1 Timoteo 6
6
1 #
Efe 6:5; Tit 2:9, 10 ’Ba dria ovupi ati’ba jezaru ’diyi ma ega opi yini ovu onyiru fudri inzita driasi, ’ba kazu ru Munguni o’dazu imbataniri be ku. 2#File 1:16Ati’ba ovupi opi a’ita be ’diyi be ’diyi ma iede yi onzi, yini ovule adripirurisi, I’dini ku; te yi ma nga azi ati’baniri juga ra, a’disiku ’ba azi ma orodri isuPi ’diyini ovule ’ba a’ita be azini ’ba lele avasi ’diyirurisi.
Mungu inzizu asi ayikoru e’yo driasiri beri
Mi ma imba e’yo ’diyi, ma azi yi indi. 3#Gal 1:6-9; 2 Tim 1:13’Ba azini ka imbata nduri imba, ka i asi ’ba e’yo onyiru Opi amani Yesu Kristoni a’izu ku, imbata ekile adriza ’bani ani Mungu inzizurileri a’izu ku indi, 4eri i ipi afu be, nini e’yo aluni ku; te ava erini e’yo toko toko ozizu azini agata gazu e’yo ndu ndusiri fe eri dri azani; e’yo ’diyi ma alia ma’yala pi efu di ani, omba pie, o’data Mungu o’dazuri Pie, egata onzikanyaru ’diyi pie, 5#2 Tim 3:8; 4:4; Tit 1:14awata ’ba ovupi ezazaru asisile yini ma alia, e’yo adaru ’bepi ra ’diyini pie, ’ba ’diyi ega adriza ’bani ani Mungu inzizuri ovu geri orodri isuzuri’i. 6#1 Tim 4:8; Ebra 13:5; Fil 4:11, 12Te adriza ’bani ani Mungu inzizu asi ayikoru e’yo driasiri beri eri orodri amboruni; 7#Ekl 5:14; Yob 1:21te ama ejini ndra afa aluni nyakua ku, ama econi vini afa aluni ’duzaro amani furia ku; 8#O’be 30:8re nyaka pi ka ovu ama dri bongo be indi, ama asini nga ovu ayiko be yisi. 9#O’be 23:4; 28:22Te ’ba lepi ovuzu afa e’iru ’diyi adri o’de obeta ma alia, azini emba ma alia, azini li kakau azazaru ’ba ezapi ’diyi ma alia, e’yo ’diyi fe ’bani abazu avizu dri jaza pi ma alia drata be. 10#Efe 5:5A’disiku asi ’bazu silingi lezuri ovu ola e’yo onzi driani; ’ba azini yi ma asini vele e’yo nderisirisi, yi avi geri a’itani ra, yi so yi ngulupi ma asi rua suza kakau isuzu.
A’di ’diza onyiru a’itasiri
11 #
2 Tim 2:22
Te mi’i, mi ’ba Munguni, mi ma apa e’yo ’diyisi; mi ma bi e’yo kililiruri pi ma vuti, adriza ’bani ani Mungu inzizuri pie, a’ita pie, leta avasiri pie, asi teza pie, asi e’yereruri pie. 12#1 Kor 9:25, 26; 2 Tim 4:7Mi ’di a’di onyiru a’itaniri, mi bi idri ’dani ’dani yini ndra mi omvezu eri isuzu mini ndra e’data onyiru e’daria ’ba e’yo eti nzepi kakau ’diyi ma miliari ci. 13#Yoh 18:36, 37; 19:11Ma azi mi Mungu idri fepi afa dria driri ma milia, azini Yesu Kristo e’data onyiru ma e’yo eti nzepi Pontio Pilato ma driliari ma milia, 14mi ma mba lazita ma ta ezata kokoru, o’data kokoru, cazu kpere Opi amani Yesu Kristoni i e’daria; 15#1 Tim 1:11; Eceza 17:14; Azi 10:17te eri nga i e’da ewu ’yekeria ra, eri kiri a’dule opi asi ndriza be, Meleki melekini, Opi opiniri’i; 16#Efu 33:20kiri eri’i a’dule ovupi drata kokoruri, ovupi diza ’bani ecozu cazu vunia kuri ma alia, ’ba aluni ndrele nga ku, kani ecole Indrele kuri’i. Inzita pi okpo ’dani ’daniri be ma ovu erini. Amena.
17 #
Zab 62:10; Luk 12:20; Rum 12:16 Mi ma azi ’ba afa e’iru nyakua ’diyi ma enya yi afusi ku, yi ma ’ba vini yi asi lonyi avipi mbeleri ma dria ku, te ma ’ba yi asi Mungu afa dria fepi ama dri lonyiru, amani yi a’izu ayikosiri ma dria a’dule. 18Yi ma ’ye onyiru, afa yini ovuzu yi be lonyiru kakau ’diyi ma ovu ’yeta onyiru ’diyi, yi ma ovu ’ba afa fepi avasi ’diyi, ti ecizu ’ba ma aza kozu, 19#Mat 6:20’dini jo eti onyiru ’bazu yi ngulupi dri ewu ngapi ecapirisi, yi ma la ani idri ada ovupi ndi ndiri ci beni.
20 #
1 Tim 4:7; 2 Tim 1:14 Timoteo la, mi te e’yo kule tani mbazu mi driri ma agei, mi ona mi e’yo ’yoza toko toko inzita kokoru ’diyisi, azini agata gaza ’ba ’yopi inzosi yi ’ba nita be ’diyinisi; 21#1 Tim 1:6; 2 Tim 2:18te ’ba azini yini e’yo ’diyi ma vuti biria yi eza ra, yi gbi a’ita rwa. ’Yeta anzutiri ma ovu emi be.
S'ha seleccionat:
1 Timoteo 6: LB66
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Lugbara © United Bible Societies, 1966.