Byubilo 8
8
1Ne Saulo waitabizhe lufu lwanji.
Kipwilo byo bekimwesheshe byamalwa kwi Saulo
Kabiji pa jonkaja juba kwabuukile lupato lukatampe lwa kwikipata kipwilo kya mu Yelusalema. Ne bonse bapalang'ejile monse mu Yudea, ne mu Samaliya, poso bonka batumwa. 2Kabiji banabalume batekanya bamuzhiikile Setepena, ne kumujila bingi na mabingo akatampe. 3#Byu 22:4,5; 26:9-11 Pakuba aye Saulo waonawinenga kipwilo, kasa atwela mu mazubo, na kwibakulumunamo banabalume ne banabakazhi ne kwibataya mu kaleya.
Mambo Awama byo asapwijilwe mu Samaliya
4Kabiji aba bapalang'enejilemo bayilenga na kusapwila Mambo Awama. 5Filipa wayile ku Samaliya, na kusapwila mambo a Kilishitu. 6Ne mabumba ateeleko muchima ku byambo bya ambilenga Filipa na muchima umotu, byo ba umvwine ne kumona biyukilo byo aubilenga. 7Mambo bavula bajinga na bapashi babipa bafuminengamo mwi abo, kasa batama na jiwi jikatampe, ne bavula babelelenga kalepu, nangwa balemana babukilwe. 8Byonkabyo mwajinga lusekelo lukatampe mu yewa muzhi.
Shimona nga'anga wa lubuko
9Bino kwajinga muntu umo jizhina janji Shimona, ye waubilenga bingelekezha kala mu yewa muzhi kabiji walengeshe bena Samaliya kukumya, kasa etumbijika amba yami mukatampe, 10Ne bonsetu batele michima koaji, kufuma kumwanyike kufika ne ku mukulumpe amba, “Uno bo bulume bwa Lesa bwatelwa amba, bo bukatampe.” 11Kabiji bateleko muchima kwi aye, mambo aye kimye kyabaya wibalengeshanga kukumya na bya bung'anga bwanji. 12Bino byo baitabijile kwi Filipa byoasapwijilenga Mambo Awama a bufumu bwa Lesa ne a jizhina ja Yesu Kilishitu, ba batizhilwe banabalume ne banabakazhi. 13Ne aye Shimona waitabijile, kabiji byo abatizhilwe waikajilenga ne Filipa. Ne byo amwene biyukilo ne mingilo ya bulume ikatampe byaubilwenga, wakuminye.
14Kabiji batumwa bajinga mu Yelusalema byo ba umvwine amba bena Samaliya batambula mambo a Lesa, bebatumijile ba Petelo ne Yoano. 15Ne abo bafikileko, be balombelejile amba batambule Mupashi Wazhila. 16Mambo waji ukyangye kwibekijila nangwa pa muntu umo ne, bino ba batizhilwetu mu jizhina ja Nkambo Yesu. 17Ponkapo be batentekele maboko abo ne kutambula batambwile Mupashi Wazhila.
18Kabiji aye Shimona byo amwene amba Mupashi Wazhila upanwa pa kwibatenteka maboko batumwa, waletele mali, 19amba, “Bampe ne amiwa buno bulume, bwa kuuba ne amiwa ye nabiika maboko ami, watambula Mupashi Wazhila.”
20Bino Petelo wamwambijile amba, “Mali obe onaike ne obewa mwine pamo, mambo obewa walanguluka amba, wakonsha kutambula kya bupetu kya Lesa na mali. 21Kechi ujimo na lubaji nangwa pachechetu mu ano mambo ne, mambo muchima wobe kechi waoloka ku meso a Lesa ne. 22Lapila, ku buno bubi bobe, ne kulomba kwi Nkambo amba, kana apo kino kintu kiji mu muchima obe kisakukulekelwa. 23Mambo namona byo uji na ndulu ya bululu ne mu mfungwa ya bubi.” 24Kepo Shimona a ambijile Petelo ne Yoano amba, “Ndombelelaiko anweba kwi Nkambo, namba abyo byo mwa amba kechi bimfikile nangwa kimo ne.”
