LUKAHU 2
2
Na dedina i Miri Yehu
(Mat. 1:18-25)
1La rehi nuna i Hanganji Bokulu Anggutuhu na-wuangu pareta màta mbuu ndàbana na tau la lumbu pareta Roma ka na-patamangu tamuna la huratu diha. 2Yiana jiaya na kawunga diha tamu tau na papaloku ba i Kiriniu na ma-nggumbunuru la tana Hiria. 3Mbuu ndàbana na tau la rehi nu nalaku pa-patamangu tamuna la paraina haàtu - haàtu.
4I Yuhupu na-hadangu welingu la Naharitu tana Nggalilia, nalaku la Mbetulehimu la Yundia, ngia padedi-na i Ndautu; nadu i Yuhupu ba wàlana i Ndautu-ya. 5I Yuhupu na-patamangu tamuna hamanai i Maria tubana na mambotu ihina. 6Ba la Mbetulehimu-haka, toma-nanyaka na wula habola-na i Maria. 7Na-paanangu haàtu anakeda mini, na kawunga anana. Na anana na-palumburu wànya paràha, hàla hi bànjalu-ya la karaba maningu rembi uhungu; nadu ba nda dahunggu pa-ngiangu ngia patodu-da.
Da ma-pawangu dàngu da papalewa
8La rudungu nuna ninja da ma-pawangu ba talànga daidanja da mbimbida la maràda pa-rumbangu la ngabana lai nu. 9Hi jia pa-wuwangu biana wikina na papalewa-na i Miri lai nyuda, na kajilaku welingu lai Miri na-pahambila-ha nyuda, himangàdatu nda ukuha. 10Tàka na papalewa, “Àmbi mangàdatu! Nadu nyungga ngàndi-nggunggai lii hàmu lai nyimi – na lii na ma-panggaüru langatàkaya na tauka mbuu ndàbana. 11La lodu nàhu la paraina i Ndautu nadedi-ka na Hanganji Ma-pamàna-nggai, nu i Karitu, na Miri. 12Yiana-ya na tandana: Nyimi napa mitàka-nya na haàtu na ana rara na pa-palumburu wàngu paràha hi bànjalu-ya la hau karaba,” wànanja.
13Nu na papalewa hi jia ni bianja da karia-na da papalewa dangu, da mawotu-nya i Ala, 14“Pa-wotungu-ya i Ala la awangu majangga!
Dàngu la pinu tana, mànjaku-nanyaka
na tau na ma-pahàmu-ya na etina i Miri!” wàda.
15Ba da-dunjaku-njaka paraï da papalewa ba dabeli la awangu, panii-danyaka da ma-pawangu dàngga anguda, “Màla-ndawa ka talua la Mbetulehimu ka taita-ya na lii na matumbu na-papatàka-nanda i Miri,” wàda.
16Ka manyamalu laku-madua-danyaka, hi datàka-nja i Maria dàngu i Yuhupu, lupa na ana rara na ma-mahuru la karaba.
17Da ngara ma-pawangu ba daita-yaka na ana rara, wàlahu-danyaka na papanii-da da papalewa rukuna nuna na ana rara. 18Na-hangàtaru hàla na tau na marongu-ya nuna na papanii-da da ma-pawangu. 19Na nyuna i Maria na-pakàpa hàla-maya nuna la etina dàngu hi na-pangàda-nya. 20Da ma-pawangu beli-danyaka duda la maràda ba dàngu wotu pa-mangara-danya i Ala, nadu mbuu ndàbada da parongu-da dàngu da pangita-da, da-pajàngapungu hàla hama tuna ba wàda da papalewa.
Ba tunya tamuna i Miri Yehu
21Ba walu mbua lodu-naka na umuru-na, kàri-danyaka nuna ana rara. Hi datunya tamuna, Yehu, wàdanya, na tamu pambàda wua-nanya païna papalewa ba ndedi la kambu ina-nanya.
I Miri Yehu ba huharu-nya lai Miri la Umana i Miri
22Toma-nanyaka na rehina i Yuhupu dàngu i Maria ba da-paloku-ya na huri pa-matua, nunjuya na ukuna i Muha. Jia-duyaka hi da-karia-nya na ana rara la Yeruhali la pa-huharu-nya lai Miri. 23Nadu la ukuna i Miri tuna yia na pa-tulihu, “Nimbihu-da da kawunga anaka, huharu-manja bàdi lai Miri,” wàna. 24Dawuku-mbuya nyuda la pawotu kameti maraku, nu da mbara kadua ngiungu jàka ndia dua ngia kulundiha kanguraku hama tuna na pa-kawuku daa la Ukuna i Miri.
25La rehi nuna la Yeruhali ninya na haàtu na tau Hamiungu-ya na tamuna. Nyuna tau hàmuya, na-mangàdatu-nya i Ala dàngu patia-nanya padua na rehina i Ala ba na-pamàna-nya na Ihirailu. Na Ngahuna i Ala tunggulu-mananya, 26dàngu i Ngahuna i Ala mbàda peka-nanyaka, ba nda jia meti-ana nyuna jàka ndedi-madu naita-ya na Hanganji Ma-pamànangu na paràndi-na i Miri. 27Ruku pa-jujungu-na na Ngahuna i Ala, tama-nanyaka la Umana i Miri i Hamiungu. La rehi nu i Yuhupu dàngu i Maria datama ngàndiya i Yehu, na maana rara-iyapa la pa-paloku-ya na lii ba wàna la uku anggama. 28Ka kei-nanyaka i Hamiungu na ana rara hi nalunggu-ya, hi nawotu-nya i Ala.
