GŨCOKERITHIA MAATHANI 15
15
1Na rĩrĩ, mĩaka mũgwanja yathira, nĩũgathondeka ũhoro wa atĩ mathirĩ marekanĩrũo. 2Naguo ũhoro ũcio wa kũrekanĩrũo mathirĩ ũgathiaga ũũ: mũndũ o wothe ũrĩa ũrĩĩrĩirũo thirĩ arekere Mũisiraeli ũrĩa ũngĩ kĩrĩa aamuohoreire; kĩndũ kĩu aamuohoreire-rĩ, ndakanetie Mũisiraeli ũcio ũngĩ, kana mũrũ wa ithe wanyu, nĩ ũndũ ũhoro wa Jehova wa atĩ mathirĩ marekanĩrũo nĩũhunjanĩirio. 3Mũrũrĩrĩ wahota kũmũrandũra thirĩ; no rĩrĩ, kĩrĩa gĩaku gĩothe kĩĩ na mũrũ wa ithe wanyu-rĩ, guoko gwaku nĩgũkĩrekanĩre; 4nĩguo gũtikagĩe athĩni thĩinĩ wanyu, (nĩ gũkorũo Jehova ndarĩ hingo atagakũrathima wĩ bũrũri ũrĩa Jehova Ngai waku akũheaga ũwĩgwatĩre ũtuĩke waku), 5ũngĩkorũo nĩũkarũmia uuge wa Jehova Ngai waku na kĩyo, o na ũmenyagĩrĩre gwĩka maũndũ mothe marĩa ngũgwatha ũmũthĩ. 6Nĩ gũkorũo Jehova Ngai waku nĩagakũrathima, o ta ũrĩa aakwĩrire; na nĩũkohoragĩra ndũrĩrĩ nyingĩ indo, no rĩrĩ, wee mwene ndũkohoraga harĩ cio; ningĩ nĩũgaathaga ndũrĩrĩ nyingĩ, no cio itigagwatha.
7 #
Alaw 25.35. Na rĩrĩ, hangĩkorũo nĩharĩ mũndũ mũthĩni wa andũ a rũrĩrĩ rũanyu ũtũũrĩte mũciĩ o na ũrĩkũ wa bũrũri ũcio wanyu, o ũcio Jehova Ngai waku akũheete, ndũkanamũũmĩrie ngoro yaku wage kũmũiguĩra tha, kana ũkarĩhĩre mũrũ wa ithe wanyu ũcio mũthĩni; 8no rĩrĩ, ndũrĩ hingo ũtakamũtanahĩra, na ũmuohoragĩre indo iria imũbatairie cia kũmũnina bata. 9Wĩmenyerere ndũkanagĩe na meciria moru ngoro-inĩ yaku, ũkiuga atĩrĩ, Mwaka wa mũgwanja, na nĩguo wa kũrekanĩrũo mathirĩ, nĩũkuhĩhĩirie; narĩo riitho rĩaku rĩgĩe na kĩhoho nĩ ũndũ wa mũrũ wa ithe wanyu ũcio mũthĩni, wage kũmũhe kĩndũ; nake akaĩre Jehova nĩ ũndũ waku, nawe wonwo ta wĩhĩtie. 10Ndũrĩ hingo ũtaagĩrĩirũo nĩ kũmũhe, na hĩndĩ ĩrĩa ũkũmũhe kĩndũ ngoro yaku ndĩkanakĩiguĩre ruo; nĩ gũkorũo Jehova Ngai waku nĩagakũrathima nĩ ũndũ wa ũndũ ũcio wĩkĩte mawĩra-inĩ maku mothe, o na maũndũ-inĩ mothe marĩa ũkahutagia ũmeke na guoko gwaku. 11#Mat 26.11; Mar 14.7; Joh 12.8.Nĩ gũkorũo bũrũri waku ndũrĩ hĩndĩ ũtarĩgĩaga athĩni o na rĩ; na tondũ ũcio ngũgwatha ngwĩre atĩrĩ, Ndũrĩ hingo ũtaagĩrĩirũo nĩ gũtanahĩra mũrũ wa ithe wanyu, o na mũndũ ũrĩa mũkĩa, o na ũrĩa mũthĩni, arĩa matũũranĩtie nawe bũrũri wanyu.
