3 YOHANES 1
1
1 #
Kes. Ras. 19:29; Rum. 16:23; 1Kor. 1:14 Konduang Gayus ijo tonokasih!
Ahku okon ukup, ijo tu'u-tu'u mongasihi'ko, 2bodo'a, keleh Konduang borigas-rigas tutang paringoh pio-pios honong ihko sama kolou homboruan'mu pio-pios iou ka'a. 3Ahku sanang samasino, kotihka pira-pira Konduang Kristen johcok tutang mborihta ahkak'ku, eaminon kote'etoh, Konduang toharep Pohotala ijo morong, kotului puna Konduang toturus bolum numbun ajaran Pohotala. 4Eam anai ijo dahpot monyababoh ahku labih jorih, tahkanmba ngonih ijo anak-anak'ku bolum numbun ajaran Pohotala.
Gayus tonara
5Konduang'ku! Konduang kolourih kote'et a'ang gawi ijo Konduang nguai bagi sobat-sobat sosama Kristen; mahi-hino ulun Kristen ijo jaha Konduang ngosono ka, Konduang mohaluoh. 6Iro jari momborihtaoh rih, ahkan ukup ang unuk ihkai, tohou sitan'kam. Dohop iro, mangat dahpot noturus ponyalan iro tutang honong kolourih ngojorih ahtoi Pohotala, 7tului a'ang ponyalan ahkan mohalu Kristus, iro eam norima pondohop inon ka, tahkan ulun-ulun ijo eam kosono Pohotala. 8Tului rih, ihto ulun-ulun Kristen harus ndohop sobat-sobat sama Kristen ijo kolou orih, mangat ihto dahpot umba a'ang usaha iro, ahkan mborihta ajaran ijo morong tahkan Pohotala.
Diotrefes tutang Dimetrius
9Ahku jari nyurat surat ijo iwak ahkan ukup, tahpi Diotrefes ijo jolik monjadi okon, ang luwang ukup eam kani numbun ahku. 10Noin amat ahku lombut, ahku ahkan ngarak karon aang'co ijo jari tonguaioh, yorih tohou hal-hal ja'at tutang alik ijo io mander tohou ihkai! Tahpi paringoh rih jaha sukup ahkaioh. Aang ohkot sobat-sobat sosama Kristen rih lombut, io eam kani norima iro. Malah io ngohana ulun-ulun ijo kani norima konduang-konduang rih, tutang io nyuhu ulun-ulun rih, soluka tahkan ukup!
11Konduang ijo tonokasih ara nyutu inon ijo ja'at. Nyutu iou inon ijo hinut. Ulun ijo nguan kopios anairih ain Pohotala. Tutang ulun ijo nguan koja'at jaha ngosono Pohotala.
12Paring ulun monara Dimetrius. Mahihino Pohotala ka monaraoh. Ihkai ka'a naraoh, tutang Konduang kota'an ijo inon, ijo ihkai nyiaroh, dahpot tomorocaya.
Auh tahbe ponuhtup surat
13Aro samasino ijo porulu ahku manderoh ahkan ihkam, tahpi ahku nanyamoh labih pios ara nguha surat. 14Ahku moharap eam tahi hino ahkan hosombang umba ihkam tutang ihto ahkan bopander hotoharep.
15Keleh Tuhan momborehkat Konduang.
Sobat-sobat'kam ang unuk ahku tuh, ngirim tahbe ahkan ihkam. Ngojohcok tehbe'ku ahkan paring sobat-sobat ihto mihco-mihco.
S'ha seleccionat:
3 YOHANES 1: OTD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
@ LAI 1997 Indonesian Bible Society (Lembaga Alkitab Indonesia)