Yoano 21
21
Yesu byo amwekele ku baana babwanga jikumi na babiji
1Pakupita bino, Yesu wimwesheshe mwine jibiji ku baana banji babwanga ku kizhiba kya Tibeliasa. Wimwesheshe byonkabye. 2Kwajinga Shimona Petelo, ne Tomase yebateela amba, Didimasa, ne Natanela wa ku muzhi wa Kena wa mu Ngalilea, ne baana ba Zebede, ne baana banji babwanga babiji bakwabo. 3#Lu 5:5Ne Shimona Petelo wibambijile amba, “Amiwa naya mu masabi.”
Ne bakwabo nabo amba, “Ne atweba tusakuya nenu.”
Bayile, bakanjijile ne mu bwato, bino abwa bufuku bonse kechi bakwachile kintu ne. 4Kabiji pakuseele juba, Yesu waimene ku kitulu, bino baana banji babwanga kechi bayukile amba, ye Yesu ne. 5Ponkapo Yesu wibepwizhe amba, “Anweba baana, muji na masabi nyi?”
Abo bamukumbwile amba, “Ine.”
6 #
Lu 5:6
Ne aye wibambijile amba, “Telaai bukonde ku kilujo kya bwato, musakukwata.”
Ne abo bebuteele, ponkapo bakankelwe ne kwibwabulapo na mambo akuvula kwa masabi.
7Kabiji awa mwana wabwanga ye atemenwe Yesu wamwambijile Petelo amba, “Ye Nkambo!”
Ponkapo Petelo pakumvwa amba, ye Nkambo, wavwajile mukangyo wanji (mambo kechi wavwajile ne,) ne kwitaya pa mema, 8Pakuba baana babwanga bakwabo baishilenga mu kabwato (mambo kechi bajinga kwalepa na ku kitulu ne, pajinga nobe misinso ya makyubichi bitota bibiji,) kasa bakoka bukonde bwayujile masabi. 9Byo batuntukile ku kitulu, bamweneko ne mujilo wa mashanga, ne masabi kasa aji ponka, ne shinkwapo. 10Ne Yesu wibambijile amba, “Pano letaipo masabi amo o mwakwata.”
11Kepo Shimona Petelo ayileko na kukokela bukonde kungye kasa bwayula masabi akatampe, kitota kimo ne makumi atanu ne masabipo asatu, kabiji nangwa avujile byonkabyo, bukonde kechi bwachibikile ne. 12Kumvwa Yesu wibambijile amba, “Iyai muje.”
Kechi pajinga nangwa umo mwana wabwanga wajinga na muchima wa kumwipuzha amba, yenu bang'anyi ne. Bayukile amba, ye Nkambo. 13Ponkapo Yesu washikwile shinkwa, ne kwibapa wibapele, ne masabi nao pamo.
14Kino kyajinga kimye kya busatu kyo emwesheshe Yesu ku baana banji babwanga, byo asangukile mu bafu.
Yesu ne Petelo
15Byo bapwishishe kuja, Yesu wa ambijile Shimona Petelo amba, “Shimona, mwana Yona, wantemwa kukila bano bakwenu byo bantemwa nyi?”
Aye wamukumbwile amba, “Ee, Nkambo, anweba mwayuka amba amiwa nemutemwa.”
Yesu wamwambijile amba, “Kajishai twana twa mikooko twami.”
16Kabiji aye wamwipwizhe ke jibiji amba, “Shimona mwana Yona, wantemwa nyi?”
Kumvwa aye amba, “Ee, Nkambo, anweba mwayuka amba amiwa nemutemwa.”
Ne aye Yesu wamwambijile amba.
“Kalamai mikooko yami.” 17Kabiji aye wamwipwizhe ja busatu amba, “Shimona, mwana Yona, wantemwa nyi?”
Ponkapo Petelo kyamubile bulanda mambo aye wamwambijile ja busatu amba, “Wantemwa nyi?” Ne aye wamukumbwile amba, “Nkambo, anweba mwayuka bintu byonse, mwayuka amba amiwa nemutemwa.” Ne Yesu wamwambijile amba.
“Kajishai mikooko yami. 18Kine, kine nemwambila namba, byo mwakijinga nsongwalume, mwivwikilenga, ne kuya ko mwasakilenga anweba bene, pakuba byo mukekala ke mukote, mukatanyika maboko enu, ne mukwabo ukemuvwika, ne kwimutwala ko mwabula kusaka.” 19(Wa ambile bino, mu kutongola musango wa lufu lwa kwa Petelo lo aka tumbijikilamo Lesa.)
Pa kupwisha kwamba bino, wamwambijile amba, “Ndondelai.”
20 #
Yoa 13:25
Ponkapo Petelo wafutulukile, ne kumona awa mwana wabwanga ye atemenwe Yesu, kasa alondela, yenka wa shakamijile mu kyaji kyanji ku kijiilo, ne kwamba amba, “Nkambo, ng'anyi usa kwimusolola?” 21Ponkapo Petelo, byo a mumwene, wamwipwizhe Yesu amba, “Nkambo, nga we ukooba byepi?”
22Kumvwa Yesu wamukumbwile amba, “Inge nasaka namba, ekale poso nkeye, nanchi o mambo enu nyi? Anweba ndondelaingatu.”
23Ponkapo ano mambo akumbene mu balongo babo amba, awa mwana wabwanga kechi ukafwa ne, bino Yesu kechi wamwambijile amba, kechi akafwe ne, wa ambile amba, “Inge nasaka namba, ekale poso nkeye, nanchi o mambo enu nyi?”
24Uno ye yewa mwana wabwanga washimuna bino, ne kwibinemba, kabiji twayuka namba kushimuna kwanji ko kwa kine.
Bya kupezhako
25Kabiji ko biji bikwabo bintu byavula byaubile Yesu. Inge byanembelwe byonse, nalanguluka namba, ne pano pantanda inge pabula ne pa kutula a o mabuku anembwa.
S'ha seleccionat:
Yoano 21: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.