye yuj ja lom wa sk'u'ane ja Dyosi, tsa'an wax ch'ay sk'ujole ja yab'al ja Dyosi.
22—Ja inat it ko' b'a yoj k'i'ixi. Ja wa slaja ja ma' yab' ja yab'al ja Dyosi, sok mix ya'a sb'aje b'a oj stukb'es ja jastal aye yuj ja ab'al jawi. Kechan ita ja wa'n ek'el sk'ujole ja jas oj makunuk yujile sok ja jastal jel oj sta'e ja jastik sb'aje'i.
23—Jaxa inat it ko' b'a lekil lu'umi, ja wa slaja ja ma yab' ja yab'al ja Dyosi, sok ja ma' wax yab' lek sb'eji. Ja it jumasa wanix sutxi meran ja sk'ujole'a, jaxa jas wa sk'u'lane'i, toj lekni'a. Ja ye'nle'i, ja' wa slajawe ja inat it wax ya'a jo' tajb'e (100), b'a ox tajb'e (60), b'a jun tajb'e sok lajune (30) sat b'a jujune sni'i—.
Ja k'ul sok ja lekil inati
24Ja Jesusi, cho yala pilan senya lo'il:
—Ja b'a wa sk'ulan mandar ja Dyosi, ja lajan sok ja jastal ek' yuj jun winik waj sts'un lekil inat b'a yalaji. 25Yajni nakaxa wa'ne wayeli, ti waj ja ma' mi lek wax yila sb'aje soki, waj sts'un k'ul b'a yojol ja lekil inati, tsa'an ti'xa waja.
26—Yajni waj ya' sat ja trigo, ti yila ja a'tijum jumasa, ay sokan sok k'ul ja lekil inat jumasa. 27Ti wajye ja man b'ay ja swinkil ja alaji, ti yalwe yab'a: Kajwal, toj lekil inat a ts'unu b'a wa walaj tak, ¿Jasyuj ja cho k'i' ja k'ul b'a?
28—Jaxa swinkil ja alaji, ti yala'a: Ja jawi ja sts'unu ja ma' mi lek wax kila jb'aj soki.
—Ja a'tijum jumasa ti sjob'owe'a: ¿Lek maxa wila ja oj waj jotstikon ja k'ul jumasa jawi?
29—Ti alji yabye yuj ja swinkil ja alaji: —Miyuk— Yuj ja trigo sok ja k'uli june'xta, lek xa jotsowex ja trigo sok ja k'ul b'a. 30Tix k'i' chab'il lajana. Yajnix waj ajyuk ja jach'oji, ojxa jna'tik sb'a ja trigo cho ojni ja k'uli. Ja jachuki ojxa b'ob' jek ja a'tijum b'a oj jak sjots e' b'ajtan ja k'uli, oj ya'we b'usan ti oj stsik e'a. Tsa'an oj stsom'e ja sat trigo ti oj yi'e och b'a snajtsil kuj—.
Ja b'ak' mostasa
(Mr 4:30-32; Lc 13:18-19)
31-32Ja Jesusi, cho yala pilan senya lo'il:
—Ja smandar ja Dyosi, ja oj slaj jastal ja sb'ak' ja mostasa. Jel yal ch'in ja inat iti, yajni oj sts'un ja swinkil ja alaji, niwan te' wax k'i'i, yujni jel niwan wax k'i' ja ye'n yuj ja tuk inat jumasa'a. Niwan te' wax k'i'i, ja yal chani, wax b'ob' sk'u'l soj ja b'a sk'ab' jumasa—.
Ja levadura
(Lc 13:20-21)
33Ja Jesusi, cho yala ja senya lo'il iti:
—Ja smandar ja Dyosi, ja oj slaj jastal ja arina. Jun ixuk oj k'a ya och t'usan levadura b'a arina, ja t'usan jawi wax ya poxuk ja arina—.
Ja Jesusi, sk'u'lan ja jas yalunej jun aluman Dyosi
(Mr 4:33-34)
34Ja Jesusi, jach' ch'ak sje'yi jastal it spetsanil ja kristyano jumasa, sje'a sok senya lo'il, ay jas ya slaj ja jas sje'a'i, kechani jastal jaw sje'a ja yab'al ja Dyosi. 35Ja Kajwaltik Jesusi, jach' ya k'ot smeranil ja jas yala ja aluman Dyos ja najate, ti yala'a:
—Oj kal yab' ja kristyano jumasa
sok senya lo'il,
oj kal yabye ja jas
nak'an ay yuj ja Dyos
man stojb'es ja lu'umi—.
Ja Jesusi, yala ja sb'ej ja senya lo'il sb'a k'uli
36Ja Jesusi, ti ya'kan tiw ja kristyano jumasa, waj b'a na'its ja ye'n. Jaxa sneb'uman jumasa, ti waj sjob' e yi'a:
—Ala kab'tikon ja sb'ej ja senya lo'il sb'a k'ul it el b'a alaji.
