ROMA 3
3
1Jàka tuna nu nggàra-yaka na linguna la panjadi tau Yahundi? Dàngu nggàra-yaka na linguna la pa-namatu-ya na huri kàri? 2Jiangu-maka duna nadangu na linguna! Na mawu - wungangu-ma, ba la tau Yahundi-duya na ngia pa-pakata-nanja da puluna paraïna i Ala. 3Tàka nggiki-naka ihu jàka nda natuturu hawiangu na tau Yahundi? Ka nda tuturu wàngu-mana-nyaka ihu i Ala rukuna na nda tuturu-da nu? 4Langatàka nda hidama! Nadu na-lohangu-ma duna ba na-padeningu mànu-ma i Ala, jiapa ka na-kambàliku ndàbakai na tau. Ninya na pa-tulihu la Huratu Matua,
“Màtawa ka na-lohangu la kareuku-mu bau pa-deningu,
dàngu bau talu jàka jiayaka na rehi pa-tandangu-kau,” ba wàna.
5Na nyuna jàka pa-parukangu wànanya pa-lohangu nu na molana i Ala, rukuna ba nda tawunda ma-padeningu nyuta, nggikina wàndaka bàdi nyuta? Nda namola-a i Ala jàka nahuku-nda nyuta? wàndaka. (Jàka pa-namatu ninya la hada tau ràka-mana nyuna na paàrangu nuna.) 6Nda hidama! Nadu jàka nda namola i Ala nggiki hama peku-nakaka Nyuna la pa-patanda-nya yia na pinu tana?
7Na nyuna jàka pa-parukangu wa bidua-nanyai pandudu na pa-deningu-na i Ala, rukuna nu na pawunda manda pa-deningu hi kiri wotunya i Ala, ka nggiki-naika duna hi panjala-ya na tau na mawunda ma-akatu ba tau njalaya? 8Ka nggiki-naika duna hi nda pekuna ka tuna yia na paniinda, “Màlawa nyuma ka tawunda bia ma-akatu, ka peku nduduna na mahàmu?” hi nda wànda. Ningumai nyuna tau ma-paaka-ngga ba mbàda tuna nuka na paniinggu nyungga. Da tau tungu nu ràka-mana ka nahuku-nja paraïna i Ala.
Nda ana haàtu-a mawunda pambuha-na i Ala
9Màla nu narihi hàmupa ihu na mandapu-nda nyuta ba tau Yahundi-ta welingu la ma-ndapuna na banjaru hawiangu? Nda hidama!#narihi hàmupa ... welingu la ... banjaru hawiangu? Nda hidama!jàka ndia: Narihi nda hàmu-mapa ihu na mandapu-nda nyuta welingu la mandapu-na na banjaru hawiangu? Nda tu mànu-ana nu. Mbàda jakaru-manggu-nyaka, na tau Yahundi dàngu na banjaru hawiangu naro-duku ndàbanja njala ba wànggu. 10Hama tuna na pa-tulihu la Huratu Matua,
“Nda ana haàtu-a ma-padeningu,
11nda ana haàtu-a ma-jàngapu-ya
dàngu nda ana haàtu-a malumu-nya i Ala.
12Mbuu ndàbana na tau mbàda
tanggalara-daka welingu lai Ala;
mbàda njàrangu ndàba-daka.
Nda haàtu-a mawunda
ma-padeningu; nda ana haàtu-ma!
13Da kalàmba nggoruda beri reti ma-hanganga-ha.
Da kaputingu-da da-pandutu
mbàdangu welingu la làmada,
tàka da tàda ngaruda
da-hawurutungu pulu akatu hama
tuna wai upahu ularu.
14Da ngaruda da-hulungu ràtungu
dàngu paakangu.
15Na-kahàruku na panggada jàka
da-orangu la pa-pajàra tau dàngu la pa-pameti tau.
16Pakabu wàngu dàngu pa-handuka wàngu-maya,
na pa-wewaru-da la nggi - nggini.
