HAMALIMON 26
26
Pasupasu tu halak na mangoloi
(Pang. 7:12-24; 28:1-14)
1Didok Tuhan ma, “Nada tola baenonmunu gana-ganaan sanga pajongjong patung sanga pe tiang batu na niuhir gabe sombaon, Au do Tuhan Debatamu. 2Pestahon ma Ari SabatKu jana pasangap ma inganan na badia sanga di dia disomba hamu Au. Au do Tuhan.
3Muda marpungu hamu mangihutkon angka aturan na sian Au jana dipatulus angka parentangKu, 4Huparo pe udan di hatihana, gabe dilehen tano i ma suhana jana marbatu ma hayu na nisuanmunu. 5Suha ni tanomunu gabe marlipat ganda, pola tehe dung dapot hatihana mambuat batu ni anggur, laing manyabi dope hamu. Jana dung dapot hatiha manyabur same ni gandum, laing mambuat batu ni anggur dope hamu. Gabe tuk ma panganonmunu jana sonang ngolumunu di luatmunu.
6Sonang pe Hubaen luatmunu, gabe sonang hamu modom so adong habiaran sanga tu ise pe. Huagohon pe sude angka binatang na parohon parmaraan sian luatmunu, jana porang pe nada masa disi. 7Taluhononmunu ma musumunu. 8Lima pe sian hamu tarbaen mangalo saratus, jana saratus tarbaen mangalo sampulu ribu. 9Hupasupasu pe hamu jana Hulehen bahat pomparanmunu. Sude na dung Hujanjihon tu hamu, angkon patulusonKu. 10Sabionmunu marlipat ganda, jabat tuk sataon. Pola tehe mangambungkon na lobi di sabion na salpu anso adong inganan ni suha ni sabion na baru. 11Rap do Au dohot hamu di bagasan Bandar Na Badia, jana nada unjung Hutinggalkon hamu. 12Rap do Au dohot hamu, Au do gabe Debatamunu jana hamu gabe bangsongKu. 13Au do Tuhan Debatamu na maroban hamu ruar sian tano Mesir anso ulang diparhatoban hamu. Madung Huponggolkon kuaso na mandondoni hamu, jana Hubaen hamu gabe halak na dung malua.”
Uhum tu halak na so mangoloi
(Pang. 28:15-68)
14Didok Tuhan ma, “Muda nada dioloi hamu parentangKu uhumonKu ma hamu. 15Muda dilanggar hamu janji na Hubaen dohot hamu jana nada ra hamu mangoloi angka aturan na sian Au dohot parentangKu, 16uhumonKu ma hamu. ParoonKu ma bala tu hamu, nyae dohot arun na so haubatan, gabe mapitung ma hamu jana marhancit ngolumunu. Saburonmunu ma same, tapi nada daionmunu suhana, angke angka musumunu giot ro patunduk hamu jana manyabi na nisuanmunu. 17Au do alomunu, gabe ditaluhon hamu jana halak na mangkagigihon hamu, gabe mangkuasoi hamu. Gok biar ma hamu, gabe marlojong hamu haru so adong mangayak-ayak.
18Muda dung ditaon hamu sudena i, hape laing so dioloi hamu Au, Hutamba ma uhum tu hamu pitu lipat. 19Tarlobi do sombongmunu, tapi Au patunduk hamu. Nada ro be udan, gabe hiang ma tanomi pir songon batu. 20Sude halojaonmu nada adong gunana, angke tanomunu nada marsuha, jana suan-suananmu nada marbatu.
21Muda sai torus dope aloonmunu Au jana nada dioloi hamu Au, tambaanKu dope uhum pitu noli lompit. 22ParoonKu ma angka binatang na parohon parmaraan tu tonga-tongamunu. Soroanna ma angka anakmu, mamunu pahan-pahananmu pasudehon hamu, gabe saotik ma bilanganmunu, gabe lungun angka dalan na adong di luatmunu.