37Ti alji yabye yuj ja Jesusi:
—Ja ma' wa sts'unu ja lekil sat trigo ke'nani ja yuninon ja winika. 38Ja lu'umi, ja slechanal ja lu'um iti, jaxa lekil sat trigo ja' spetsanil ja ma wa sk'u'an ja smandar ja Dyosi. Jaxa k'uli, ja ma' wa sk'u'an ja yab'al ja tan pukuji, 39ja ma' ye'n ch'ak sts'un ek' b'a spetsanil ja lu'um iti. Ja sk'ak'uil ja jachoji, ja k'ak'u oj sk'el ja Dyos b'a lek sok b'a mi lek b'a stik'anali, jaxa a'tijum matik oj jachulanuki, ja anjel jumasa. 40Yajni oj ch'ak sk'el ja Dyos spetsanil ja mulal jumasa, ja k'ak'u jawi ja oj sjots ja k'ul b'a oj stsiki. 41Ja ke'n ja yuninon ja winiki, oj jek ja kanjel jumasa, b'a oj ch'ak ya'we eluk ja b'a'yon ja ke'n spetsanil ja ma mi jas lek wajel sk'ujol'ei, yuj ja ye'n wax cho st'enawe ja tuk jumasa b'a oj sle' smule. 42Ja jaw jumasa, ti oj ch'ak sjip'e yoj k'ak' ja anjel jumasa, ja tiwi, jel oj ok'uke yuj ja swokole'i, oj sk'ux ja yeje'i. 43Jaxa ma'tik wa sk'u'ane ja yab'al ja Dyosi, oj a'ji lijpuke ja b'ay ja Dyos jach' jastal wax lijpi ja k'ak'u. —Jaxa we'nlexi, ta yuj k'a jaman meran ja wa chikinexi, maklayik ja it b'a, xchi ja Jesusi.
Ja tak'in nak'ani
44—Ja smandar ja Dyosi, ja lajan sok ja tak'in mukub'al b'a lu'umi. Ay k'a ma' sta'a k'ote, wax cho snak'a kani; tsa'an jel gusto waji, waj schon spetsanil ja jas yi'oji, b'a oj sman ja lu'um ja b'ay ja tak'ini, b'a jach' ye'n oj yi'kan ja tak'in jawi.
Ja tsamal ujali
45—Ja smandar ja Dyosi, ja lajan sok ja ma' jel sna'a smanjel ujal b'a mas leki. 46Yajni wa sta'a jun ujal b'a mas leki, wa schono spetsanil ja jas yi'oji, ja wa smana ja ujal jawi.
Ja enub' b'a ya'jel el chayi
47—Ja smandar ja Dyosi, ja lajan sok ja enub' b'a ya'jel el chayi. Ja yama chay jumasa, wa sjipa ja yenub' b'a yoj niwan paman ja'i, wax ya'we el chikan jas tik'e chayil. 48Yajni wax b'ut' ja yenub'e'i, ti wax ya'we el b'a sti' ja', wax ochye kulan wa spilawe b'a lek sok ja b'a mi lekuki. Ja lekil chay jumasa wa snolowe b'a jun mo'och, jaxa b'a mi lekuki, wa sjipawe kani. 49Jach' oj ek' jastal jaw ja yajnix k'ot ja stik'anali: Ja anjel jumasa oj ch'ak spil' ja b'a lek sok ja b'a mi lek ja kristyano jumasa. 50Spetsanil b'a mi leki, ti oj ch'ak sjip'e b'a yoj k'ak', jaxa tiwi jel oj ok'uke yuj ja syajal ja swokole'i, oj sk'ux ja yeje'i—.
Ja yajk'achil sok b'a mixa lekuki
51Ja Jesusi, ti sjob'o yi ja sneb'uman jumasa:
—¿Ja we'nlexi, wan a maxa wabyex sb'ej spetsanil ja jas wa'non sje'jeli?
Jaxa ye'nle'i, ti yalawe'a:
—Wa'n, wax kab'tikon sb'ej.
52Ti alji yabye yuj ja Jesusi:
—Spetsanil ja je'a niwak mandar jumasa, ta wan k'ax sutxi ja sk'ujol wa sk'u'an oj ochuk ja b'a wa sk'ulan mandar ja Dyosi, ja lajan sok ja winik wax waj b'a na'its b'a nolan yuj ja jastik sb'aji, ay b'a yajk'achil sok ay b'a mixa lekuk ja jastik wax ya' eluk ja tiwi.
Ja Jesusi, waj b'a Nazaret
(Mr 6:1-6; Lc 4:16-30)
53Yajni ch'ak sje' ja Jesús ja senya lo'il jumasa iti, ti'xa el ja tiwa. 54Yajni k'ot ja b'a schonab'ili, ti'xa k'e sje' ja yab'al ja Dyos b'a snajtsil tsomjeli. Jaxa kristyano jumasa, jel cham k'ujol aye, sok ay ma' yala: —¿Ja winik iti, b'a' jel sneb'a ja jastik jumasa wa sna'a? ¿Jastal wax b'ob' sk'u'luk ja milagro jumasa jawi?—.
Jaxa tuki, ti wax cho yalawe'a: 55—Ja' Jesusi ja yunin ja Jose kalpintero tak—. Ja snan ja Maria, jaxa smoj alijel jumasa, ja Santiago, ja Jose, ja Simon sok ja Judasi. 56Ja swats jumasa, ti aye ili. ¿Jastal ay ja Jesús ja jel wa sna'a jastal oj sk'u'luk ja milagro b'a?—.
57B'aya mini june ja ma' ti ajyiye tiwi, mi sk'u'ane ja jas sje'a ja Jesusi. Ja'yuj ti yala ja ye'n: —Jun aluman Dyos jel tsamal wax ilji ja b'a tuk chonab'i, jaxa b'a schonab'il ye'n, minix k'anji, cho jach'ni sok ja swinkil snaji—.
58Mix k'u'aji yuj ja kristyano jumasa, ja'yuj mi sk'u'lan jitsan milagro ja b'a chonab' jumasa jawi.
S'ha seleccionat:
Mateo 13: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021