1 कुरुन्थियों 1
1
पौलुस री नमस्ते अते प्रार्थना
पौलुस री तरफ का नमस्ते
1-2मैं पौलुस, जे परमेश्वर री मर्जी रे हिसाब कने यीशु मसीह रा प्रेरित है, कुरिन्थुस सहर री कलीसिया रे विश्वासियां जो ए चीठ्ठी लिख्खेया करदा है। भाई सोस्थिनेस कने मिली करी मैं तुसा लोक्कां जो ए चीठ्ठी भेज्जेया करदा है जिन्हेरा रिस्ता परमेश्वर ने मसीह यीशु कने बणाई करी अपणे मणू बणाणे तांइ अलग कित्ते रा है, ते तुसा जो अपणे बणने तांइ सद्दे रा है, बिल्कुल तिय्यां ही जिय्यां तिन्हा ने हर जगाह् तिन्हा दूज्जे लोक्कां जो भी चुणेया जे तिन्हेरी सेवा करदे किजोकी से असा रे प्रभु मसीह यीशु हिन। 3असा रे पिता परमेश्वर री ते प्रभु मसीह यीशु का तुसा सबणी जो अनुग्रह ते सांती मिलदी रे।
पौलुस रा परमेश्वर जो शुकर
4-6मैं तुसा तांइ परमेश्वर रा बड़ा शुकर करदा किजोकी तिन्हा ने बड़े अनुग्रह कने तुसा रा रिस्ता मसीह यीशु कने जोड़ी करी अपणी आशीषां दित्ते री हिन। खासतौर पर तिन्हा ने तुसा जो मते तरिक्के रे आत्मिक वरदान दित्ते रे हिन, ताकि तुसा दूज्जे लोक्कां जो तिन्हेरे बसेख ते वचन रे ज्ञान रे बारे बिच दस्सी सको। इधेरे तांइ परमेश्वर ने तुसा लोक्कां बिच ए साबित कित्ते रा है कि मसीह यीशु रा सुब बसेख सच है। 7ते इसी वजह कने पवित्रात्मा ने तुसा जो आत्मिक वरदान दित्ते रे हिन जां हल्ले तुसा मणू मसीह यीशु रे हटणे रा इंतजार करेया करदे हिन। 8परमेश्वर ने तुसा जो आखरी समय तिकर मजबूत बनाणा, ते मसीह यीशु बिच तुसा रे विश्वास जो ताकतवर बनाणा ताकि तुसा मसीह यीशु रे हटी आणे वाले बेल्ले बिच बेकसूर ठेहरो। 9परमेश्वर अपणी हर इक्क गल्ल बिच भरोस्सेमंद हिन, ते तिन्हा ने अपणे पुत्तर प्रभु यीशु मसीह कने तुसा रा रिस्ता जोड़णे तांइ सद्दे रा है।
एकता तांइ बुलाहट
कुरिन्थुस री कलीसिया रे मणूआं रा बटवारा
10अवे ओ मेरे संगी विश्वासियों, मैं असा रे प्रभु यीशु मसीह रे हक कने तुसा जो इय्यां करणे तांइ जोर पांदा कि तुसा सारे जणे इक्क ही गल्ल पर राज़ी होया करो, ते तुसा लोक्कां बिच कोई फूट ना हो ते मैं जोर पाई करी बोलदा कि इक्क मकसद ते इक्क ही तरिक्के सोच विचार रख्खी करी अप्पु-मिते सांती बणाई रख्खो। 11किजोकी ओ मेरे संगी विश्वासियों, खलोए रे टब्बर ने मेरे जो तुसा रे बारे दस्सेया कि तुसा बिच लड़ाई-झगड़े होया करदे हिन। 12मेरे बोलणे रा मतलब ए है कि तुसा बिच का कोई बोलदा, मैं पौलुस रे सिखाए चलदा, ते कोई बोलदा कि मैं अपुल्लोस रे सिखाए चलदा, ते कोई बोलदा कि मैं पतरस #1:12 कैफारे सिखाए चलदा, ते कोई बोलदा कि मैं मसीह यीशु सिखाए चलदा। 13तुसा मणू जे इय्यां करेया करदे हिन, से सही नी है किजोकी मसीह यीशु अलग-अलग मण्डली बिच बंडित्ते रे नी हिन। मैं पौलुस, तुसा जो पाप्पां का बचाणे तांइ सुली पर कुर्बान नी होया। ते तुसा ने मेरे नां कने बपतिस्मा नी लित्तेया थिया। 14मैं परमेश्वर रा शुक्रिया करदा कि मैं क्रिस्पुस ते गयुस नां रे दो भ्यालां जो छड्डी करी तुसा बिच का होर कुसकी जो बपतिस्मा नी दित्तेया, 15कि कोई मणू ए नी बोल्ले कि मैं पौलुस रा चेल्ला बणने तांइ बपतिस्मा लित्ते रा है। 16ते हाँ, मैं स्तिफनास रे टब्बर जो भी बपतिस्मा दित्तेया थिया, इन्हेरे अलावा मैं होर कुसकी जो बपतिस्मा नी दित्तेया। 17किजोकी मसीह यीशु ने मेरे जो बपतिस्मा दैणे तांइ नी, पर सुब बसेख सुनाणे जो भेज्जे रा है, जां मैं सुब बसेख सुणांदा तां मैं अपणे गल्ल-बात करणे री खूबी रा इस्तेमाल नी करदा, नी ता लोक्कां ने सिर्फ मेरे गल्ल-बात करणे रे तरिक्के कने ही मेरा भरोस्सा करी लैणा थिया ते शायद तिन्हा लोक्कां ने सुली पर मसीह यीशु री मौत री ताकत का अनजाण रैह्णा थिया।
