Byubilo 24
24
Mambo o bamupele Paulo
1Kabiji pakupita moba atanu, Ananyasa ng'anga mukatampe waishile ne bamo bakulumpe, ne umo wa kwibambilako mambo, jizhina janji Teletulusa. Ponkapo bamubujile aye ndamakyalo mambo a kwa Paulo. 2Kabiji byo bamwichile, Teletulusa watatwile kumushiina amba.
“Mwane, byo mwitwikazha bulongotu na mutende wavula, ne byo mwamunengezhezha bintu byawama uno mukoka. 3Anweba ba Felikisa wa buneme bwine, twibitambula byonse, konse, na kupika sante mukatampe. 4Kabiji namba kechi nemukokeshe na byavula ne, nemusashijila namba, monka mu kutekanya kwenu, mwitumvwe mutuno tu mambo tucheche. 5Mambo uno muntu twamumona namba ye mulwanyi, ulengela bantu kusatuka mu Bayudea bonse pano pantanda ponse, kabiji ye mwine ntangi mukatampe mu lolwa lwipatulo lwa bena Nazala. 6Kikwabo nakyo waesekele kuzhilulula nzubo ya Lesa, bino twamukwachile.#24:6 Amo mabuku a mu kigiliki anungako maveleshi 6-8Twanengeezhe kumuchibila mambo monka mwayila mizhilo yetu: 7 Pakuba aye mwine mukulumpe wa bashilikale, Lisiasa, waishile ne kwitwangataye mu maboko etu na lupata lukatampe 8 Kasa akambizha amba bamushiina beye ko muji Twanengeezhe kumuchibila mambo monka mwayila mizhilo yetu. 7Pakuba aye mwine mukulumpe wa bashilikale, Lisiasa, waishile ne kwitwangataye mu maboko etu na lupata lukatampe. 8Kasa akambizha amba bakumushiina beye ko muji, bino anweba bene pa kumwipuzha, mukayuka abya byonse byo twamushiina.” 9Bayudea nabo bamushinawijile pamo, kasa betaba amba, ee, ibyo.
Paulo bya ambile bya kwipokolola kwi Felikisa
10Kabiji aye ndamakyalo byo a mulabwile amba ambe, Paulo wakumbwile amba.
“Mwane, byo nayuka namba anweba mwaikala myaka yavula na kwibachibila mambo bamu uno mukoka, nasekela bingi pa kwiambila mambo ami kwi anweba. 11Mwakonsha kuyuka amba moba kechi akila jikumi ne abiji po nayijile ku Yelusalema na kupopwela ne. 12Kabiji kechi bantaine kasa mpachika na muntu mu nzubo ya Lesa nangwa kuvulumuna jibumba ne, nangwa mu mashinagoga nangwa mu muzhi ne. 13Kechi bakonsha kumwesha bishinka bya bino bintu byo banshiina ne. 14Pakuba kino nekitaba kwi anweba namba, mo jayila Jishinda jo bateela abo amba, lwipatulo lubi, mo mompopwela Lesa wa bashakulu betu, kasa naitaba byonse byayila mwayila Mizhilo, ne byanembwa mu mabuku a ba Ngauzhi. 15Naikala na luketekelo lumo mwi Lesa, lo baitaba abo bene amba, kukekala lusanguko lwa baoloka ne babula koloka. 16Byonkabyo nateshako bingi muchima namba ngikale na muchima wabula mambo kwi Lesa ne ku bantu moba onse. 17#Byu 21:17-28 Bino pakupita myaka yavula, naishile na kuleeta bya bupe ku balanda bamu mukoka wami, ne kupana milambo. 18Byo naubilenga bino pobantaine mu nzubo ya Lesa kasa nezhijika. Kechi kwajinga jibumba ne, nangwa kiwowo ne. 19Kana Bayudea bamo ba ku Asha bajingako, bo baji kufwainwa kwikala kuno ku meso enu, na kunshinawina, kana bamona mambo mwi amiwa. 20Nangwa bano bonka bateele kyatama kyo bamwene byo naimene mukije kyabo, 21#Byu 23:6poso kino kintu kimo kyonka, kyo nabijikile byo naimene mukachi kabo namba mambo a lusanguko lwa bafu o nachibilwa leelo ku meso enu.”
22Pakuba Felikisa, byo ayukishe bulongo mambo a joja Jishinda, wibakainye amba, “Pembelelai, kana Lisiasa mwine mukulumpe wa bashilikale akeye, po nkemuchibila mambo enu.” 23Ponkapo wakambiizhe umo mukulumpe wa bashilikale kumulama, ne kumubila lusa, kabiji amba kechi ukanye balunda nanji kumukwasha ne.
Paulo ku meso a kwa Felikisa ne Dulusila
24Pakupita moba amo, Felikisa waishile ne Dulusila, mukazhanji, wajinga mu Yudea, ponkapo wakechile Paulo amba bomvwe mwayila lwitabilo lwa mwi Kilishitu Yesu. 25Kabiji byo a ambilenga naabo mambo a bololoke, ne a butekanye, ne a kije kikeya, Felikisa ke moyo mukatampe amba, “Pano aki yanga; kabiji kana namona kimye kyafwainwa nkakwita konji.” 26Pa kimye kimo wa ketekejile amba bakamupa mali kwi Paulo. O ene mambo wakelwanga kumwita na kwisamba nanji.
27Pakupwa myaka ibiji, Polokiusa Fesatusa wapingile pe Felikisa; ne aye Felikisa byo asakile kwibatokesha Bayudea pa muchima, wamushiile Paulo kasa akaswa.
S'ha seleccionat:
Byubilo 24: KNTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Kaonde New Testament © The Bible Society of Zambia, 2019.