29“Nàhu Miri patutu-munyaka na paràndi-mu.
Màtawa nyungga yia atamu ka kumeti dàngu hàmungu.
30Nadu ba ita mata-nggunyaka i Ma-pamànangu welingu lai nyumu.
31I Ma-pamànangu mbàda payema-mamu-nyaka ndumana mbuu ndàbana na banjaru:
32ba hama tuna harii ma-pahandarakungu àndaya nduma mbuu ndàbana na banjaru hawiangu, ka peku hurungu-da lai nyumu; na harii na mangàndi-nya patembi wàngu na banjaru-mu na Ihirailu,” wàna.
33Na amana dàngu na inana na anakeda nuna hangàtaru-danyaka ba darongu-ya na papeka-na i Hamiungu rukuna na anada. 34I Hamiungu na-pakanyuru-nja dàngu hi napanii-nya i Maria, inana na anakeda, “Na anakeda yiana mbàda kawàri-mana-nyaka paraïna i Ala la pa-palàjaru-ya dàngu la pa-pamàna-nya na madangu la tau Ihirailu. Nyuna napa jia-yaka na tanda welingu lai Ala, na-pandubaku-na na tau dangu; 35dàngu jia-duyaka ba tuna nu hi na-talunggaru na ihi etida. Na handuka napa natanju-nya na etimu, ba hama tuna hapanda dàkaya,” wàna.
36Ni-mbunyai na haàtu na wunangu kawini, kaweda-mana-nyaka. Hana-ya na tamuna, anana i Panuilu, welingu la kabihu Ahiaru. Ba pihu mbua ndau-naka pa-mangoma, 37nàhu i Hana ndonangu-nanyaka, dàngu na umuru-na mbàda walu kambulu patu mbua ndau-naka.#na umuru-na mbàda walu kambulu patu mbua ndau-naka: jàka ndia: walu kambulu patu mbua ndau-naka ngalana pa-ndonangu. Nda na-handàkangu pa-dunjaku-nya na Umana i Miri. Lodu rudungu lumu-mananya i Ala ba na-hamayangu dàngu ba na-puaha. 38Jia pàkuyai duna la rehi nuna ba namai hi nawotu-nya i Ala dàngu hi napanii-ya na rukuna nu na anakeda la tauka na manedi-nya na rehina i Ala ba na-pamarandeka-ya la Yeruhali.
Beli la Naharitu
39Ba da-palundu hàlanya-ka i Yuhupu dàngu i Maria na kalaratu Ukuna i Miri, beli-danyaka la Naharitu la Nggalilia. 40Na anakeda nuna ngeri matua ngeri halangatu-nanyaka. Lalu manggàna-ya hi nda uku mbuha-nanya paraïna i Ala.
I Miri Yehu la Umana i Miri
41Hau ndau - hau ndaungu da ina amana i Yehu dalua la Yeruhali la paremi-nya na Lodu Remi Paha. 42Ba jia-yaka ba hakambulu dàmbu ndauna na umuru-na i Yehu, lua-danyaka la paremi hama tuna na pakàli wàda. 43Ba hàlaka paremi beli-danyaka, tàka i Yehu, anada, jiapa-yapa la Yeruhali, da ama da inana nda dapi-anya. 44Ba dakaka-ya, nàhunya na-kikungu la ma-pakapulingu wàda bia. Ba dalaku-ka ngala hau lodu hinaka hi dahimbu-ya la angu nua kalembi-da dàngu la patanda - patanda-da. 45Tàka ba nda dahunggu-yapa beli-danyaka la Yeruhali pahimbu-ya. 46Ba tailu mbua lodu-daka ngalada pahimbu-ya, hunggu-danyaka nyuna daa la Umana i Miri. Mandapu-na padua-ka ba na-patingi-nja da ngguru anggama dàngu ba nawunda lii paàra - paàrangu. 47Mbuu ndàbana na tau na marongu-ya da-hangàtaru hàlanya na màhina nu la pahema - pahema-na. 48Da ina amana da-hangàtaru-mbu ba daita-ya. Napanii na inana, “Ananggu, nggikina hi tumu-nggama nu? Na amamu dàngu nyungga da-bàrangu da etima ba mahimbu-kau!” wànanya.
49Nahema i Yehu, “Ka nggikina nyimi ama ina hi mihimbu-ka? Ka ndai pi-anya nyimi ama ina, Nyungga duku ba nimangga bàdi la umana na Amanggu?” wàna. 50Tàka nyuda nda da-jàngapu-aya nuna na hemana i Yehu.
51Tunaka nu i Yehu beli karia-nanjaka la Naharitu, dàngu na-manundu-ma lai nyuda. Mbuu ndàbana na rukuna nuna na-pakàpa-maya daa la etina paraïna inana. 52I Yehu ngeri matua-tua-nanyaka dàngu ngeri mangga-nggàna-nanyaka, dàngu nanamu-ya paraïna i Ala dàngu nambuha-nya paraï tau.
S'ha seleccionat:
LUKAHU 2: KAM
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)