17Dapoki-nya na ngarangia mànjaku,
18dàngu nda datembi-aya i Ala,” ba wàna.
19Nàhu pi-ndanyaka, mbuu ndàbada da pa-tulihu la uku anggama Yahundi, ba ndumada da tau ma-ngiangu la lumbu pareta-na na ukuha. Nu ba tuna nda haàtu-apa maningu pelu pakangu-na, hi na-paàndangu na-karuhi-nanya nggubulu-na na pinu tana i Ala. 20Nadu ba nda haàtu-a majia papeku da bia-nanya i Ala rukuna ba nawunda-ha da maninja la uku anggama. Tàka làti duna, nu na uku paloha-ananya duna la tau ba tau njalaha nyuda.
Nggiki hamana i Ala ba na-pahia-nya na tau la pa-papeku dànya Nyuna
21Tàka nàhu mbàda paita-nanyaka na ànda paraïna i Ala, jàka nggiki hamana bàdi na tau ka na-papeku dànya Nyuna; dàngu nu na ànda na pawàngu nda na-pandetungu-a la uku anggama Yahundi. Da mbukuna i Muha dàngu da mbukuda da wunangu da-peka-maya nuna, 22ba mbulungu jàka pawai lai Yehu Karitu-a bàdi hi nahunggu ànda li na tau la pa-papeku dànya i Ala. Nu na ànda li pawua-na i Ala nduma ndàbana na tau pawai lai Karitu-maya; maa ba nda ningua hekangu-da: 23mbuu ndàbana na tau mbàda njala ndàba-madaka dàngu mbàda marau ndàba-mada-nyaka i Ala na mawu-kuya la pa-pamàna-nja. 24Mbulungu rukuna na pa-namungu pawua juana i Ala-a duna, hi kiri hàmu belina na papuingu-na na tau dàngu i Ala; na ànda li na pawàngu jiaya: ba na-pamara-ya na tau paraïna i Yehu Karitu. 25I Ala na mangeji-nya i Karitu Yehu ka paloha-nya la metina ba mara-nanyaka welingu la njala na tau mapawai lai Karitu. Hi tuna nu na pawunda-na i Ala, paloha-nanya na molana. Nadu la rehi na ma-làpahu ba nda nahuku-anya na tau la njalana paraïna i Ala, ruku palera-nanya eti. 26Tàka nàhu pa-luangu-nanyaka limana hanggangu la njala ba na-paita-nya mbutina na molana. Nu ba tuna nu, paloha-nanya na pa-deningu-na; dàngu nimbihu-na na tau mapawai lai Yehu, na-paloha-nya ba tau mambàda papeku daa belinya i Ala-yaka.
27Jiaya ba tuna nda ningu-apa latana ka ta-hamemu wàngu. Nggikina hi tuna nu? Jiaya ba tawunda-ha da maninja la uku anggama Yahundi ka ihu? Ndia-a. Tàka rukuna ba tapawai-a. 28Nadu ba tuna yia na mbulungu-na: Nda jia-aya ba ruku wunda-naha da maninja la uku anggama Yahundi hi kiri papeku-na na tau dàngu i Ala, tàka rukuna ba napawai lai Yehu Karitu duna.
29Jàka ndia, ka Ala tau Yahundi-aya nu i Ala? Ka nda Ala banjaru hawiangu-mbuya? Ala banjaru hawiangu-mbuya duna! 30Nadu ba haàtu-ana na Ala. Nyunama duna na ma-pahia-nja da tau Yahundi la pa-papeku dànya i Ala rukuna ba dapawai. Dàngu hili Nyunamai na ma-pahia-nja da tau la banjaru hawiangu pa-papeku dànya i Ala; nuna nu jia-mbuya rukuna ba dapawai. 31Nu ba tuna, tawàru-nyaka bàdi ihu na uku anggama Yahundi, rukuna ba mbàda pawai-ndaka lai Karitu? Nda hidama na matuna nu! Jiapa pamàndu-kinda-nyaipa nuna na uku, nu ba tapawai.
S'ha seleccionat:
ROMA 3: KAM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)