23Dung ditaon hamu songon i sude uhuman i, hape laing nada dioloi hamu Au, mur mangalo hamu tu Au 24Au ma alomunu manguhum hamu pitu lompit umborat sian parjolo. 25ParoonKu ma parporangan laho manguhum hamu, angke madung dilaosi hamu aturanKu, dung i muda marlagut hamu di kotamunu manjalahi paronding-ondingan, paroonKu ma tu hamu nyae na so haubatan gabe tunduk hamu tu musumunu. 26Gabe sude ma balanjomunu, jabat sampulu dadaboru mangalompa di sada tataring pamasakkon roti na adong di halahi. Dibagi dos panganon i, dung i dilehen di hamu, hape sai tongtong male hamu.
27Dung ditaon hamu sude na songon i, hape laing so ditangihon hamu Au jana nada dioloi hamu Au 28mardongan muruk aloonKu hamu. Dung i Huuhum hamu pitu noli dumokdok sian na parjolo i. 29Gabe tangkuraparon ma hamu, pola panganonmunu anakmunu sandiri. 30RoncohononKu ma inganan parsombaanmunu, angka na di tor, Hurumpakkon angka langgatan inganan panutungan ni hamonyan jana Hupardanggurkon angka bangkemunu tu angka gana-ganaan na marumpak i. Hara ni pangkilalaan na magigi. 31Angka kota Hugonti dohot banggar na mosok, inganan panyombaanmu angkon Huroncohon bope angka haulmunu nada jagitonKu. 32Maronco ma luatmu sude, pola tarsonggot angka musumu na marnida i hara ni bahat ni na maronco i. 33ParoonKu ma parporangan di luatmunu jana manyarsar hamu di luat na leban. Angka ladangmu gabe tarulang jana kotamu gabe abu. 34-35Apala di hatiha i ma sude tanomu na so diloas ho maradian, gabe tutu maradian. Dompak di bagasan habuangan hamu tu luat ni musumu, tarulang ma tanomu. Marhite na songon i ma maradian tano i.
36Angkon tarbuang do hamu muse tu luat na leban, baenonKu habiaran tu hamu pola tehe hum umbege sora ni bulung-bulung na niombus ni haba-haba pe gabe mabiar hamu. Gabe marlojong ma hamu songon na diayak di parporangan, martinggangan ma hamu di hatiha so adong musu humaliang hamu. 37Marlojong ma hamu martomboman na sada tu na sada nari, hatiha so adong na mangayak, jana nada adong gogomunu marporang mangalo sanga musu aha pe. 38Marmatean ma hamu di habuangan, dironcohon musumunu ma angka luatmunu. 39Saotik sian hamu na laing mangolu di luat ni musumunu gabe marhancit hara ni dosamunu sandiri dohot dosa ni ompumunu.
40Tapi anggo pomparanmu dioku halahi do dosa ni halahi sandiri dohot dosa ni ompu ni halahi, na dung mardosa hara ni na dialo halahi Au, 41gabe Hualo halahi jana Huusir halahi tu habuangan di luat ni musu ni halahi. Di pudi dung tunduk angka pomparanmu jana dung mardalan uhuman hara ni dosa dohot pangaloon ni halahi, 42ingotonKu ma parjanjian dohot si Jakob, si Ishak dohot si Abraham. PaimbaruonKu ma janjingKu laho mangalehen tano tu bangsongKu. 43Tapi angkon jolo rumar do tano i dibaen pangisina, anso tarbaen sonang maradian. Jana bangsongKu angkon mandalani sude uhuman na hona tu halahi hara ni na so ra halahi mangihutkon angka tonangKu dohot parentangKu. 44Tapi haru pe laing di luat ni musu halahi tinggal, nada tinggalkononKu sanga roncohononKu halahi. Angke muda Huroncohon halahi, na manggotapkon parjanjian do Au tu halahi, hape Au do Tuhan Debata ni halahi. 45PaimbaruonKu ma janji na Hubaen dohot ompu ni halahi hatiha Hupatidahon kuasongKu tu angka bangso jana Huoban bangsongKu ruar sian Mesir, anso Au Tuhan gabe Debata ni halahi.”
46Sudena i, i ma angka aturan dohot angka parenta na nilehen ni Tuhan di Dolok Sinai tu halak Israel marhite si Musa.
S'ha seleccionat:
HAMALIMON 26: LAIAKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Indonesian Bible Society