25Byonkabyo abo, byo bashimwine ne kwamba naabo mambo a Nkambo, babwelele ku Yelusalema, kasa basapwila Mambo Awama mu mizhi yavula ya bena Samaliya.
Filipa ne ntungu wa ku Itiopia
26Kabiji malaika wa Nkambo wamwambijile Filipa amba, “Imana, uyenga ku kabeta ka bulenge#8:26 Ku kabeta ka bulenge: Nangwa amba pa kushinkimana juba mu jishinda jafuma ku Yelusalema jaya ku Gaza japita mungyetu.” (Mu kiselebwa.)#8:26 Awe mukwakwa kechi ba mwingijisha ano moba nenangwa amba; Awe ye mukwakwa wa mu kiselebwa
27Ne aye waimene kaye. Kabiji kwajinga muntu mwina Itiopia, ntungu wapewe luusa lukatampe kwi Kandese mfumu wamukazhi wa bena Itiopia, aye wajinga kalama wa nsabo yanji yonse, waishile ku Yelusalema na kupopwela, 28kabiji wabwelelenga kasa aikala mu kalaki wanji. Kasa atanga mu buku wa Isaya ngauzhi. 29Ponkapo Mupashi Wazhila wamwambijile Filipa amba, “Fwenya kubwipi, ulamate kuyewa kalaki.”
30Kepo Filipa anyemejile konka kabiji wamumvwine byo atangilenga mu buku wa Isaya ngauzhi ne aye wamwipwizhe amba, “Mubena kwibyumvwa byo mubena kutanga nyi?”
31Ne aye wa ambile amba, “Nakonsha kumvwa byepi kwakubula ne wa kundumbulwila?” Ne aye wamwichile Filipa kukanjila mu kalaki ne kwikala nanji. 32#Isa 53:7,8Pene poatangilenga mu binembelo, po pa byo bino byambo amba,
“Bamutwajile nobe mukooko ye basaka kwipaya,
byonka bizhindama mwana mukooko mu kyenyi kya bamutenda boya,
byonkabyo ne aye kechi wa asamikile kanwa kanji amba ng'ambe ne.
33Mu kupelulwa kwanji bafumya kuchibilwa nsambu yanji.
Ng'anyi ukamba mambo a kisaka kyanji?
Mambo mweo wanji bamufumyapo pano pantanda.”
34Kabiji aye ntungu wamwambijile Filipa amba, “Nemusashijila namba aye ngauzhi pa kwamba bino wateela ng'anyi? Aye mwine nyi, inyi muntu mukwabo?” 35Ponkapo aye Filipa watendekele kwamba, watatwile pa kyonkakya kinembelo ne kusapwila wamusapwijile mambo a Yesu. 36Ne byo bakiilenga mu jishinda, bafikile ne kwajinga mema, kumvwa aye ntungu amba, “Talai mema ao, kisakunkanya kubatizhiwa i kika?”
37 Ponkapo Filipa wamwambijile amba, “Umvwe mwaitabila na muchima wenu yense, mwakonsha kubatizhiwa.”
Kumvwa aye amba, “Naitaba namba, Yesu Kilishitu ye Mwana Lesa.” #8:37 Ma buuku amo akala kechi aji na veleshi 37 ne.
38Ponkapo wakambiizhe kalaki amba emane, kabiji bonse babiji baikijile mu mema, Filipa ne aye ntungu, kabiji wa mubatizhile. 39Kabiji byo batuntukile mu mema, Mupashi wa Nkambo wamutwajile Filipa, ke kikupu, ne aye ntungu kechi wamumwenepo jibiji ne, kabiji wayile mu jishinda janji na lusekelo. 40Bino Filipa watainwe pa Azotusa#8:40 Uno muzhi bamutela amba Ashidoda mu kino kimye. kabiji wapichile mu kyalo kasa asapwila Mambo Awama mu mizhi yonse, ne byo akafikile ku Kesalea.
S'ha seleccionat:
Byubilo 8: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.