HAMALIMON 6
6
1Dilehen Tuhan dope angka aturan on tu si Musa. 2-3Mardosa do sada halak maradopkon Tuhan muda so dipaulak ia barang na nipasimpankon ni donganna halak Israel tusia, sanga muda ditangko ia barang ni halak sanga dikicu ia sanga pe na so ra mangoku na dapotnia barang na mago jana na puluk marsumpa hara ni i. Muda songon i pangalahona, angkon sombahononnia ma haul partobus.
4-5Angkon gararonnia do mulak sanga aha na dapotnia sian dalan na so tigor. Muda tardapot sahalak marsala hatiha dibaen ia hasalaan i, angkon gok do gararonnia tu nampuna i ditamba muse dope duapulu porsen. 6Songon haul partobus ni hasalaan tu Tuhan, angkon obanon ni halahi ma tu malim sada biri-biri sanga sada hambeng jantan na so martihas. Asamon ma argana mangihutkon arga na dung ditontuhon. 7Angkon pasahaton ni malim ma i gabe haul hara ni dosa ni halakna i, dung i sesaon ni Tuhan i ma dosana.
Haul na nitutung sude
8Disuru Tuhan ma si Musa, 9mangalehen tu si Harun dohot tu angka dakdanakna deba nari angka aturan taringot tu haul situtungon. Angkon tinggalkonon ni malim do haul i di ginjang ni langgatan saborngin i, bope api ni langgatan i angkon dipadiar marjilam. 10Dung i angkon pakeonnia do saraor pendek dohot baju juba na nibaen sian abit linen, lalu mambangkit abu na martabo-tabo na lobi sian langgatan jana mamayakkon tu topi ni langgatan i. 11Dung i angkon gontion ni malim i ma pakeanna lalu maroban abu i tu balian ni bandar, di inganan na ias mangihutkon ugamo.
12Angkon jagoan do api na di ginjang langgatan i anso tongtong marjilam, nada tola padiaron mintop. Ganop manyogot angkon baenon ni malim i do soban tu langgatan i, bope manyusun haul situtungon na di ginjangna i jana manutung tabo-tabo sian haul haluaan i. 13Angkon tongtong do marjilam api i, nada tola padiaron mintop.
Haul gandum
14Songon on ma angka aturan taringot tu haul gandum di Tuhan. Sahalak malim sian pomparan ni si Harun angkon maroban tu jolo ni langgatan. 15Dung i angkon buatonnia ma sude hamonyan na adong di ginjang ni haul i, dohot sanggolom topung bope miak. Sude na nibuatnia i angkon nitutung di ginjang ni langgatan na gabe tanda ma i bahaso sudena i madung nihaulkon tu Tuhan. Uap ni haul i ma na pajop roha ni Tuhan. 16-17Topung na lobi i baenon ma roti na so marragi, angkon panganon ni angka malim ma i di inganan na badia, i ma di alaman ni Bandar Parmianan Ni Tuhan. I do bagian ni angka malim na nilehen ni Tuhan di halahi sian haul sipanganon. Sipanganon na badia situtu do i, dos dohot haul hasesaan ni dosa dohot haul tobus ni hasalaan. 18Di sude hatiha di pudian ni ari, sude pomparan ni si Harun halaklahi, tola do mangankon roti i, i ma da bagian ni halahi na dung ditontuhon sian sipanganon na nipasahat tu Tuhan. Halak na asing na dais tu sipanganon na dung dihaulkon gabe badia hara hagogoan ni habadiaan ni haul i.
19Dilehen Tuhan i dope angka aturan on tu si Musa, 20taringot tu na mangojakkon sada malim sian pomparan ni si Harun. Di ari pangojakkon ni malim i, angkon obanonnia ma topung gandum sakilo di Tuhan. (Dos bahatna songon haul gandum ari-ari.) Satonga ma i sihaulkononkon manyogot i, lobina i di andospotangna. 21Angkon campuron do topung i dohot miak, dung i ditutung di ginjang ni pamanggangan lalu disarsar, dung i disombahon ma i gabe haul gandum. Uap ni haul i ma pajopkon roha ni Tuhan. 22Lopus tu pudian ni ari sude pomparan ni si Harun, markarejo ma i gabe Malim Godang laho pasahatkon haul on. Sudena i angkon ditutung, na gabe somba-somba tu Tuhan. 23Haul gandum na nipasahat ni malim i angkon tutungon do lopus masak sude, saotik pe nada tola panganon.
Haul hasesaan ni dosa
24Didok Debata ma tu si Musa 25anso dilehen tu si Harun dohot tu angka dakdanaknia angka aturan deba nari taringot tu hasesaan ni dosa. Angkon sambolon do pahan-pahanan sibaenon haul i di topi ni langgatan sabola sian Utara gabe haul situtungon. Na sun badia do haul i. 26Malim na manghaulkon pahan-pahanan i pe angkon panganonna do sian i di sada inganan na badia, i ma di alaman ni Bandar Parmianan Ni Tuhan. 27Sanga ise jana barang aha pe na dais tu juhut ni pahan-pahanan i, angkon hona mara hara ni gogo ni habadiaanna. Muda mamistik saotik sian mudar ni pahan-pahanan i tu sada baju, angkon basuon baju i di sada inganan na badia. 28Hudon tano pamolgang juhut na gabe haul i angkon ditaporkon. Muda hudon bosi do na nipake i, angkon gosohon ma hudon i, dung i dipaias dohot aek. 29Sude halaklahi sian horong ni malim tola do mangankon haul na sun badia i. 30Pahan-pahanan nampuna mudar na dioban tu bagasan Bandar Parmianan, na nipake i laho mangido hasesaan ni dosa, angkon tutungon do sude, nada tola i panganon.
S'ha seleccionat:
HAMALIMON 6: LAIAKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Indonesian Bible Society