NA RUKUDA DA PA-PAHURUNGU 25
25
I Paulu ba nahei mbàndingu
1Ba tailu mbua lodu-naka i Petuhu ngalana patàka la ngabana lai nu, lua-nanyaka la Yeruhali welingu la Kaiharia. 2Lai nu da ratu kapala dàngu da liku uru Yahundi da-patàka-nya na pakàla wàdanya i Paulu. Dapama - mandanya i Petuhu 3ka pekuna ruku hàmu etina lai nyuda, ka na-orangu pa-paràhangu tau pa-karia-nya i Paulu la Yeruhali, nadu ba mbàda pahamangu-madaka pa-pameti-ya nyuna la padua ànda. 4Tàka nahema i Petuhu, “I Paulu papàtu la Kaiharia-ya, tàka nyungga nda ku-mandai-apa beli-nggunyaka lai nàhu. 5Jia-duya màta bia da tau da ma-pangora lai nyimi ka dalaku karia-ngga la Kaiharia dàngu ka da-palakara-nya nyuna lai nu, jàka tuba ningu-madu panjala-na,” wànanja.
6Ba waluna jàka ndia hakambulu lodu-naka pa-ngiangu la Yeruhali, beli-nanyaka i Petuhu la Kaiharia. Hadangu harii batangu-nanyaka la pa-rapatu, hi na-wuangu pareta ka na-hurungu i Paulu la hanggana. 7Ba natàka-ka i Paulu, da tau Yahundi da mambàda ninja welingu la Yeruhali ndolaku winggiru-danyaka, hi dawunda-ha da pa-pakàla wàda na ma-mbangatu hanggangu lai nyuna. Tàka nyuda nda peku wuangu-ada mbuti na pa-pakàla wàda. 8La dalu kahiri-na wikina, panii-nanyaka i Paulu, “Nyungga nda kutua duku hau manjala hangganja da ukuna i Muha, jàka ndia hangganya na Umana i Miri jàka ndiai hangganya na Hanganji Bokulu Romambu,” wàna.
9Tàka i Petuhu ka nambuha wàngga tau Yahundi ba wàna, ka paàra-nanyaka i Paulu, “Mu-mbuhangu nu palaku la Yeruhali ka rapatu nikau lai nu la hangganggu nyungga na manggàna-ha nuda da pa-pakàla wàda?” wàna.
10Nahema i Paulu, “Nyungga duku ndolaku-manggu-nyaka la hangga rapatu-na na Hanganji Bokulu Roma, lai nua bàdi duku ka rapatu nika. Nyumu umbu pi wiki-mamu-nyaka ba nda kunjala-a duku la tau Yahundi. 11Làti jàka kupangga-ya na uku, dàngu jàka kutu-maka hangia ràka pa-hukungu wànguka hukungu meti, ku-pamàjangu-ma duku wikinggu. Tàka jàka nda da-padeningu da pakàla wàdangga, nda ningua haàtu majia puli biangga lai nyuda. Nyungga nu karai-nggunya ka timbangga la rapatu-na na Hanganji Bokulu!” wàna.
12Ba nabata dànjaka da angu timbangu-na, panii-nanyaka i Petuhu, “Nyumu ba karai-munya ka timbanggau la rapatu-na na Hanganji Bokulu lupangu-maka bàdi nyumu kau lua la hanggana na Hanganji Bokulu,” wàna.
