’Yeta 8
8
Sauloni kanisa inzazuri
1 #
’Yeta 7:58; 11:19; 22:20 O’du nderisi inzata amboru eca kanisa ovupi Yerusalemuari vu; yi dria ere yi nzu angu Yudiari pi ma alia, Samaria pie, kiri ’ba ti opele ’diyi aceni. 2#Mat 14:12’Ba Mungu rupi ’diyi sa Setefanoni ra, yi owu eri tu. 3#’Yeta 22:4-5; 9:1; 26:9-11Te Saulo inza ’ba kanisani ’diyi tu, erini firia jo vusi dria agupi osezu okuyi be, yi o’bezu arujoa.
E’yo bari oluzu Samariaari
4’Ba ’diyi yini yi ereria, yi mu e’yo bari oluzu. 5#’Yeta 6:5Filipo si aku amboru Samariaaria, eri olu yi dri Kristo’i. 6’Ba ongulumuru yi ka e’yo Filiponi oluleri eri ra, ka tali erini ’yele ’diyi ne ra, yi a’i e’yo erini oluleri asi alusi. 7#Mar 16:17A’disiku orindi onzi fu ’ba kakau ma aliasi oyuzu o’duko urusi; azini ’ba kakau azo yayaani be ’diyi, azini ’ba acozaru ’diyi be, yi ma rua ati ra. 8#Yoh 4:40-42Ayiko amboru tu ovu aku nderi ma alia.
9Agu alu runi Simoni, eri oku ’ba andri ndripiri, eri fe ’ba Samariaa ’diyini osuzu tu, kini i ojou amboni. 10Te yi dria eri e’yo erini, engazu anzisi cazu ’ba ’wara vu, kini. Agu ’diri eri okpo Munguni omvele Ambori’i. 11Te yi eri e’yo erini a’disiku ewu kakau eri fe yi osu tu andri ndriza inirisi. 12#Mat 28:19Te yi ka e’yo bari suru Mungunirini Filiponi olule yi tia ru Yesu Kristonisiri a’i ra, yi bi baputizi, agupi azini oku. 13Te Simoni’i, eri a’i alu indi, azini erini baputizi biria ’bo eri ebi i Filipo be ’dani. Erini eceta luria tali amboru ovupi ’yezaru ’diyi be, eri osu tu.
14 #
’Yeta 3:1
’Ba ti opele Yerusalemua ’diyi ka eri kini ’ba Samariaa ’diyi yi a’i e’yo Munguni ra, yi nga Petero pi ma ti pe yi vu Yohana be. 15Yi ka si cazu ’dale ’bo, yi nga Mungu zi yi dri yi ma a’i Orindi Alatararu ani; 16a’disiku eri ’deni nga yi dria aluni ku, te yi bi nga kiri baputizi ru Opi Yesunisi a’dule. 17#1 Tim 4:14Awa’dini etu ’dasi yi ti dri yi dria, yi nga di Orindi Alatararu a’i ani. 18Te Simoni ka ndre Orindi Alatararu ovu fezaru yi dri ’ba ti opele ’diyini dri tile yi driarisi, eri le silingi fe yi dri, 19’yozu kini, Emi fe okpo ’diri ma dri alu indi, ’ba dria mani dri tile drinia ’diyi ma isu Orindi Alatararu indi beni. 20Te Petero ’yo eri tia, Dahabu miniri ma ja dri mi be, mini egale mi eco feta Munguni isuzaru silingisirisi! 21#Zab 78:37; Efe 5:5Te e’yo mini, kani esele mini e’yo ’dori ma alia aluani yo, asi minirini ovule kililiru Mungu ma milia kurisi. 22Mi oja di asi mini e’yo onzi mini ’dirisi, mi zi Opi tia ka eco ra eri ma wu e’yo onzi asi miniari ani. 23#Azi 29:18; Isa 58:6; Ebra 12:15Te ma ne ra, mi ovu oji drazaru be mi alia, azini mi ovu ombezaru e’yo onzi ma alia. 24Simonini e’yo omviria, eri ’yo ra, Mi zi Opini ma dri indi, ’dini e’yo nde mini ’yole ’diyi aluni kazu ’dezu ma dria ku beni.
25’Ba ti opele ’diyi ka e’yo eti nze, azini ka e’yo Opini olu ’bo, yi da dri vile Yerusalemua; yi olu e’yo bari wakaka aku Samariaa ’diyi ma alia.
Filipo pi ’ba Etiopiani be
26Te malaika Opini ’yo Filipo tia kini, Mi nga, mi mu angu uruleruria, cazu geri engapi Yerusalemua sipi Gazaaria. Angu nderi rokoni. 27#Isa 56:3-7Eri enga, eri mu ra. Mi lu, ’ba nzele ranyaru engapi Etiopiaa, azi ngapi Kandake opi okuru Etiopiaari dri lonyi erini ma ta mbazuri, eri mu Yerusalemua Mungu inzizu. 28Erini emviria eri ri gari ini akanyani seleniri ma alia, buku nabi Isayani lazu. 29Orindi ’yo Filipo tia, Mi si ogogo mi ecizu gari ’dari be. 30’Dini Filipo nzu di eri vu, eri eri erini buku nabi Isayani laria. Eri zi tinia kini, Mi va e’yo mini laleri ra ya? 31#Yoh 16:13Eri nga ’yo ra, ’Ba ka efini ece ma dri ku, ma eco vazu ngoni ngoni ya? Eri le Filipo ma tu ri i be. 32#Isa 53:7-8Te pari e’yo sizani erini laleri eri di: Ekile kabilo ’bani jile lilerile, ekile kabilomvani ovule ndi ’ba ’bikoni lipiri ma driliarile, ’dini eri zini i tile ku.
33’Bani drinza feria eri dri, yi nde eri e’yo lizasi ra.
A’dini nga ori’ba erini ma e’yo eceni ya?
Yini idri erini nzele nyakua rarisi.
34Agupi ranyaru ’di nga e’yo omvi Filipo tia kini, Ma zi mi tia, nabi ’yo e’yo ’diri a’di ma dria ya, kani i ma ngulupi ma e’yoni ya, kani ’ba azini ma e’yo ya? 35Te Filipo zi i tile, ’ba e’yo ece pari te erini buku lazuria, olu Yesu eri tia. 36#’Yeta 10:47Te yini muria geria yi eca yi tia, agu ranyaru teri kini, Mi lu, yi eri indi ’do! A’di oga mani baputizi bizuni ya? 37Filipo kini, Mi ka a’i asi driasi ra, mi eco baputizi bizaru ra, Eri nga e’yo omvi kini, Ma a’i Yesu Kristoni Mungu ma Mvi’i. 38Eri azi gari ma so pa ci, azini yi iri tro nga esi va fi yia, Filipo pi ’ba ranyaru be, eri fe di baputizi eri dri. 39#1 Opi 18:12Yini furia yiarisi Orindi Opini ’du Filiponi ra; agu ranyaru ’diri neni eri dika ku, te eri mu geri inia ayikosi. 40#’Yeta 21:8, 9’Ba, yi isu Filiponi Azotoa, te erini agaria ’dale eri olu e’yo bari aku dria ma alia cazu kpere Kaisariaa.
S'ha seleccionat:
’Yeta 8: LB66
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Lugbara © United Bible Societies, 1966.