HARURUAR 40
40
Dipasang jana dihapunjungkon ma di Tuhan Bandar Parmianan ni Tuhan i
1Didok Tuhan ma tu si Musa, 2“Pasangonmu ma Bandar ParmiananKi di tanggal sada bulan sada. 3Pamasuk ma tu bagasan Bandar Parmianan Poti Parjanjian na marisi Parenta Na Sampulu i lalu pasang ma tire di jolona i. 4Pamasuk ma meja i lalu pambaeni ma angka parkokas tu ginjangna i. Laing pamasuk muse ma parlampuan i jana pagara ma lampu i. 5Payakkon ma langgatan sere inganan panutungan ni hamonyan i di jolo ni Poti Parjanjian i jana angkon di pintu ni Bandar Parmianan do gantungkononmu tirena i. 6Tapi anggo langgatan pamelean ni pelean situtungon angkon pajongjongonmu do di jolo ni pintu Inganan Na Badia i, bandar parluhutan i. 7Langgatan baen haul situtungon i angkon di antara ni Bandar Parmianan dohot langgatan do i baenonmu lalu baen ma aek tusi. 8Dung i handangna i angkon pasangonmu do humaliang Bandar Parmianan jana angkon gantungkononmu tire di pintu ni alaman i.
9Dung i angkon pasahatonmu do Bandar Parmianan dohot sude panjamaanna i tu Au marhite na mamiahisa dohot miak upacara, jadi gabe dihapunjungkon ma i di Au. 10Dung i angkon pasahatonmu do tu Au langgatan i dohot sude panjamaanna marhite na mamiahisa, anso sudena i dihapunjungkon. 11Dung i pasahat ma bak parbasuan i dohot ojahanna i, sarupa pambaenna.
12Dung i angkon suruonmu do si Harun dohot angka anaknia ro tu pintu ni Bandar Parmianan jana marpangir ma halahi mangihutkon upacara ugamo. 13Papakehon ma pakean malim i tu si Harun, miahi ma ia jana marhite na songon i ma dihapunjungkon ho ia anso tarbaen ia mangoloi Au songon malim. 14Dung i oban muse ma angka dakdanaknia jana papakehon ma kameja tu halahi. 15Jana miahi ma halahi songon pamiahimu di amang ni halahi i, anso laing tarbaen muse ma halahi mangoloi Au songon malim. Markite-hite upacara na mamiahi i, gabe malim ma halahi salolot-lolotna.”
16Dipatulus si Musa ma sudena songon na niparentahon ni Tuhan i. 17Jadi di tanggal sada bulan sada di taon paduahon dung ditadingkon bangso Israel tano Mesir, dipajongjong ma Bandar Parmianan ni Tuhan. 18Dipayakkon si Musa ma ojahanna, dipajongjong ma angka tiangna jana dipasang ma angka balok na manggistang. 19Dipahembang ia ma tarup ni Bandar Parmianan lalu dipayakkon ia ma tutupna parruar di ginjangna, songon na niparentahon ni Tuhan i. 20Dung i dibuat ia ma batu na dua karambar i jana dipamasuk ia ma i tu Poti Parjanjian. Porsan-porsan ni Poti i disurukkon ia ma tu bagasan golang-golang pamorsananna lalu dipasang ma tutupna di ginjang. 21Lalu dipamasuk ma Poti i di bagasan Bandar Parmianan, dung i digantungkon ma tire pangondingina di jolo. Songon i ma pangholipi ni Poti Parjanjian i dibaen.
22Dung i dibaen si Musa ma meja di bagasan Bandar Parmianan, sabola Utara di ruar ni tire i, 23lalu dipayakkon ia roti sihaulkonon tu Tuhan di ginjangna i. 24Parlampuan i pe dibaen ia ma di bagasan Bandar Parmianan, sabola Selatan paadop-adop dohot meja i, 25dung i dipagara si Musa ma angka lampu i di adopan ni Tuhan. 26Dipayakkon ma langgatan sere di bagasan Bandar Parmianan i, di jolo ni tire i, 27jana ditutung ia ma hamonyan na huskus di ginjangna songon na niparentahon ni Tuhan i. 28Digantungkon si Musa ma tire di pintu ni Bandar Parmianan, 29lalu dibaen ia ma di jolo ni pintu i langgatan ni haul situtungon. Dihaulkon ia ma haul situtungon dohot haul gandum di ginjang ni langgatan i. 30Bak parbasuan dibaen ia di antara ni Bandar Parmianan dohot langgatan lalu digohi ia dohot aek. 31Disi ma si Musa, si Harun dohot angka anaknia marbasu tangan dohot pat 32ganop masuk halahi tu bagasan Bandar Na Badia i sanga dumonok tu langgatan i, basuon ni halahi ma pat dohot tanganna, songon na niparentahon ni Tuhan i. 33Dibaen ia ma handang humaliang Bandar Parmianan dohot langgatan lalu digantungkon ia ma tire di pintu ni alamanna i. Jadi dung songon i, salose ma sude karejo i.
Ro ombun manutupi Bandar Parmianan Ni Tuhan
(Bil. 9:15-23)
34Dung i mijur ma ombun manutupi Bandar Na Badia i jana digohi sinondang na marnyala sian haroro ni Tuhan ma Bandar Parmianan. 35Jadi gabe nada hamasuhan si Musa be tu bagasan Bandar Parmianan. 36Muda manaek ombun i sian Bandar Na Badia i, dibungkar halak Israel ma parbandaranna laho pinda tu inganan na asing. 37Muda laing hot do ombun i di ginjang ni Bandar Na Badia i, laing hot muse ma halahi di parbandaran ni halahi. 38Salolot na madang-adang i bangso Israel tarida do haroro ni Tuhan di ginjang ni Bandar Parmianan di bagasan rupa ni ombun muda hatiha arian jana di bagasan rupa ni api na marjilam muda borngin.
S'ha seleccionat:
HARURUAR 40: LAIAKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Indonesian Bible Society