BILANGAN 12
12
Hona uhum si Miryam dibaen Tuhan
1Dung i dibuat si Musa ma sada dadaboru halak Kus gabe dadaborunia, gabe digorahon si Miryam dohot si Harun ma i. 2Ninna halahi ma, “Hum markite-hite si Musa noma he mangkobari Tuhan i? Markite-hite hita pe nada he mangkobari Ia?” Dibege Tuhan do hata ni halahi i. (3Sada halak na toruk roha do si Musa, tumoruk do rohania sian sude jolma na adong di ginjang tano on.)
4Dung i tompu ma didok Tuhan tu si Musa, si Harun dohot si Miryam, “Au mandok anso ro hamu na tolu tu Bandar ParmiananKu.” Halahi pe kehe ma tusi, 5dung i mijur ma Tuhan di bagasan sada ombun na ginjang songon tiang. Jongjong ma Tuhan i di pintu ni Bandar Parmianan pio-pio, “Harun! Miryam!” Manigor mangalangka ma halahi na dua tu jolo, 6didok Tuhan i ma, “Tangihon hamu ma sanga aha na giot dohononKu! Muda adong angka panurirang di tonga-tongamunu, giot Hupatidahon diringKu tu halahi di bagasan parnidaan, jana mangkatai Au dohot halahi markite-hite nipi. 7Tapi nada songon i muda mangkatai Au dohot si Musa pangoloingKi. Madung Hupasahat tusia karejo mamimpin bangsongKu Israel. 8Jadi mangkatai Au dohot ia paadop-adop bohi be, tangkas nada markuling-kulingan. Salang tompangKu pe madung diida ia! Biasi puluk dope hamu mangalo ia?”
9Dung i dimuruhi Tuhan ma halahi na dua, jana dung kehe Tuhan i, 10ditinggalkon ombun i ma Bandar Parmianan Ni Tuhan, gabe tompu ma hona nyae kusta na jorbut si Miryam. Bontar huling-kulingnia songon hapas. Hatiha manaili si Harun tu si Miryam diida ia ma na dung hona kusta si Miryam. 11Didok ia ma tu si Musa, “Urupi hami tuan, ulang paloas hami diparkanciti hara ni dosa na hami baen di bagasan haotoonnami. 12Ulang padiar ia gabe songon dakdanak na sorang dung jolo mate, na marjuhut na manggum.”
13Dung i dipangido si Musa ma tu Tuhan i, “Ale Debata, pamalum ma ia.”
14Dialusi Tuhan i ma, “Sugari ma ditijuri amangnia bohinia, manaon layas ma ia di bagasan pitu ari. Antong padao ma ia sian parbandaran i pitu ari honokna, dung i pe anso tola ia masuk mangulahi.” 15Dung i diparuar halahi ma si Miryam sian parbandaran i pitu ari honokna, salolot so dioban halahi mulak ibana, nada morot bangso i sian i. 16Dung i ditinggalkon halahi ma Haserot, marbandar ma halahi di Parhorsihan Paran.
S'ha seleccionat:
BILANGAN 12: LAIAKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Indonesian Bible Society