I Paulu la hanggada i Ànggaripa dàngu i Mberiniki
13Ndedi nggi mandai tàka-danyaka i Hanganji Ànggaripa dàngu i Mberiniki la Kaiharia, maida pa-paoha-nya na tàkana i Petuhu. 14Ba pira mbua lodu-daka ngalada paninja, i Petuhu na-kaloka-ya na rukuna i Paulu lai Hanganji Ànggaripa. I Petuhu napanii, “Ninya yiahu na haàtu na tau papàtu, na pa-bànjalu-na i Peliku. 15Ba talànga ningga la Yeruhali, da ratu kapala dàngu da liku uru Yahundi da-patàka-nya na pakàla wàdanya na tau nuna dàngu dakarai-ka ka kuhuku-nya. 16Tàka kuhema-ha nyuda, na tau Roma nda peku-ana la pa-pakata-nya tuna nu bia na tau pakàla la pahuku-nya, jàka ndedi-madu pa-pahangga-nja na ma-pakàla dàngu na pakàla, dàngu ka pahia-nya la pa-kahiri wikina. 17Jia-duya, ba damaika yiahu, nda kuhili patiangu mandai-apa pa-ngalangu bata-ma-anggunya na rapatu, hi ku-paràhangu papaau-nya na tau nuna pamai la rapatu. 18Ba da-hadangu-ka da ma-pakàla la pa-patàka-nya na pakàla wàdanya, tàka nda ana haua njalana pa-patàka-da, hama tuna na pakaka-nggu làti. 19Jiaya na-pahilitu pa-kawana-maada nyuda dàngu nyuna rukuna na anggama wikida, rukuna na haàtu na tau, i Yehu ba wàdanya. Na tau nuna mbàda meti-naka duna, tàka i Paulu na-padàdu-manya ba naluri na tau nuna. 20Ba kumbingu wànya ka jàka nggiki-naka bàdi ka kungala-nya taranga-na na palakara nuna, jia-duyaka hi ku-paàra-nya i Paulu napa hi na-mbuhangu bia palaku la Yeruhali pa-rapatu-ya na palakara-na lai nu. 21Tàka nyuna i Paulu karai-nanya pahei mbàndingu, nakarai ka hanina-ka ba pàtuya yiahu ka lupa narata-ya na palakara-na paraïna Hanganji Bokulu. Jia-duyaka ba tuna nu hi ku-wuangu pareta la papàtu pangala-nya ka lupa ningu kalongga-na pa-pangàndi-nya nyuna la Hanganji Bokulu, wànggu,” wàna. 22Hàla i Ànggaripa hi napanii-nya i Petuhu, “Nyungga wiki ku-mbuhangu-mai duku parongu-ya na tau nuna,” wàna. “Haromu pekuna kau ronguya,” hi wàna i Petuhu.
23Hadangu harii tàka-danyaka i Ànggaripa dàngu i Mberiniki ba dàngu wotuda ngaü maràmba-da. Nyuda datama la kuru rapatu pa-kariangu ndàba da tau bokulu tanatara dàngu da tau pangora la paraingu lai nu. I Petuhu na-wuangu pareta ka tama ngàndiya i Paulu. 24Hàla panii-nanyaka i Petuhu, “Tamu umbu Ànggaripa dàngu mbuu ndàbami mamàtu. Yiana-duyaka na tau na pa-kàlada lai nyungga paraï nggubulu-na na banjaru Yahundi, na maninya la Yeruhali-kai hamanai na maninya lai yiahu-mbu. Da-karuhi-ya ba ou - ouda, nda ràka-anapa nyuna jàka màta bianya paluri ba wàda. 25Tàka nyungga duku nda ana hunggu-manggunya paruku-na na ràka pa-hukungu wànguya hukungu meti. Tàka nyuna wiki ba karai-nanya ka pekuna na palakara-na ka timbanya la rapatu Hanganji Bokulu, kubota-yaka la pa-pangàndi-nya nyuna la Hanganji Bokulu. 26Ba tuna nyungga ndedi ningu-mapa taranga ma-lohangu pahunggu-nggu rukuna nyuna, ka ku-tulihu-nya la huratu na Hanganji Bokulu. Jiaya nuna na pakiri-na hi kutuya la hanggami nyimi umbu mbuu ndàbami, ri - rihi na Ma-pangarangu i Tamu umbu Ànggaripa! Na pawuku-nggu napa jàka hàlaka pa-pareha-ya ningu duka pawànggu ba ku-tulihu huratu. 27Nadu tundunya na pa-kanandi-nggu, nda ningu ngia papeku-na jàka pangàndi-nya tuna nu bia na tau papàtu dàngu nda pa-pawuwa-ha da njalana na pakàla wàdanya,” wàna.
S'ha seleccionat:
NA RUKUDA DA PA-PAHURUNGU 25: KAM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@LAI 1995 Indonesian Bible Society (Lembaga Alkitab Indonesia)