2 कुरुन्थियों 12
12
पौलुस रा दिव्य दर्शन ते कमजोरी
1हालांकि मेरे तांइ घमंड करणा फायदेमंद ता नी है, पर मेरे जो घमंड करणा पैंदा। पर अवे मैं परमेश्वर रे पास्से का मिल्ले रे दर्शनां ते दस्से री गल्लां रे बारे बिच चर्चा करणी। 2मैं मसीह यीशु बिच विश्वास करणे वाले इक्क मणू #12:2 इत्ते पौलुस अपणे बारे बिच ही इय्यां गल्ल करेया करदा है ताकि से घंमड करणे का बचे।जो जाणदा जिस जो चौदह साल पैल्ले स्वर्ग तिकर चुक्की लित्तेया गेया थिया। मैं ए नी जाणदा कि से मणू अपणे सरीर बिच ही थिया जां ए होया, पर सिर्फ परमेश्वर ही जाणदे। 3मैं फिरी दोहरांदा, मैं जाणदा कि से मणू स्वर्ग पर चुक्की लित्तेया गेया थिया। फिरी, मैं नी जाणदा पर सिर्फ परमेश्वर ही जाणदे कि से मणू अपणे सरीर बिच थिया या नी। 4से स्वर्ग मणू जो चुक्की लित्तेया गेया, ते इदेय गल्लां सूणी, जिन्हा जो बोलणा ठीक नी ते इदेइ कुसकी होर मणू जो दसणे री इजाज़त नी है। 5इदेय मणू पर तां मैं गर्व करणा, पर अप्पु पर अपणी कमजोरियां जो छड्डी करी, अपणी होर कुसकी गल्ल रे बारे बिच गर्व नी करणा।
6किजोकी जे अगर मैं गर्व करणा चां, तां भी मैं बेवकूफ नी ठैहरणा, किजोकी मैं ता सच बोलणा, पर तां भी मैं गर्व करणे का बचदा, कुते इय्यां ना हो कि जिय्यां कोई मेरे जो दिखदा या मेरे का सूणदा हो, ते मेरे जो तिन्हा गल्लां का बधी करी समझो।
7मेरे सरीर बिच इक्क बड़ी वरी पीड़ कुसकी कंडे सांई लग्गे री है, ते शैतान रा इक्क दूत मेरे जो तड़पांदा रैहन्दा, ताकि मैं परमेश्वर का मिल्ले रे बड़े सारे प्रकाशन पाणे री वजह कने घमंडी ना बणी जां। 8इसेरे बारे बिच मैं प्रभु का त्रै वरी छन्दे कित्ते कि मेरे का ए दुर होई जाओ। 9पर तिन्हा ने मेरे जो बोल्लेया, मेरा अनुग्रह तेरे तांइ मता है। इधेरे तांइ अवे मैं कमजोरियां पर गर्व करणे तांइ खुस है ताकि मसीह यीशु मेरे जो अपणी ताकत दिंदे रे। 10इधेरे तांइ मैं मसीह यीशु जी तांइ कमजोरियां अन्दर, ते निन्दा होणे अन्दर, ते दरिद्रता अन्दर, ते जुल्मां अन्दर अते बुरे समय अंदर भी खुस है, किजोकी जां मैं कमजोर हुन्दा, तां मसीह मेरे जो ताकत दिंदे।
कलीसिया तांइ प्यार
11मैं इक्क बेवकूफ मणू सांई ता बणेया, पर तुसा ने ही मेरे जो ए करणे पर मजबूर कित्तेया, तुसा जो तां मेरी तारिफ करणी चाएदी थी, हालांकि मैं किच्छ भी नी है, तां भी तिन्हा प्रेरितां का जादा बदिया ही है जे अप्पु जो बड़ा बड्डा समजदे। 12जां मैं तुसा कने थिया, तां मैं तुसा रे सामणे इस गल्ल जो साबित कित्तेया थिया कि मैं मसीह यीशु रा सच्चा प्रेरित है। किजोकी मैं बड़े सबर कने तुसा बिच चिन्ह-चमत्कार कित्ते। 13मैं तुसा कने वस इक्क चीज नी कित्ती जे मैं दूज्जे कलीसियां रे लोक्कां कने कित्ती, कि मैं तुसा पर आर्थिक तौर पर बोझ नी बणेया, तुसा जो अगर ए लगदा कि मैं इय्यां करी के तुसा कने किच्छ गलत कित्ते रा है, तां मेरे जो माफ करी देयो। 14अवे मैं तिज्जी वरी तुसा का आणे जो तैयार है, ते मैं तुसा पर कोई बोझ नी बणना, किजोकी मेरे जो तुसा री धन-दौलत नी चाएदी, पर मेरे जो तुसा चाएदे। किजोकी बच्चेयां जो अपणे मां-प्यो तांइ धन्न नी कठेरणा चाएदे, बल्कि मां-प्यो जो बच्चेयां तांइ धन्न कठेरणा चाएदा। 15मैं अपणा सारा किच्छ तुसा जो देई दैणा, इत्ते तिकर की मैं अप्पु जो भी तुसा जो देई दैणा। मैं तुसा जो बड़ा वरी प्यार करदा, पर इय्यां लगदा कि तुसा मेरे जो घट ही प्यार करदे। 16तुसा बिच का किच्छ मणू ता मनदे कि मैं तुसा पर कोई बोझ नी पाया, पर किच्छ मणू ए मनदे कि मैं तुसा चलाक्की कने फसाई लित्ते रा है जे कि बिल्कुल झूठ है। 17-18मैं तीतुस ते इक्क विश्वासी भाई जो प्रोत्साहित करी के तुसा का भेज्जेया। मैं कदी भी तिन्हा जो तुसा का पैसे लैणे तांइ तुसा का नी भेज्जेया। तीतुस ने कदी भी धोखा करी के तुसा का कदी किच्छ नी लित्तेया। किजोकी असा रे इक्क जदेय ही इराद्दे हिन ते असी इक्क बराबर कम्म करदे। 19ओ प्यारे विश्वासियों, तुसा हल्ले तांइ समजदे हो कि असी तुसा जो हटी करी जवाब देया करदे हिन। असी तां ए सोच्ची करी कि परमेश्वर असा जो दिख्खेया करदे हिन, मसीह यीशु बिच बोलदे, अते असी सारी गल्लां तुसा जो मसीह बिच विश्वास करणे बिच मजबूत बणाणे तांइ ही बोलदे। 20किजोकी मेरे जो डर है, कि कुते इय्यां ना होई जाए कि जां मैं तुसा का आं, तां जदेया मैं चाह्ंदा, तुसा तदेय ना होण, ते तुसा भी मेरे जो तदेया ना पाओ जदेया तुसा मेरे जो चाह्ंदे। ते मेरे जो डर है कि तिसेरी वजह कने तुसा बिच लड़ाई, हिरस, गुस्सा, विरोध, मतलबीपन, चुगली, घमण्ड, धोखा-धड़ी ते बखेड़े होई जाणे। 21मेरे जो डर है कि जां मैं तुसा का दुबारा आणा, तां परमेश्वर मेरे जो बेज्जत ना करण, ते मेरे जो मते लोक्कां तांइ अफसोस ना करणा पे जिन्हा ने पैल्ले भिठ्ठे काम्म, व्यभिचार, ते शर्मसार करणे वाले पाप कित्ते थिये, ते तिन्हा सारे पाप्पां का तौबा नी कित्ती थी।
S'ha seleccionat:
2 कुरुन्थियों 12: CDHNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.