12 #
Alaw 25.39-46. Angĩkorũo mũrũ wa ithe wanyu, Mũhibirania, kana mũndũ-wa-nja Mũhibirania, nĩendetio kũrĩ wee, nake agũtungatĩre mĩaka itandatũ-rĩ, mwaka wa mũgwanja wakinya nĩũkamwĩtĩkĩria ethiĩre o ro ũguo, oime gwaku. 13Na rĩrĩ, wamwĩtĩkĩria ethiĩre o ro ũguo, oime gwaku, ndũkanareke athiĩ moko matheri; 14no nĩũkamũhe na ũtana indo ciumĩte rũũru-inĩ rũaku, o na ciumĩte kĩhuhĩro-inĩ gĩaku kĩa ngano, o na kĩhihĩro-inĩ gĩaku kĩa ndibei; o ta ũrĩa Jehova Ngai waku agakorũo akũrathimĩire indo-rĩ, ũguo noguo ũkamũhe. 15Ningĩ ũririkanage atĩ o nawe warĩ ngombo bũrũri wa Misiri, nake Jehova Ngai waku agĩgũkũũra; na tondũ ũcio nĩndagwatha ũmũthĩ wĩkage ũndũ ũcio. 16Na nĩgũgakinya atĩrĩ, atĩ angĩgakwĩra ũũ: Niĩ ndikuuma gwaku; nĩ gũkorũo nĩakwendete, o na akenda andũ a nyũmba yaku, nĩ ũndũ nĩonaga gwaku gwĩ kwega, 17nĩũgakĩnyita mũkuha ũmũtũrĩkĩrie gũtũ mũrango-inĩ, agĩcoke atuĩke ngombo yaku tene na tene. O nayo ndungata yaku ya mũndũ-wa-nja, ũkamĩĩka o ta ũguo. 18No rĩrĩ, hĩndĩ ĩrĩa ũkũmwĩtĩkĩria ethiĩre o ro ũguo oime kũrĩ wee, ndũkanone ta arĩ ũndũ wĩ hinya; nĩ ũndũ nĩagũtungatĩire mĩaka ĩtandatũ, nayo mĩaka ĩo ĩkahaana ta maita merĩ ma mũcara wa mũndũ wandĩkĩtwo nĩwe; nake Jehova Ngai waku nĩagakũrathima maũndũ-inĩ mothe marĩa wĩkaga.
19 #
Thama 13.12. Atĩrĩrĩ, marigithathi mothe ma njamba ma nyamũ iria irĩciaragwo nĩ ndũru ciaku cia ng’ombe, o na ndũru ciaku cia mbũri, nĩũkamaamũrĩra Jehova Ngai waku, ũmatherie; ndegwa ciaku cia marigithathi ndũkanacirutithie wĩra o na ũrĩkũ, kana ũmure guoya wa nyamũ cia marigithathi cia rũru rũaku rũa ng’ondu. 20Nyamũ icio-rĩ, nĩũgacirĩagĩra mbere ya Jehova Ngai waku mwaka o mwaka, o handũ harĩa Jehova agathura, mũrĩagĩre ho, wee mwene mwĩ hamwe na andũ a nyũmba yaku. 21No rĩrĩ, nyamũ ĩmwe ya icio ĩngĩgakorũo ĩrĩ na kaũũgũ, ta ĩgĩthua, kana ĩrĩ ndumumu, kana ĩrĩ na kaũũgũ o na karĩkũ-rĩ, ndũkanamĩrutĩre Jehova Ngai waku igongona. 22No nĩũkamĩrĩĩra o mũciĩ waku thĩinĩ; nayo ĩrĩagwo nĩ andũ arĩa me na thahu o na arĩa matarĩ naguo, o ta ũrĩa thiya na thwariga irĩagwo. 23#Kĩam 9.4; Alaw 7.26,27; 17.10-14; 19.26; Gũcok 12.16,23.Ũndũ ũtageka no kũrĩa ũtakarĩa thakame ya nyamũ icio o na atĩa; nĩ gũita ũkamĩitaga thĩ o ta ũrĩa maĩ maitagwo.
S'ha seleccionat:
GŨCOKERITHIA MAATHANI 15: OGKBIBLE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019