Loma BYA KULUMBULULA
BYA KULUMBULULA
Nkalata ya kwa Paulo mutumwa yoanembele kubena Loma yanembelwe mukunengezha lwendo lwanji lwa kupempula kipwilo kyajinga ku Loma. Wasakile kuya na kwingila na bena Kilishitu bajinga ku Loma ka kimye kacheche, apa bino ne kuya ku Sipeni na bukwasho bwabo. Wanembele amba a lumbulule mwayila lwitabilo lwa bwina Kilishitu ne mo bafwainwa kwikeela mu bwikalo bwa mwina Kilishitu. Mu uno buku mo muji mambo anji onse oa ambile mu byambo byanji.
Pa kupwisha kwimuna bantu bamu kipwilo kya bena Loma ne kwibabuula byoebalombelela, Paulo po po a amba kishina kya nkalata yanji amba, “Mambo Awama amwesha Lesa byo alengele bantu kwikala mu lumvwang'ano ne aye mwine, kupichila mu lwitabilo kufuma ku ntendekelo kufika ne kumpelo.” 1:17.
Paulo mu kishina kya uno buku wa amba amba, mutundu yense wa bantu, Bayudea nangwa Bangentila, kibafwainwa kwikala mu lumvwang'ano lumo ne Lesa, mambo bonse pamo baji mu luusa lwa bundengamambo. Bantu bekala mulumvwang'ano ne Lesa kupichila mu lwitabilo mwi Yesu Kilishitu. Kikwabo, Paulo wa lumbulula bwikalo bupya bwa mwi Kilishitu bwishila mu kukwantankana kupya ne Lesa. Waitabila uji na mutende ne Lesa kabiji wakasululwa na Mupashi wa Lesa kufuma ku bulume bwa bundengamambo ne lufu. Kutendeka mu ma kyapitala 5-8 Paulo wa amba kyaikelaako Mizhilo ya Lesa ne bulume bwa Mupashi Wazhila mu bwikalo bwa mwina Kilishitu. Kabiji aye mutumwa wa amba pa mambo a kuuba amba Bayudea ne Bangentila kechi bapusana ku meso a Lesa ne. Aye wapwisha amba kumukana Yesu kwa Bayudea kwajinga kunengezha kwa Lesa amba alete pepi mitundu yonse ya bantu mu bupe bwa Lesa mwi Yesu Kilishitu, kabiji waitaba amba Bayudea kechi bakatwajijilatu na kumukana Yesu ne. Pa kupezhako Paulo wanemba byafwainwa kwikala bwikalo bwa bwina Kilishitu, mwa kutemwang'ena na bakwetu. Waamba kabiji ne pa mutwe wa kumwingijila Lesa, ne mwingilo wa bena Kilishitu ku ntanda ne ku bene na bene, ne mepuzho a mu muchima. Wapezhako ino nkalata na byambo byanji aye mwine ne na byambo bya kutoota Lesa.
Mutachi wa bintu biji mu uno buku
Bya kutendekelako 1:1-17
Ene mambo o twafwainwa lupulukilo 1:18—3:20
Jishinda ja Lesa ja lupulukilo 3:21—4:25
Bwikalo bupya mwi Kilishitu 5:1—8:39
Bena Isalela mu mutanchi wa Lesa 9:1—11:36
Bwikalo bupya bwa mwi Kilishitu 12:1—15:13
Bya kupezhako ne lwimu lwanji 15:14—16:27
S'ha seleccionat:
Loma BYA KULUMBULULA: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.