Byubilo 26
26
Paulo byo e ambijile mambo anji ku meso a kwa Agilipa
(Byubilo 9:1-19; 22:6-16)
1Kabiji Agilipa wamwambijile Paulo amba, “Pano bakuleka wiambile obewa mwine.”
Ponkapo Paulo watanyikile kuboko ka ambe ne kwamba amba.
2“Anweba bamfumu ba Agilipa, amiwa leelo nalanguluka namba, ku muchima kwatoka, byo naya neambile ku meso enu mwayila byonse byo banshinawina ku Bayudea, 3mambo anweba mwayukishatu mwayila bisela byonse ne mambo onse aji mu Bayudea. Kyokyo nemusashijila namba, aki ntekelai muchima, mung'umvwe. 4Bino bwikalo bwami kufuma ne ku bwanyike bwami, bonka bwatatwijile mu mukoka wami ne ku Yelusalema, bwa yukanyikwa ku Bayudea bonse. 5#Byu 23:6; Fil 3:5Kasa bayuka ne bwikalo bwami bwakala, kana baswa kushimuna, byo najinga Mufaliseo, kasa ndonda mwayila lwipatulo lwakila mu kulama mizhilo lwa mu kupandawila kwetu. 6Kabiji pano naimana kuno na kuchibilwa mambo, mambo onka a kuketekela mulaye ye alayile Lesa ku bashakulu betu, 7ku yeo mulaye mikoka yetu jikumi na ibiji, kasa bapopwela Lesa na muchima yense bufuku ne mute, ya ketekela kufikako, Kabiji mambo a luketekelo luno oo nashiinwa ku Bayudea, anweba Mfumu! 8Mambo ka anweba bonse kyo mwalangulukila amba, kyo kintu kyabula kufwainwa kwitaba amba, Lesa usangula bafu?”
9 #
Byu 8:3; 22:4,5 “Ne amiwa mwine nalangulukile namba kyamfwainwa amiwa kuuba byavula byakulengulula jizhina ja Yesu wa ku Nazala. 10Kabiji kyokyo naubile mu Yelusalema. Natambwile luusa ku bang'anga bakatampe ne kushinkila bazhijikwa mu kaleya; kabiji byo bebachibijile mambo a kwibepaya ne amiwa naswishishe. 11Ne ba kabishishenga javula mu mashinagoga onse kasa ngeseka kwibakanjikizha ku kana lwitabilo lwabo. Ne bazhingijilenga bingi, mambo a kwibapata ne balondaizhenga ne ku mizhi ya mu byalo bingi.”
Paulo waamba byo aitabijile
(Byubilo 9:1-19; 22:6-16)
12Na mambo a kino kintu kyonayijile ku Damasakasa kasa nji na luusa ne kutumwa kufuma ku bang'anga bakatampe. 13Kabiji mu jishinda pa kushinkimana juba, “Anweba Mfumu, Namwene kyeya kyafumine mwiulu, kyakijile kusaama kwa juba, kasa kyansaamina konse ne bonailenga naabo pamo. 14Kabiji byotwaponene panshi bonse, naumvwine jiwi kasa jing'ambila mu Kihebelu amba, ‘Saulo, Saulo, ubena kummanyikila ka? Ubena kwikatazha kusobwela kuulu pa mingele.’ 15Ne amiwa namba, yenu ba ng'anyi Nkambo? Kumvwa Nkambo amba, yami Yesu ye ubena kummanyika obewa. 16Pano buukapo wimane. Mambo na kumwekela namba nkutongole wikale ke wamwingilo, ne kamonyi wa abya bintu byo wamona mwi amiwa, kabiji ne wabyobya byo nkakumwesha kulutwe. 17Nkakupokolola ku bantu bena Isalela ne ku Bangentila ko nakutuma. 18Na kwibalabisha meso abo bavundamine ku mfishi balulukile ku kyeya kabiji bavundamine ku luusa lwa Satana balulukile kwi Lesa, batambule lulekelo lwa mambo, ne buswanyi mwi abo bazhijikwa na lwitabilo lwa mwi amiwa.”
Paulo byo a shimwine mwayijile mwingilo wanji
19“Onkao mambo, anweba Mfumu Agilipa, kechi nalengulwile kimwesho kyafumine mwiulu ne. 20#Byu 9:20,28,29 Bino patanshi natatwile kwibabula bena Damasakasa ne ba ku Yelusalema ne bamonse mu Yudea, ne Bangentila pamo, amba balapile ne kwalulukila kwi Lesa, bobe mingilo yafwainwa lulapilo. 21Onkao mambo Bayudea bankwachile mu nzubo ya Lesa, ne kweseka kungipaya. 22Bino kufuma kujino juba natambwile bukwasho bufuma kwi Lesa, amiwa ko kwimana ko nakimana mu jino juba ja leelo, kasa ne babuujisha bacheche ne bakatampe, kwambapo nangwa kingi ne, kana byonka bya ambile bangauzhi ne Mosesa, amba bikafika. 23#1 Ko 15:20; Isa 42:6; 49:6 Byo kyafwainwe aye Kilishitu kumanama, kabiji pa kwikala mutanshi kusanguka mu bafu ekale wa kusapwila mambo a kyeya ku bantu bena Isalela ne ku Bangentila.”
24Kabiji byo akyambilenga byonkabyo, Fesatusa wa ambile na jiwi jikatampe amba, “Obewa Paulo, wakonya! Kufunda kobe kukatampe kubena kukwalula ke mukonye!”
25Pakuba aye Paulo amba, “Kechi nakonya ne, anweba Fesatusa, wa buneme bwine! Kabiji mbena kwamba byambo bya kine ne bya butekanye. 26Mambo aye mfumu, ye mbena kwambilapo wibiyuka bino bintu, kabiji nakonsha kwamba na kuchinchika mambo nayuka namba, kafwako kintu nangwa kimo kya mu bibye kyafyamika kwi aye ne, mambo kino kechi kyaubilwe kumbaji ne. 27Anweba Mfumu Agilipa, mwaitaba bangauzhi nyi? Nayuka namba mwaitaba!”
28Ne Agilipa wa ambijile Paulo amba, “Mu kimye kicheche wakonsha kungitabizha amba, ngaluke ke mwina Kilishitu nyi?”
29Kumvwa Paulo amba, “Nasakisha kwi Lesa namba, nangwa mu bicheche nangwa mu byavula, kechi anweba yenka ne, kabiji ne bonse ba bena kung'umvwa mu jo jino juba ja leelo, bekale byonka byonji, kanatu mu yo ino mfungwa ne.”
30Ponkapo aye mfumu waimene, ne aye ndamakyalo, ne Belenise, ne bo aikajile naabo pamo. 31Kabiji byo bayile kwa bunke, ba ambang'ene bene na bene amba, “Uno muntu kechi wauba kintu kyafwainwa lufu nangwa kukaswa ne.” 32Ne Agilipa wa ambijile Fesatusa amba, “Uno muntu inge kechi wamusashijile Kesala ne, inge kyawama kumukasulula.”
S'ha seleccionat:
Byubilo 26: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.