Yoano 17
17
Yesu byo ebalombejile baana banji babwanga
1Yesu byo apwishishe kwamba bino bintu, wainwine meso anji ne kutala mwiulu ne kwamba amba, “Taata, kimye kyafika. Mu mutumbijike Mwanenu, amba, Mwana naye emutumbijike. 2Mambo mwamupele luusa lwa pa bantu bonse, pakuba amba akapane bumi bwa myaka ku bonse bo mwamupele. 3Kabiji buno bo bumi bwa myaka, amba bemuyuke anweba, Lesa yenka wa kine, ne Yesu Kilishitu ye mwatumine. 4Amiwa nemutumbijika pano panshi, byo napwisha mingilo yo mwampele amba neyube. 5Pano, anweba Taata! Muntumbijike ko muji anweba bene na lonkalwa lukumo lo najinga naalo ko muji, pano pantanda kasa pakyangye kulengwa.
6“Nasolwele jizhina jenu kwi aba bantu bomwampele mu ba pano pantanda. Bajinga ba kwenu, ne anweba mwibampele ne abo balama mambo enu. 7Pano bayuka amba, byonse byo mwampele, byafuma kwi anweba. 8Mambo nebapele byambo byo mwampele, kabiji bebitambula, ne kuyuka bayuka kine byo nafumine kwenu, kabiji baitaba amba, yenu mwantumine.
9“Amiwa mbena kwibalombelela abo. Kechi nebalombelela ba pano pantanda ne, poso bonka bomwampele, mambo bo benu. 10Kabiji ne byonse byami byo byenu, ne byenu byo byami, kabiji ne amiwa natumbijikilwa mwi abo. 11Pakuba pano kechi nkiji pano pantanda ne, pakuba bano bo baji pano pantanda, kabiji amiwa mbena kwiya kwenu. Taata Wazhila! Mwibalame mu jizhina jenu jo mwampele, bekale ke umo, byonka byo tuji atweba. 12#Sala 41:9; Yoa 13:18Byo najinga naabo, amiwa nebalaminenga mu jizhina jenu jo mwampele. Nebasungile, kabiji kafwako nangwa umo waonaika ne, poso yenka awa mwana wa lonaiko, amba kinembelo kifikizhiwe. 13Pakuba pano mbena kwiya kwi anweba, kabiji bino nebyamba pano pantanda namba, bekale na lusekelo lwami kasa lwafikila mu michima yabo. 14Amiwa nebapele mambo enu, ne ba pano pantanda bebashikwa, mambo abo kechi bo ba pano pantanda ne, byonka byo nji amiwa kechi ne wa pano pantanda ne. 15Kechi nalomba namba mwibafumye pano pantanda ne, poso namba mwibalame kwi yewa mubi. 16Abo kechi bo ba pano pantanda ne, byonka byo nji amiwa kechi ne wa pano pantanda ne. 17Mwibazhijike na bukine, byambo byenu bo bukine. 18Byonka byo mwantumine pano pantanda, byonkabyo ne amiwa nebatuma pano pantanda. 19Kabiji nezhijika na mambo a abo, namba ne abo bene nabo bazhijikwe mu bukine.
20“Kabiji kechi nebalombelela abo bonka ne, pakuba ne abo bakangitabila amiwa na byambo byabo. 21Namba bonse bekale ke umo. Taata! Byo muji mwi amiwa ne amiwa mwi anweba, byonkabyo ne abo nabo bekale mwi atweba, namba ba pano pantanda betabile amba, anweba yenu mwantumine. 22Kabiji ne lukumo lo mwampele amiwa, ne amiwa nebapaalo, be kale ke umo byonka byo tuji umo atweba. 23Amiwa monka mwi abo, ne anweba mwi amiwa, namba balumbuluke ke umo, namba ba pano pantanda bayuke amba, yenu mwantumine, ne kwibatemwa abo byonka byo mwantemwa amiwa.
24“Taata! Aba bomwampele, nasaka namba, konji amiwa, ne abo nabo bakekale ne amiwa, namba bakamone lukumo lwami, lo mwampele mambo anweba mwantemenwe amiwa ne ntanda kasa ikyangye kulengwa. 25Anweba Taata waoloka! Ba pano pantanda kechi bemuyuka ne, pakuba amiwa nemuyuka, ne bano bayuka amba mwantumine. 26Ne amiwa nebayukisha jizhina jenu, kabiji nkejiyukanyikisha namba butemwe bo mwantemwa amiwa bwikale mwi abo, ne amiwa monka mwi abo.”
S'ha seleccionat:
Yoano 17: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.