Yoano 13
13
Yesu byo a ovwele maulu a baana banji babwanga
1Pano kijiilo kya Lupitailo kasa kikyangye kufika, Yesu wayukile amba, kimye kyami kyafika kya kufuma pano pantanda ne kuya kwi bataata. Byo atemenwe ba kwanji bajinga pano pantanda, aye wibatemenwe ne kumpelo.
2Byo bajilenga kijiilo kya mulajilo, Diabola kasa ekibika kala mu muchima wa kwa Yudasa Isakaliota, mwana Shimona, kya kumusolola. 3Yesu nangwa wayukile amba, bataata bampa bintu byonse mu maboko ami, kabiji nafuma kwi Lesa, kabiji nkaya kwi Lesa. 4Waimene ku kijiilo, ne kutuula bivwalo byanji bya peulu, washikwile taulo, ne kwinyinga. 5Ponkapo waitulwijile mema mu nsanyi, kaovwe ne baana banji babwanga ku maulu abo, ne kwibashiimuna na taulo yenka ye ekashile. 6Byo aishile kwi Shimona Petelo, aye wamwambijile amba, “Nkambo, anweba mungovwe maulu ami nyi?”
7Kumvwa Yesu wamwambijile amba, “Anweba kechi mwikiyuka kyombena kuuba amiwa ne, bino mukekiyuka palutwe.”
8Ne Petelo wamwambijile amba, “Kechi mungovwe maulu ami nangwa kacheche ne.”
Kumvwa Yesu wamwambijile amba, “Inge kechi nemovwe ne, kechi muji ne amiwa nangwa pacheche ne.”
9Kumvwa Shimona Petelo amba, “Nkambo, kechi mungovwetu ku maulu ami onka ne! Nanchi mungovwe ne ku maboko ami ne ku mutwe wami pamo!”
10Kabiji Yesu wamwambijile amba, “Awa waowa kala, kechi usakiwa kowa jibiji ne, kana konka ku maulu, mambo watokatu yense. Ne anweba mwatoka, bino kechi bonsetu ne.” 11Ke pakuba aye wamuyukile ukamusolola, o mambo oa ambijile amba, “Kechi mwatoka bonse ne.”
12 #
Lu 22:27
Pa kupwisha kwibovwa ku maulu abo, washikwile bivwalo byanji, ne kwikala jibiji, wibambijile amba, “Mwayuka kyo nauba kwi anweba nyi? 13Anweba muntela amiwa amba, Mufunjishi, kabiji amba Nkambo, mwambatu bulongo mambo byo byo nji. 14Kabiji inge amiwa, Nkambo yenu ne Mufunjishi wenu, nemovwa maulu enu, ne anweba mwafwainwa kwiovwa ku maulu enu anweba bene na bene. 15Mambo amiwa nemushiila mwa kulondela, amba ne anweba mubenga byonka byo nemubila. 16#Mat 10:24; Lu 6:40; Yoa 15:20Kine, kine, nemwambila namba, muzha kechi wakila nkambo yanji ne, nangwa yewa ye batuma kechi wakila wamutuma ne. 17Inge anweba mwibiyuka bino, mwatokwa inge mwibyuba.
18 #
Sala 41:9
“Amiwa kechi mbena kwamba mambo a anweba bonse ne, amiwa nayuka ne bo nasalulula. Pakuba nanchi amba kinembelo kifike, amba, ‘Yenka uja shinkwa ne amiwa ye wansobwela kashiko kanji.’ 19Ponka pano nemubujila jimo kasa kikyangye kufika namba, byo kikafika, mukangitabile amba, ‘Yami, i ye.’ 20#Mat 10:40; Mako 9:37; Lu 9:48; 10:16Kine, kine, ne mwambila namba, watambula ye ntuma amiwa wantambula amiwa, kabiji wantambula amiwa watambula ne aye wantuma.”
Yesu byo atongwele ukamusolola
(Mateo 26:20-25; Mako 14:17-21; Luka 22:21-23)
21Ponkapo Yesu byo apwishishe kwamba bino, wakatazhiwe mu mupashi, ne aye washimwine amba, “Kine, kine, nemwambila namba, umo wa mwi anweba ukansolola.”
22Ponkapo baana babwanga ke betale ne kwitala, ne kuzhinauka ye aneena. 23Mwananji wabwanga umo, yenka ye atemenwe Yesu, wajinga ku tebulu, kasa asendalela mu kyaji kya Yesu. 24Shimona Petelo wamulabwile na meso, ne kumwambila amba, “Tubuulai ye abena kunena.”
25Kabiji aye byo asendalele byonkabyo pa kyaji kya Yesu, wamwambijile amba, “Nkambo, ye ng'anyi?”
26Kumvwa Yesu wa ambile amba, “Awa ye nsakutanchila kitolo, ne kumupa, i ye.”
Ponkapo byo a tanchile kitolo, wamupele Yudasa, mwana Shimona Isakaliota. 27Panyuma ya kutambula kitolo ponkapo ne Satana wamutwelele. Ne Yesu wamwambijile amba, “Akya kyo musaka kuba, kyubai bukiji!”
28Ku tebulu kafwako nangwa umo wayukile kyo a mwambijile kino ne. 29Pakuba byo ajinga nafukuta wa mali, aye Yudasa, bamo balangulukile amba, Yesu wamwambijile amba, akapote byo basakile bya kijiilo, nangwa amba, akebape bintu balanda.
30Kabiji aye byo atambwile kitolo walupukile ponkapo. Bwajinga ke bufuku.
Mukambizho mupya
31Ponkapo Yudasa byo alupukile, Yesu wa ambile amba, “Pano Mwana Muntu watumbijikwa, ne Lesa watumbijikilwa mwi aye. 32Umvwe Lesa watumbijikilwa mwi aye, Lesa naye uka mutumbijika mwi aye mwine, uka mutumbijika ponkapotu. 33#Yoa 7:34Anweba twana nji ne anweba pa kakimye kacheche. Musa kukankeba, kabiji byonka byo naambijile Bayudea, pano nemwambila ne anweba namba, akwa kongya amiwa, anweba kechi mwakonsha kuyako ne. 34#Yoa 15:12,17; 1 Yoa 3:23; 2 Yoa 1:5Mukambizho mupya ye nemupa anweba, namba mwitemwe anweba bene na bene, byonka byo nemutemwa amiwa, ne anweba mwitemwe anweba bene na bene. 35Pa kyo kino po po bakayukila bonse amba anweba mwi baana bami babwanga, inge mwitemwa anweba bene na bene.”
Yesu byo a mwambijile jimo Petelo amba ukankana
(Mateo 26:31-35; Mako 14:27-31; Luka 22:31-34)
36Kumvwa Shimona Petelo wamwambijile amba, “Nkambo, mubena kuya kwepi?”
Kumvwa Yesu amba, “Kongya amiwa, kechi mukonshe kundondela pa kino kimye ne, pakuba musa kuka ndondela palutwe.”
37Kumvwa Petelo wamwambijile amba, “Nkambo, pa kino kimye mambo ka kyo nakonsha kubujila kwimulondela? Nsa kukemwelela mweo#13:37 Mweo: nangwa amba bumi wami!”
38Kumvwa Yesu amba, “Kine mukangelela mweo wenu nyi? Kine, kine, nemwambila namba, Shikombwe kasa akyangye kukookola, musakunkana jisatu.”
S'ha seleccionat:
Yoano 13: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.