1 'Ba Tesalonikia 'Diyi 5
5
1 #
Mat 24:36
Te e’yo o’du pinisi ewu be; adripi, leni ma ma si e’yo azini emi vu ku. 2#Mat 24:42-44; Eceza 3:3; 16:15; Luk 12:39; 2 Pet 3:10Te emi ma ngulupi ni kilili kini o’du Opiniri nga emu ekile oguouni emule ini berile. 3#Yer 6:14; Yoh 16:21, 22; Mat 24:39; Luk 21:34, 35’Bani de ’yoria, E’yo ’ya pi asi anzuru be, coti dri jazani nga emu yi ma dria rugbu, ekile mva azoni okporovu e’dulerile, te yi ngani yi pa aluni ku. 4Te emi’i, adripi, emi ovuni angu biza ma alia, o’du nderini emi isuzu ani oguoule ’dini ku. 5#Rum 13:12; Efe 5:9Emi dria anzi dizani, emi anzi etuni; ama ovuni ini pini angu biza be ku. 6Ka’dini ama ma ko o’du ekile ’ba azi ’diyile ku, te ama ma te mile be azini asisile be. 7A’disiku ’ba o’du kopi ’diyi yi o’du ko inisi, azini ’ba trapi ewasi ’diyi yi tra inisi. 8#Isa 59:17; Efe 6:13-17Te ama’i ovupi etuni ’diyi, ama ma te asisile be, gombere a’ita pini leta beri suzu, azini biri paria asi ’baza pata tezuri’i. 9#1 Tes 1:10; 2 Tes 2:14Mungu peni ama aoko isuzu ku, te pe ama pata a’izu Opi amani Yesul Kristo 10#1 Tes 4:14; Rum 14:8, 9drapi amasirisi, ’dini ama ka ovu mile be, kani ama ka o’du ko, ama ma ovu ani idriru tualu eri be. 11#Yud 1:20Ka’dini emi omi emi asi emi eselia, emi otuzu emi eselia emi agyi be, ekile emini ’yelerile.
Pauloni adripi ma asi imbazuri
12 #
1 Kor 16:18; 1 Tim 5:17 Te ama matu ’ba emi vu, adripi, emi ma ama ’ba azi ngapi emi eselia, ovupi emi drilia Opi ma alia, emi imbapi ’diyi ma e’yo, 13azini emi ma inzi yi tu aga ra leta avasirisi azi yini ma e’yosi. Emi ma ovu asi anzuru be emi eselia. 14#2 Tes 3:6, 11, 15Te ama emi imba, adripi, emi ma ega ’ba ’yepi saaru ’diyi ma dria, emi ma omvi ’ba asi tepi ku’diyi ma asi, emi ko ’ba okpo kokoru ’diyi ma aza, emi ovu asi teza be ’ba dria vu. 15#O’be 20:22; Rum 12:17; 1 Pet 3:9Emi ovu mile be ’ba aluni ma omvi e’yo onzi e’yo onzi ma paria agyi ini vu ku, te emi ma bi e’yo onyiruri ma vuti etuzu ’dani emi ma eselia azini ’ba dria vu. 16#Fil 4:4Emi ovu ayikosi etuzu ’dani, 17#Luk 18:1; Rum 12:12; Kol 4:2emi ma ku Mungu zizu ku, 18#Efe 5:20emi fe awa’difo e’yo driasi; te ’diri e’yo Munguni de emi vu Kristo Yesu ma aliari’i, 19#1 Kor 14:1, 29, 30, 39Emi ma inyu Orindi ku, 20emi ’ba e’yo ondriza aparakaru ku, 21#1 Yoh 4:1te emi o’bi e’yo dria; emi bi e’yo ovupi onyiruri ci, 22#Yob 1:1, 8; 2:3emi ona emi e’yo onzi ma suruti driasi. 23#2 Tes 3:16Mungu asi anzuruniri ma ngulupi ma ’ba emi alatararu teketeke; eri ma mba emi ma ngulupi ma,orindi pi ma ta, asi pie, ma pie dria, emi isuzu e’yo kokoru o’du Opi amani Yesu Kristoni emvizurisi, 24#1 Kor 1:9; 2 Tes 3:3’Ba emi omvepiri ovu asi ada be, eri nga ’ye ra.
E’zi di emici ci ’yozuri
25 #
2 Tes 3:1
Adripi, emi zi Mungu ama dri indi.
26 #
1 Kor 16:20
Emi zi adripi dria ci ci o’deza ava alatararusirisi.
27Ma emi azi oyo sozasi Opi ma rusi, emi ma la waraga ’did adripi dria dri.
’Yeta anzutiri
28’Yeta anzutiri Opi amani Yesu Kristoniri ma ovu emi be.
S'ha seleccionat:
1 'Ba Tesalonikia 'Diyi 5: LB66
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Lugbara © United Bible Societies, 1966.