’Yeta 1
1
Orindi Alatararuri ma e’yo azizuri
1 #
Luk 1:1-4
Waraga oko mani sileri ma alia, Teofilo, ma ece e’yo dria Yesuni e’dole ’yele azini imbale 2#Luk 6:13ecazu kpere o’du erini tuzu ururia ’diyi; de nga eri tuni ku eri fe azita Orindi Alatararusi ’ba erini ti opele ’diyi dri oko. 3’Ba nde ’diyi dri eri ece i ngulupi idriru candi ini nyaleri ma vutia, eceta adaru karakarausi, i ecezu ’ba nde ’diyi milia o’du kali su e’yo suru Mungunirini oluzu. 4#Luk 24:49; ’Yeta 10:41; Yoh 15:26Te yini yi okuria tualu eri be eri fe yi dri azita kini yi ma nga Yerusalemuasi ku, te yi ma te aziza Atani; Aziza nde, eri kini, emini ndra erile ma vu ’bori; 5#Mat 3:11; Mar 1:8; Luk 3:16; Yoh 1:33te ada Yohana fe ndra baputizi yisi, te ace o’du were emi nga baputizi a’i Orindi Alatararusi.
Yesuni tuzu ’buari
6 #
Luk 24:21; ’Yeta 3:21 E’yo ’disi yi ka yi oku tualu, yi zi eri tia kini, Opi, mi curu’do Israeli dri suru opini omvi ra ya? 7#Mar 13:32Eri omvi e’yo yi tia, ’Di e’yo emini yo, ewu kani eli Atani pele ovuzu okpo ini ma alia ini lelerile ’diyi nizu. 8#Mat 28:19; Mar 16:15; Luk 24:47-48Te emi nga okpo isu Orindi Alatararu ka eca emi dria ra, emi nga e’yo mani ma eti nze Yerusalemua, Yudiaa dria, azini Samariaa, cazu kpere nyaku ma kalatini asiria. 9#Mar 16:19; Luk 24:50-51; Yoh 6:62Eri ka e’yo ’diyi ’yo ’bo, yini eri ndreria eri ovu ’duzaru uru, iriti a’bu eri yi milia. 10#Luk 24:4Yini ndreria uru ’dani ’bua erini muria, emi ne, ’ba iri bongo be emveru yi oso pa yi ageia, 11#Mat 26:64; Luk 21:27; 1 Tim 3:16; Eceza 1:7yi ’yo, Emi ’ba Galilia ’diyi, emi oso pa luzu uru ’dani a’di e’yosi ya? Yesu engapi emi eselia muzu ’bua ’diri, eri nga eca dika ekile emini eri ndrele muria ’buarile.
’Ba Yudasi pariari pezuri
12 #
Luk 24:50-53
Yi mvi Yerusalemua engazu oni omvele Mizeituniriarisi; oni nde ovu ogogo Yerusalemu ageia ekile acita sabatonile. 13#Mat 10:2-4; Mar 3:16-19; Luk 6:14-16Yi ka fi ra yi tu jo uru pari yini adrizuri Ina alia; Petero pi Yohana pie, Yakobo pie, Andarea pie, Filipo pi Toma be, Baritolomayo pi Matayo be, Yakobo Alifayo mvi pi Simoni Zelote pie, Yudasi Yakobo mvi pie. 14#’Yeta 2:1; Yoh 7:3-5; Mat 13:55’Ba ’diyi dria yi ovu asi alusi Mungu zizu, okuyi be, azini Mariamu Yesu ma andri pie, adripi erini pie.
15Etu nde ’dayisi Petero eri so pa adripi ma eselia (’ba yi okupi nguluru ’diyi ma kalafe ovu ekile turu alu kali irile), eri ’yo kini, 16#Zab 41:9Adripi mani, e’yo siza ma ’ye i trotro ekile e’yo Orindi Alatararuni ecele ndra oko Daudi ma tisi Yudasi ’ba Yesuni bipi ’diyi ma dri cepirisirile. 17Eri ovu ndra lazaru ama be, azini eri isu azi ’dori ma esele indi. 18#Mat 27:3-8(’Ba nderi nyamuko e’yo onzi erini ma oyasi; eri eco i va o’buzaru, eri ma ale afi ra, fini efu amve mee. 19E’yo nderi ku ’ba adripi Yerusalemua ’diyi vu dria, ’dini yi ’da nyamuko ’diri ma ru Akeledama’i ani, efiniri Nyamuko Arini.) 20#Zab 69:25; 109:8Te eri ovu sizaru buku Zaburini ma alia,
Eri vile aku ma cea andruru,
’ba azini ma la alenia aluni ku; azini
’Ba azini ma nga azi eri pariani. 21#Yoh 15:27E’yo ’disi ’ba ovupi tualu ama be. 0’du dria Opi Yesuni efiria azini furia ama eselia, 22#Mat 3:16; Mar 1:9; 16:19; Luk 3:21; 24:51engazu Yohanani baputizi feria ecazu o’du Yesuni engazu ama eselia muzu ’buaria-’ba ’diyi ma eselia ama ma pe ’ba alu ovuzu tualu ama be e’yo Yesuni engazuri ma eti nzezu. 23Yi ope ’ba iri, Yusufu omvele Barasabari, ru erini aziniri Yusito’i, azini Matia. 24#Yoh 2:24, 25; 6:70Yi zi Mungu tia kini, Mi Opi ’ba ma asi nipi driari, mi ece ’ba alu mini pele ’ba iri ’diyi ma eselia 25azi ’ba ti opelerini Yudasini ndra kule muzu i parisi ra ’dori bizuri’i. 26#O’be 16:33Yini odrisi ’beria, Odrisi ’de Matia ma dria; La eri tualu ’ba ti opele mudri drini alu ’diyi be.
S'ha seleccionat:
’Yeta 1: LB66
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Lugbara © United Bible Societies, 1966.