मसीह री सक्ति ते परमेश्वर रा ज्ञान
18जां मणू मसीह रे सुली पर मरणे रा बसेख सूणदे, तिन्हा बिच का किच्छ मणू ए सोचदे कि ए बसेख बेवकूफी भरा है। जे मणू इय्यां सोचदे से ओ मणू हिन जे नरक बिच पाए जाणे। पर असी मणू जे तिस बसेख पर विश्वास करदे, ए परमेश्वर रा अपणे लोक्कां जो अपणी ताकत कने बचाणे रा रस्ता है। 19किजोकी पवित्रशास्त्र बिच परमेश्वर ने बोल्ले रा है,
“मैं ज्ञानी मणूआं रे ज्ञान जो नास करणा,
अते समजदारां री समझ जो घटिया करी दैणा।”
20तां फिरी अवे असी समजदार मणूआं रे बारे बिच कै बोल्ली सकदे? अवे असी यहूदी नियमां रे शास्त्रियां रे बारे बिच कै बोल्ली सकदे? ते अवे असी तिन्हा लोक्कां रे बारे बिच कै बोल्ली सकदे जे गल्ल-बात करणे बिच बड़े तेज हिन? परमेश्वर ने ए ज़ाहिर जताई दित्तां कि इस दुनिया री समझ रा कोई मुल्ल नी है। 21जां परमेश्वर ने अपणे ज्ञान कने ए समजी लेया कि दुनिया ने तिन्हा जो कदी अपणी इन्सानी समझ कने नी दिख्खी सकणा, तां तिन्हा ने असा रे सुब बसेख रे प्रचार जो इस्तेमाल कित्तेया ताकि विश्वास करणे वाले मणूआं जो बचाए जिस जो कई मणू बेवकूफी समजदे। 22यहूदी लोक्कां जो ए बेवकूफी लगदी किजोकी से मणू विश्वास करणे तांइ परमेश्वर का निशानी तोपदे, ते गैर यहूदियां जो ए बेवकूफी इधेरे तांइ लगदी किजोकी से इन्सानी ज्ञान री तोप बिच हिन। 23पर असा तां तिस सुली पर चढ़ाये मसीह यीशु रा प्रचार करदे जिन्हा ने असा जो पाप्पां का छुड़ाणे तांइ सुली पर जान दित्ती थी, किजोकी यहूदी लोक्कां ने ए सोच्चेया थिया कि मसीह ने हमेसा जीणा इधेरे तांइ से इस गल्ल पर विश्वास नी करी सके कि यीशु ही मसीह थिये। 24पर से मणू जिन्हा जो परमेश्वर ने अपणे मणू होणे तांइ सद्दे रा है, चाए फिरी से यहूदी हो या गैर यहूदी हो, तिन्हा तांइ मसीह परमेश्वर री ताकत ते ज्ञान हिन। 25किजोकी जे गल्ल परमेश्वर री बेवकूफी जदेई लगदी, से मणूआं रे ज्ञान का भी जादा बधी करी ज्ञानवान है, ते जे चीज परमेश्वर री कमजोरी जदेया लगदी, से मणूआं री ताकत का भी जादा बधी करी है। 26ओ संगी विश्वासियों, इसका पैल्ले कि परमेश्वर ने तुसा जो अपणे मणू बणने तांइ सद्देया थिया, जरा सोच्चो कि तुसा तिस बेल्ले कदेय थिये। इन्सानी तौर पर ता तुसा बिच जादातर मणू ना ता बड़े ज्ञानी थिये, ते ना ही ताकतवर थिये ते ना ही तुसा कुसकी बड्डे खानदान का थिये। 27पर परमेश्वर ने तिन्हा लोक्कां जो चुणी लित्तेया जिन्हा जो दुनिया रे मणू बेवकूफ समजदे, ताकि परमेश्वर तिन्हा लोक्कां जो शर्मिंदा करण जे अप्पु जो समजदार मनदे। 28अते परमेश्वर ने तिन्हा लोक्कां जो चुणेया जिन्हा कने मणू नफरत करदे थिये ते जिन्हा जो मणू तुच्छ, नीच ते किच्छ भी नी समजदे थिये, ते परमेश्वर ने तिन्हा लोक्कां जो तिस सोच जो तोड़ने तांइ इस्तेमाल कित्तेया जिस जो दुनिया खास समझदी। 29परमेश्वर ने इधेरे तांइ कित्तेया ताकि तिन्हेरे सामणे कोई भी मणू घमंड ना करी सके। 30पर परमेश्वर ने तुसा लोक्कां रा रिस्ता मसीह यीशु कने जोड़ेया, ते मसीह यीशु रे जरिये से असा जो अपणा ज्ञान दिंदे, परमेश्वर असा जो अपणी नजर बिच धार्मिक ठैहरांदे। असी मणू मसीह यीशु रे जरिये पवित्र ठैहराये गेरे हिन ते असा जो पाप का अजाद करदे। 31जिय्यां कि पवित्रशास्त्र बिच लिख्खे रा है,
“जे घमंड करो से परमेश्वर बिच घमंड करे।”
S'ha seleccionat:
1 कुरुन्थियों 1: CDHNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.